TIMƆTE PƆLƆ 6

1Jaŋu unrunw gunɔ nɛ toin gɔbe, be baŋabei ɛjii babaun jaain wɔɔ ga be lugomɔ. Inɛ turu kanran Ama boi mɔɲu ma, deeru emɛ sɔɔ mɔɲu ma sɔɔnɔu dɛi, kɔɔ gin’ be kanranmɔ. 2Gunɔw be baŋa gɔbe jaŋu unrunwin wɔin gɔbe, be baŋabe jaŋu unrunw be ba unrunwin dɛi bei gailiyɛmɔu jaanla. Kaa be, be dɛi, sigɛ le ɛjii birɛ birɛun jaain wɔɔ, sabu inɛw birɛ bemɛ niwɛn kayaɲu gɔbe jaŋu unrunw ibɛɛ be wɔi. Kijɛ kɔɔbe bei deere, wogɔbe nɛ bei mainiyɛnmɔ. 3Inɛ, deeru waja, Inɛw Baŋa emɛ Yesu Kirisito naran sɔɔ gɔ lee, Ama giriliyɛ deeru emɛ gɔ lee deeru dɛin wɔɔ inɛ deerejɛ gɔ, 4inɛ kɔɔbaŋa kuu ulo le jowaa wɔɔ. Wo kijɛ kanma inɛɛ. Kaa wo jiiru kunu dadaaru jiun lee, sɔɔ kuu nɛ jai jaiyɛ dadaaru lee le wɔɔ. Kijɛ kɔɔbe inɛwin tunmɔ le ele le bojojɛ, tunmɔ le jijiiremɔjɛ, duyɔ duyɔmɔjɛ, ajubu mɔɲu tunmɔ dɛi ahajubamɔjɛ. 5Bei inɛw kuu sɛnɛi, naran nanaa inin wɔin, jiiru dumɔ sɛlɛ, tiyɛ sɛlɛ kunɔwin. Ajubu bemɛ nɛ, Ama giriliyɛ gɔ le digɛnu, kɛɛlɛ gaai bɛɛmɔjɛ ga wɔin. 6Nɛɛ, inɛ Ama giriliyɛ gɔ dɛi, kijɛ wo sɛɛ gɔ woi baa wɔɔ ga wɔɔ ye, kɔɔbaŋa bɛrɛ Ama giriliyɛ gɔ arusɛgɛ diyɛi. 7Sabu emɛ aduna nɛ wɛɛu, kijɛ turu kanran le wɛɛnɛ, iyaa waaru aduna nɛ emɛ gooido, kijɛ turu kanran le yaaidenɛ. 8Kaa, emɛ kijɛ kayaɲu lee, kijɛ goriyeɲu lee yasin ye, wogɔ emi baamɔ. 9Kaa inɛw arusɛgɛ joo bɛɛ ibɛin gɔbe, bei subɔrɔ nɛ nunumɔjɛ. Be dadaaru tiyɛ sɛlɛ joo nɛ lee, dadaaru mɔɲu joo nɛ lee pɛnrɛn nɛ yoyooɲu. Wogɔbe inɛi ɔgu mamanamɔjɛ, inɛi susuyojɛ. 10Sabu mɔɲu dɛin dɛin bɔlɔduu gɔ, kɛɛlɛ dadaaru gɔ woi. Inɛw gamuu, wogɔ dadaaru ɛjii bei wo aa, gagawu oju gɔ pajaatin. Wogɔ digɛu kinɛjiun diyɛ le wɔin. 11Kaa u, Ama inɛ gɔ, kijɛ kɔɔbe le wagee biyɛ. U teitai lee, Ama giriliyɛ lee, gagawu lee, ihibɛ lee, muyɔn lee, inɛw le ɛjii bii lee dɛnɛ. 12U gɔnrɔn uwɔ wooi le gagawu jobu gɔ jɔbɔ, u kuu uwɔ dɛi ɔnmɔsɔgɔ siyɛ. U gagawu uwɔ aŋa sɛɛrɛ ɛju gɔ, inɛw joo giru nɛ waaru u goi le, ɔnmɔsɔgɔ wogɔ dɛi Ama ui boonaabe. 13Ama kijɛ wooi bɛrɛ ɔnmɔ obonɛ gɔ giru nɛ lee, Kirisito Yesu aŋa sɛɛrɛ ɛju Pɔnse Pilate giru nɛ goonɛ gɔ giru nɛ lee, mu uwaa 14tɔɔru e bɛrɛ obin gɔ gɛliyɛ ga tɔɔrɔuwɔn. Inɛw Baŋa emɛ Yesu Kirisito bai kuu unrunmɔ wo tagaraido baa, u wogɔ sɛɛu jarugu wɔlɔ go gɛliyɛ. 15Waaru wo kɛjɛido gɔ le, Ama Yesui pilemɛ ye wɛwɛɛmɔdo. Ama, duba baŋa gɔ, kijɛ wooi kuu baŋa gɔ wo turu sai. Woi ɔgɔnw wooi Ɔgɔnɛi, inɛw baŋabe wooi Inɛw Baŋai. 16Wo turu sai asuu ɔnmɔi wɔɔ. Wo, wijɛ inɛ turu kanran wogɔ nɛ dɔɔ bɛɛlɛ gɔ nɛ too, inɛ turu kanran woi iyetɛlu, woi iye bɛɛlɛ. Baba lee, gɔnrɔn asuu dogoolɛ gɔ lee womɔi. Amina. 17Aduna ɔn kijɛ nɛ inɛw ɔgɔ unrunwin wɔin gɔbe bemaa kuu ulo le biyɛnɔu wa. Bemaa arusɛgɛ kijɛ sɔgɔjɛi laa dɛi, diyɛ bemɛ arusɛgɛ gɔbe kuu nɛ daananɔu wa. Kaa Ama, emaa kinɛ emɛ ɛɛliyɛmɔ ga, emɛ bɛrɛ kijɛ wooi gaai obojɛ gɔ nɛ diyɛ bemɛ daana wa. 18Bemaa ɛju kanran wa, birɛ ɛju biru nɛ ɔgɔ unrunwin biyɛ wa. Bemaa inɛw bɛrɛ sin kanrun nɛ lee, inɛw wajunw bɛrɛ kijɛ be sɛɛ gamulu nɛ lee, kinɛ ɔgu le biyɛ wa. 19Be kɔɔ gin’, yogo dɛi arusɛgɛ ɛju, bɔlɔtei ɛju nɛ daan gɔi mɔɔnɔuwɔin, iyaa be kɔɔ waaru le ɔnmɔ tɔitɔi gɔ sisiyɛdɛin. 20U Timɔte, kijɛ u bɛrɛ sagu duuraaɲu gɔ ɛjii gɛliyɛ. U, jiiru tiyɛ sɛlɛ, gagawu sɔɔ le sɛgɛrɛɛlɛ gɔbe lee, jiiru, inɛw kakalu le jugɔ sɔɔi gɛɛɲu gɔbe lee nɛ aŋa uwɔ kunɔnɔu. 21Inɛw gamuu kɔɔ gin’, jugɔ sɔɔ wogɔ yasin ga ajubaa, be gagawu oju gɔ nɛ gɛŋiyaan gowaain. Ama nɛɛma gɔ e le biyɛ.

will be added

X\