KƆRƐNTE LƐIYE 12

1Kuu ma unu gɔ waajibi laa ye, ɛju konɛ tolo. Kokanran, mu kuu iyebe lee, Inɛw Baŋa mu bɛrɛ sɔɔ jugɔmu lee sɔɔ nɛ wɛwɛɛdɔn. 2Mu Kirisito jaŋu ii turu igii wɔun. Nɛɛ anranguju pɛli naisigɛ dɔwaai, wo goju womɔ nɛ yatobe ma, tobele ma, Ama igii wɔɔ laa ye, mu inɔn, kaa woi jeɲaa, ginsɛsai alagala taaniye go baa uni. 3Ainɛ kɔɔi jeɲaa, alujɛnɛ nɛ baa uni ga mu igii wɔun. Kaa wo goju womɔ le bee ma, kole bele ma mu inɔn. Amai sai wogɔ jugɔjɛ. 4Konɛ wo sɔɔ inɛ pilemu ye sɔɔ bɛɛlɛ, sɔɔ aŋa dɛi gaa ɛgaabe. 5Inɛ kɔɔ tunmɔ dɛi mu kuu ma uhunɔdɔn. Kaa kuu ma le yɛbɛlɛ ma kijɛ tagarajɛ dɛi laa ye, mu kuu ma unɔidolɔn. 6Mu kuu ma unɔ ibɛɛ wɔun ye, mui bomɔginɛi gɛiyɛɛlɛ. Sabu mu narain sɔɔdɔn. Kaa inɛ turu mu nɛ sɔɔ wo iyejɛ lee, wo ɛgɛjɛ lee dɛi sigɛ mui bojodo ma liliyɛ dɛi, mu wogɔ kanraindolɔn. 7Kaa kɔɔ wooi nɛ kijɛ sigɛ naa sigɛ mu bɛrɛ jugɔmi kɔɔbe dɛi maa kuu ulo le joi ye biyɛnɔu ga, jijii turu goju ma nɛ digɛraa bojaaɲu. Jijii wogɔ, Setanu titiyainɛi biyaa, maa kuu ulo le joi ye biyɛnɔu ga mui ɔɲɔmɔuwɔ. 8Kubɔ taanu mu Inɛw Baŋa bɛrɛ gɛnyaan, ɔɲɛ kɔɔ mu le wageniyɛnmɔ gun. 9Wo mu le saa: «Nɛɛma ma gɔ ui baa. Sabu gɔnrɔn ma paŋa gɔ, yɛbɛlɛ nɛ iyemɔjɛ.» Kɔɔi biyaa ye, Kirisito gɔnrɔn gɔ mu nɛ toiyo ga, yɛbɛlɛ ma dɛi sigɛ le mu kuu ma uhunɔdɔn. 10Kodigɛu, Kirisito dɛi yɛbɛlɛi ma, kuusugo sɔɔ ma, nau ma, tɔɔɲɔ ma, kinɛ ɔɲɛ sɔɔ ma mu bɛrɛ dɔwaai ye, kinɛ ma ahaajɛ. Sabu waaru mui yɛbiliyaajɛ, paŋa waaru mu sɛɛ gɔ woi. 11Mu bomɔginɛi biyaaun. Kaa ei mui biyɛmaa kaaru. Sabu boi ɛju ma sɔɔ sɔɔnw gɔ ei biyɛun dagaa. Halu mui kijɛ kanmai laa kanran, Yesu jaŋu unrunw tiyaaɲu sigɛbei ga kowɔin kɔɔbei kijɛ nɛ dɔɔlu mu kanrun wɔlɔ. 12Mui Yesu jaŋu ii tiyaaɲui ga birɛ le jugɔmɔjɛ gɔbe puu logoro ebe nɛ muyɔn tɔgu puu le tagaraabɛin. Sɛɛrɛ taanrinyɛn lee, yarabirɛ lee, taanrinyɛn lee wogɔ tagurin. 13Dɔɔ ma e bɛrɛ duurɔlun mu kanrun gɔi laa go, Ama inɛw mɔɔnu wajunw kijɛ bɛin e bɛɛlu gɔ ingei? Teitai laa wogɔ mui yaabu kanrain. 14Yɛnɛi, kubɔ taaniye e bɛrɛ mu wɛɛido dɛi, mu mui yegeraa wɔun. Nimɛ kanran dɔɔ ma e bɛrɛ duurɔidolɔn. Sabu mu numɔ ebe kijɛi dɛnɛɛlɔn, ei dɛnɛjɔn. Unrunw, bei naranw kai dɛi kijɛ mɔɔnɔɔnɛ, kaa, unrunw naranw gɔbei, unrunw gɔ kai dɛi kijɛ mɔɔnɔɲu. 15Kunrin, mu kai kinrun ebe dɛi numɔ ma kijɛ puu kinɛ ɛɛli le obodɔn. Mu mui kanran ohobodɔn. Mu kɔɔ gin’ ei ibɛɛ mu wɔnu, e mui gaai ibɛlai biyɛdei ma? 16E ajubaa yɛnaa ye, maa dɔɔ ma e bɛrɛ duurɔlun narain, kaa maa inɛ soŋɔi digɛu sosoŋɔ ma le ei bɛi gɛɛjɛi. 17Inɛw e bɛrɛ mu tii gɔbe le mu ei punaa kayaabɔn ma? 18Mu Titei gɛnyaan, e bɛrɛ yaa gun. Iyaa emɛ bainɛ gɔi wo le digɛraa tiyaabɔn. Tite ei punaa kayaabe ma? Wo lee, mu lee, birɛ emɛ gɔ ajubu turu gɔ le birɛnɛ ma? Yoiyaara emɛ bana gɔ turu laa ma? 19Emaa giru ebe nɛ, anrin baa kuu emɛ nɛ narain obouwɔin ma ga e ajubauwɔi. Kaa, emɛ Kirisito le pagu turu go Ama giru nɛ sɔɔuwɔin. Koyɛ, ba unrunw ibɛ mabe, ebaa paŋa bɛɛ gai sɔɔɲu. 20Waaru e bɛrɛ mu dɔwaajɛ, bana mu dɛnɛjɛ gin’ e yinwɔlɔi tɛmɛdɔn ma liyɛuwɔn. E kanran bana e dɛnɛɛlɛ gin’ mu biyɛdɔn ma liyɛuwɔn. Logoro ebe nɛ jai lee, ele lee, kinɛ ingelemu lee, tunmɔ tɛmurun sɔɔ lee, boi yamulu lee, jaara lee, kuu ulo lee, oju sɛlɛ birɛ lee tɛtɛmɛdɔn ma liyɛuwɔn. 21Mu e bɛrɛ wiyaa dɔwaaun ye, Ama, giru ebe nɛ pilemu ye mu bɛrɛ dɔgɔ wo taguru ye, giru nɛ baa inɛw hakɛ kanrin gɔbe logoro nɛ joo, kanran lɔgɔgu bemɛ lee, sala bemɛ lee, kuu sɛlɛ birɛ bemɛ lee dɛi ajubuduli bɛɛnɛ giye, kuu bemɛ nɛ mu bɛrɛ pii pipiimɔ ma liyɛuwɔn.

will be added

X\