KƆRƐNTE LƐIYE 13

1Mu kubɔ taaniyei e bɛrɛ yaauwɔn. Ama Dɔn nɛ tɔŋaaɲu gin’: “Sɔɔ puu sɛɛrɛ lɛi ma taanu ma aŋa sɛɛrɛ le kilɛmɔɲu.” 2Kodigɛu, giru nɛ inɛw hakɛ kanrin gɔbe lee, wajunw puu lee bɛrɛ mu kanɛ baa tagauwɔn. Halu mu kanɛ e le wɔlɔn dɛi, kubɔ lɛiye e bɛrɛ mu wɛi gɔ le bana mu sɔi gin’, e bɛrɛ wiyaaun ye, inɛ mu paabaido wɔlɔ. 3Kirisito mu le digɛnu sɔɔ sɔɔuwɔ ga, e wogɔ sɛɛrɛ iye ibɛɛ wɔi digɛu, e bɛbɛɛdei. Kirisito e sibɛ nɛ yɛbɛlɛ le wɔlɔ, kaa gɔnrɔn womɔ logoro ebe nɛ tagarauwɔ. 4Yɛbɛlɛ womɔ sabu dɛi woi baga nɛ pɛgin narain. Kaa wo Ama gɔnrɔn dɛi ɔnmɔi wɔɔ. Emɛ kanran, wo le digɛu yɛbiliyaain. Kaa emɛ sɔɔ ebe kilɛmɔɲu gɔnrɔn yasin, sabu emɛ kanran, Ama gɔnrɔn dɛi, Kirisito le digɛu ɔnmɔi wɔin. 5E tunmi kuu ebe marun yɛnɛi. Gagawu le yaauwɔi ma tunmi ei suburu yɛnɛi. Yesu Kirisito e nɛ yato ga jugɔuwɔlɔi ma? Kɔɔi ye e subɔrɔ gɔ nɛ gɔnrɔn bɛɛli ma laa ye kai. 6Kaa emɛ subɔrɔ gɔ nɛ gɔnrɔn bɛɛnɛ kanrannɛ ga e jujugɔdei diyɛdɔn le wɔun. 7Ebaa mɔɲu turu kanran kanrannɔu ga, emɛ e dɛi Ama gɛɛunwɔin. Emɛ subɔrɔ gɔ nɛ gɔnrɔn biyaaɲu tagaradɛin dɛi laa, kaa ebaa ɛju kanran gai. Halu emɛ subɔrɔ gɔ nɛ gɔnrɔn bɛɛnɛ gin’ wɔin kanran koi. 8Sabu emɛ naran gɔ le yabiyɛ gɔnrɔin laa ye, naran le jaiyɛ gɔnrɔn sɛnɛ. 9Waaru emi yɛbiliyaa, kole digɛnu paŋa e siyaajɛ, emɛ kinɛ ɛhɛɛliyɛmɔɲu. Iyaa ei kibaai biyɛ ga, amagɛɛn emɛ nɛ kijɛ emɛ dɛnɛjɛ gɔ woi. 10Wogɔ digɛu, kanɛ e le wɔlɔ mu wɔɔ waaru gɔ le mu lɛtɛrɛ ɔn tɔŋɔ tiiuwɔn. Waaru e bɛrɛ wiyaa mu dɔwaajɛ, maa kuu ebe nɛ paŋa mu sɛɛ le kɛukɛu e sibɛ nɛ ɛɛin biyɛnɔu ga kodɛi tɔŋɔuwɔn. Inɛw Baŋa, maa paŋa ebe bariyɛmɔ ga kuu ebe nɛ mu bɛrɛ paŋa obu. Ei suyo gai laa. 11Nɛɛ kai ba unrunw, jamu biyɛmɔi. Kibaai bii nɛ mainiyɛin, tunmɔi mainiyɛnmɔi, mii turu le biyɛi, tunmɔ le jamu le biyɛi. Kɔɔ biyaai ye, ihibɛ lee, jamu lee Ama gɔ e le bibiyɛdo. 12Ama inɛw gin’ ihibɛ le tunmɔi poonɔi. Ama inɛw gɔbe puu ei poonɔuwɔin. 13Inɛw Baŋa Yesu Kirisito nɛɛma gɔ lee, Ama ihibɛ gɔ lee, Kikinu Pilu bɔɔi bii gɔ lee, e wooi le biyɛ.

will be added

X\