KƆRƐNTE LƐIYE 10

1Mu Pɔlu, e le wɔnu inɛ kuu sunugu le wɔɔ gɛɛɲu gɔ, wageniyaan ye e le inɛ ɛɛin wɔɔ gɛɛɲu gɔ, Kirisito kinɛ ɛju sɛɛ gɔ lee, muyɔn wo sɛɛ gɔ lee dɛi mu kuu ma le e bɛrɛ gɛɛunwɔ, 2e bɛrɛ waaru mu wiyaajɛ, mainiyaanjɛi ye, e le mu bɛrɛ ɛɛin biyɛ kaaramɔnɔugi. Sabu emaa Adama unrunw peere bana le kɛukɛu yoi yaaɲu inɛw gɛɛnw gɔbe sibɛ go liyɛ sɛlɛ go, mu ɛɛin bii bɛbɛɛdɔn ga igii wɔun. 3Emɛ gojunawan le wɔin narain, kaa, Adama ii peere bana le jai jaiyɛɛnɛ. 4Sabu gelu le kɔmɔ emɛ taajɛ gɔ, Adama ii peere kɔmɔtai gelui laa. Kaa Ama kɔmɔgelu paŋagui. Kɔmɔsɛguru ginrun gɔbei damu sunugoɲu gɔnrɔn yasɛ. Emɛ, ajubu kɔri wɔin gɔbe le jaii ye bei susuyoɲu. 5Kijɛ kuu ulogu ingei kanran, Ama jugu tɛtɛŋɛjɛ, kole jajaiyɛjɛ ye, emɛ wogɔbe minɛ nɛ damu sunugoɲu. Emɛ ajubu puu aa pagaa ye, Kirisito sɔɔ yabamɔɲu. 6Iyaa, sɔɔ yabu ebe gɔ waaru kibaajɛ, sɔɔ yabala puu kuu nɛ jarugu duurɔ ga emɛ yegeraa wɔin. 7E, sɔɔ bain go yɛnɛjɛi. Inɛ turu kuu womɔ le unruin Kirisito mɔi ga lugaa sɛɛ ye, wo sɔɔ ɔn ajubu womɔ nɛ kunɔ gɛliyɛ: Woi Kirisito mɔi wɔɔ gin’, emɛi kanran Kirisito mɔi. 8Inɛw Baŋa, emɛ bɛrɛ kuu ebe nɛ paŋa obu gɔ dɛi, mu gaila kuu ma unaa gaanaatun kanran, dɔgɔ mu aaun jaanla. Paŋa wogɔ, ei bariyɛmɔ ga emɛ bɛrɛ obin, ei suyo dɛi laa. 9Mu lɛtɛrɛ ma gɔbe le ei liirɛmɔuwɔn ma e ajubu ye ibɛlaun. 10Sabu inɛw sɔwaa, lɛtɛrɛ nɛ sɔɔ womɔ gɔbe ɛɛin wɔɔ, paŋa yasin. Kaa kuu womɔ le wiyaai ye, womaa inɛ yɛbɛlɛginɛi, sɔɔ sɔɔ inɛɛ gɛɛɲu. 11Inɛ kɔɔ gin’ sɔɔnɛ gɔ wo sɔɔ ɔn jugɔ: Wɔlɔ wɔnu lɛtɛrɛ nɛ bana sɔɔ emɛ sɔɔjɛ gin’, wiyaa dɔwaain ye, emɛ wogɔ gin’ tee birɛɲu. 12Narain, inɛw boi ɛju bemɛ be turu sɔɔɲu gamuu le kɛukɛu biyɛ ma, be le emi tunwɔn ma, emɛ kanraannɛ. Be kuu bemɛ gelu le unrunbei tunwɔnɲu. Tunmɔ tunmɔ le unrunbei tunwɔn yɛnɛɲu. Be bomɔgunwin. 13Emɛ kai kuu emɛ unu ye kale gaanu ibɛlain. Ama, e bɛrɛ baa emi dɔɔmaa, birɛ emɛ bɛrɛ wo birɛmu gɔ, emɛ birɛ wogɔ kale gɔ nɛ biyɛdɛin. 14E bɛrɛ baa dɔɔnɛ bɛin ye, emɛ kale gɔ nɛ gaanauwɔin. Kaa, emɛ kale gɔ nɛ gaanauwɔnɛ. Sabu emɛ naran go Kirisito Kibɛru Ɛju gɔ le e bɛrɛ baa dɔwaabɛin. 15Kɔɔ biyaai ye, emɛ, kale biyɛun jaan gɔ nɛ gaananɛ. Emɛ inɛ waja birɛ dɛi kuu emɛ unɔuwɔnɛ. Kaa, gagawu e sɛɛ gɔ bariyaai ye, yalu birɛ biru emɛ logoro ebe nɛ sigɛ le wawanado ga emɛ wogɔ diyɛdɔn yasin. 16Kunrin emɛ gana onu ebe nɛ wɔin gɔbe nɛ Kibɛru Ɛju gɔ taga bɛbɛɛdɛin. Inɛw wajunw minɛ nɛ biraa galin dɛi emɛ kuu emɛ unɔidenɛ. 17Kaa Ama Dɔn nɛ tɔŋaaɲu gin’: “Inɛ aai kanran, kuu womɔ uhunɔdo ye, Inɛw Baŋa kijɛ kanrun dɛi kuu womɔ unɔ.” 18Sabu, inɛ le yabaidɛin gɔ, inɛ kuu womɔ le boi ɛju unrunmɔ sɔɔjɛ gɔi laa. Inɛw Baŋa, boi ɛju womɔ sɔɔjɛ gɔi.

will be added

X\