KƆRƐNTE LƐIYE 1

1Mu Pɔlu, Ama diŋɛ le Kirisito Yesu jaŋu ii tiyaaɲu gɔ, bainɛ Timɔte le lɛtɛrɛ ɔn tɔŋɔuwɔn. Ama inɛw mɔɔnu Kɔrɛnte ana nɛ wɔɔ gɔ lee, Ama inɛw Akayi gana puu nɛ wɔin gɔ lee bɛrɛ tiiuwɔn. 2Ama emɛ Ba lee, Inɛw Baŋa Yesu Kirisito lee, e bɛrɛ nɛɛma lee, jamu lee obo. 3Inɛw Baŋa emɛ Yesu Kirisito Ama gɔ, iyaa wo Ba gɔ, Ba amasɔgɔjugɔ baŋa gɔ, kinɛ kaalu wooi obonɛ Ama gɔ, woi sɔmɔmɔi. 4Wo bɛrɛ goi ye kinɛ kaalu emɛ bɛɛjɛ gɔ le digɛnu, emaa inɛw ɔɲɛ tɔgu dɛin dɛin nɛ toin kinɛ kaaliyɛmu bɛɛ ga, wo ɔɲɛ emɛ puu nɛ kinɛ emɛ kakaaliyɛmɔjɛ. 5Kirisito ɔɲɛ ɔɲu tunkanrin joo bana emɛ bɛɛjɛ gin’, Kirisito le digɛnu emɛ kinɛ kaalu diyɛ yaa bɛbɛɛɲu. 6Emɛ ɔɲɛ nɛ toin ye, ebaa kinɛ kaalu lee, yayabu lee bɛɛ dɛi bii. Emɛ kinɛ kaalu biyaaɲu ye, ebaa ɔɲɛ emɛ muyɔnjɛ tunkanrin tari bɛɛ ga, kinɛ kaalu gɔnrɔn ei oboido bɛɛ dɛi bii. 7Kodigɛu, e sibɛ go diyɛ emɛ dɛinyaan wɔɔ. Sabu, ɔɲɛ emɛ nɛ gamulu bana e bɛɛjɛ gin’, kinɛ kaalu emɛ nɛ yaa gamulu yinbɛɛdei ga, emɛ igii wɔin. 8Ba unrunw, sɔɔ ɔn jugɔlu go e bii ye, emɛ ibɛlain. Rɔmɛ laamu Asi numɔ nɛ ɔɲɛ emɛ bɛi gɔ, demɛniyaan, dɔɔ emɛ dɛi gaa bee. Halu kinrun emɛ wogɔ nɛ ɛliyɛidolo ga emɛ sɛbɛin. 9Emɛ kai, ajubu emɛ nɛ yiun emɛ sɔɔ kɛjaatin ga bɛin. Kaa emaa kuu emɛ gɔnrɔn le gawanɔu, Ama, yiun bulomɔjɛ baŋa gɔ nɛ gagawu emɛ bojo ga kunrin bii. 10Yiun mɔɲu kɔɔ nɛ emi wo yabu, iyaa wo yabado. Ama nimɛ kanran emi yayabado ga, emɛ wo sibɛ go diyɛdɔn wogɔ le wɔin. 11Sabu e yaa, emɛ dɛi Ama e gɛɛnjɛ le emi babaradei. Kunrin, inɛw joo amagɛɛn dɛi duba emɛ bɛɛido gɔ, inɛw joo bɛrɛ emɛ dɛi Amai birɛpoo tagu sɔɔi biyɛdo. 12Kijɛ nɛ kuu unu emɛ bɛɛjɛ gɔ, wogɔ aduna nɛ, iyaa sigɛ le e sibɛ nɛ, emɛ daii, naran Ama bɛrɛ goojɛ gɔ le yoi yaauwɔin ga, kinɛjugɔ emɛ sɛɛrɛ emɛ nɛ goojɛ gɔ woi. Emɛ Adama ii hakilɛ le wogɔ kanrannɛ, kaa Ama nɛɛma le kanrin. 13Sɔɔ jaŋau, paamau e wɔɔ gɔi laa ye, emɛ sɔɔ wajai e bɛrɛ tɔŋɔnɛ. Kanɛ baa gaila paamu kanraan e wɔɔ gin’, Inɛw Baŋa emɛ Yesu bai wɛɛido gɔ, e dɛi kuu emɛ uloido gin’, kuu ebe yaa emɛ dɛi ulodo. Kaa e wogɔ paamu ye dain dɔdɔɔdei ga mu gawaa wɔun. 15Diyɛdɔn wogɔ mu le ɛjii yabe dɛi, mu e bɛrɛ laa yaadɔn ga yegeraabɔn. Ebe nɛ gowaai ye, Maseduanɛ galaai ye, iyaa Maseduanɛ gowaa e bɛrɛ wiyaa ye, ebaa Judea gana yai nɛ mui niinɛ ga bɔun. Kunrin ebaa kubɔ lɛi duba bɛɛ ga bɔun. 17Sɔɔ kɔɔbe waaru mu yeguru le, mu inɛ iŋu sɛlɛi bɔun ma? Maa aduna bɛɛnw kanranjɛ gin’, sɔɔ nɛ «ee» gɛiti ye, yalu turu gɔ nɛ «ai» yaa mu gɛɛjɛ ma? 18Kaa Ama sɔɔ turu baŋai wɔɔ gin’, e bɛrɛ sɔɔ emɛ sɔi nɛ, «ee» lee, «ai» lee biyɛlu. 19Sabu mu lee, Silasu lee, Timɔte lee, logoro ebe nɛ, Ama Aini Yesu Kirisito sɔɔ waaju emɛ kanrun gɔ, wo, «ee» lee, «ai» lee inɛi biyɛlu. Waaru puu womɔ «eei» bee. 20Iyaa, Ama pui gɔbe puu wo le digɛu «eei» biyaain. Wogɔ digɛu, emɛ Ama sɔmɔnu, «amina» gɔ Yesu Kirisito le digɛnu gɛɛɲu. 21Kirisito nɛ, emɛ lee, e lee puui ɛɛin bojonɛ baŋa gɔ, iyaa emi yɛmɛnɛ gɔ, Ama woi. 22Wo, emi womɔi ga, sɛɛrɛ womɔ emɛ nɛ kunaa, kijɛ ɛju emɛ dɛi wo bojaajɛ giru duuni ga, Kikinu womɔ obaa, kinɛ emɛ nɛ daanaabe. 23Ama sɛɛrɛ mai, wo kinɛ ma igii wɔɔ. Mu amasɔgɔ ebe jugaa, Kɔrɛnte wɛɛlun kanrun. 24Emɛ kijɛ e gawaun jaan paŋa le e bɛrɛ gawamɔ ibɛlain, sabu gagawu nɛ e ɛɛn go iŋiyaan wɔi. Kaa ebaa kinɛ ɛɛli bɛɛ ga, emɛ e le bariyaa birɛ birɛuwɔin.

will be added

X\