TIMƆTE PƆLƆ 5

1U inɛ pɛii ganwannɔu. Kaa waaru wo le sɔɔ u sɔɔjɛ, u ba gin’ woi lugo. Sagatara unrunw gɔbe u ba unrunw gin’ lugo. 2Yaanw naw gɔbe u nabe gin’ lugo, iyaa yaanw dagunw gɔbe u saabe gin’, manugu ɛju le bei tinwɛnrɛn. 3Yapanuw tɔitɔi gɔbe baba. 4Kaa yapanunɛ turu, unrunw ma, tirɛ unrunw ma yasɛ ye, gagawu bemɛ gɔ ginrun gonɔ bemɛ nɛ laa be tagaramɔ. Iyaa bei naranw gɔbe sibɛ go kijɛ kanraun jaain be wɔɔ gɔ puu be kanranmɔ. Wogɔ Ama bɛrɛ ɛjii wɔɔ. 5Nɛɛ, yapanunɛ tɔitɔi gɔ, kuu womɔ turu sai wɔɔ gɔ, wo diyɛ womɔ Ama nɛ daanaa sɛɛ. Wo aga lee digɛ lee, Ama womaa unruin bara gɛɛuwɔ, iyaa, wo Ama bɛrɛ gɛɛunwɔ. 6Kaa yapanunɛ yɔgɔrɔ sɔɔ nɛ tee biyɛjɛ gɔ, halu woi ɔnmɔi wɔɔ kanran, kanɛ baa yinwaain. 7Bemaa jarugu le biyɛnɔu ga sɔɔ kɔɔbe bei taga. 8Inɛ wo maranw kai kilɛɛlɛ gɔ, sigɛ le ginrun duu womɔ maranw kai kilɛɛlɛ gɔ, kɔɔbaŋa gagawu oju gɔ pajaati, woi inɛ tubu tolo dɛi mɔɲu. 9Yapanunɛ, anranguju womɔ pɛlukuloi dɔɔlu ye, boi womɔ dɔn nɛ tɔŋɔ kunɔnɔu. Iyaa woi yaanran igɛ kubɔ turu sai ɛyaabei biyɛmɔ. 10Woi yaanran birɛ ɛju womɔ dɛi boi ɛju womɔ gowaa wɔɔi biyɛun jaan. Kunrin woi yaanran unrunw ɛjii kɔwaabe ga, yerunwin ɛjii sɛgɛraabe ga, Ama inɛw kubɔ mɔŋaabe ga, inɛw ɔɲɛ nɛ toin gɔbei baraabe ga, womaa birɛ ɛju tɔgu dɛin dɛin biraabe ga sɛɛrɛ ɛju gɔ inɛw wo dɛi gooun jaain wɔɔ. 11Kaa yapanuw nimɛ pɛɛnɛ gɔbe boi tɔŋɔnɔu. Sabu igɛ ɛi dadaaru bei aa ye, be Kirisito le onu duduloɲu. 12Wo le pui pɔlɔ be kunaabe gɔ yamalatiiɲu dɛi, jarugu le bibiyɛdɛin. 13Iyaa kɔɔ kuu nɛ bariyaa, be wala deyaa, ginrun ginrun nɛ gɔgɔŋɔlɔɲu. Wala gɔ dɛi sigɛ, be mɛrun mɛrɛnwin biyɛɲu. Sɔɔ bei tolo nɛ aŋa kukunɔɲu. Kijɛ sɔɔun dagalu sɔɔnu biyɛɲu. 14Kɔɔ sabu dɛi yapanuw nimɛ pɛɛnɛ gɔbe bemaa igɛ bemɛ ɛɛ ga mu ibɛɛ wɔun. Bemaa unrunw bɛɛ, ginrun bemɛ kajuba, jaŋuw emɛ bɛrɛ, sɔɔ mɔɲu emɛ dɛi yalu sɔɔɲu turu kanran be obomɔnɔu. 15Sabu kanɛ baa gamuu naran oju gɔ pajaatiyaa, Setanu onu nɛ dimiyaain. 16Ama inɛw mɔɔnu womaa, yapanuw tɔitɔi gɔbe kai kilɛ dɛi, yaanran jaŋu ii aai kanran, yapanuw yasɛ ye, Ama inɛw mɔɔnu bɛrɛ dɔɔ duurɔnɔu ga, baŋa kai bemɛ kilɛ. 17Inɛw naw, Ama inɛw mɔɔnu ɛjii teeremɔw gɔbe, tujɔ bemɛ sɔɔrɔ lɛi be le jaain wɔɔ. Sigɛ le inɛw waaju tagu nɛ lee, jaŋu deeru nɛ lee mainiyɛun wɔin gɔbe bɛrɛ kanraun jaain wɔɔ. 18Sabu Ama Dɔn sɔwaa gi: “Naa jiŋu dɛnrɛn kiju namaa ye ii goonɔjɛ aŋa nɛ aŋa pɔin e kunɔu jaanla.” Iyaa gi: “Birɛbirɛnɛ, tujɔ womɔ wo le jaain wɔɔ.” 19Inɛw lɛi ma taanu ma sɛɛrɛ goonw wɔlɔ ye, Ama inɛw mɔɔnu inɛ na turu kanran dɛi jarugu yabanɔu. 20Be logoro nɛ inɛw hakɛ kanranw gɔbe, inɛw wajunw gɔbe bemaa liliyɛ le biyɛ ga, inɛw puu giru nɛ be le sɔɔ. 21Ama lee, Kirisito Yesu lee, mɛlɛnkɛ yɛmaaɲu gɔbe lee giru nɛ u le daii sɔɔuwɔn: Inɛ kabu kunɔlu go, inɛ turu waja dɛi ire bojolu go, u tɔɔru ɔnbe gɛliyɛ. 22U inɛ turu kanran kuu nɛ ɔgu numɔ yaŋurun ye, Ama inɛw mɔɔnu birɛ nɛ woi kunɔ ga kanrannɔu. Inɛw wajunw hakɛ le mɔrinyɛnnɔu. Ui ɛjaai gɛliyɛ. 23U waaru wooi dii saun sai nɔɔnu biyɛnɔu. Kaa bɛrɛ uwɔ sabu dɛi lee, waaru joo jiun ui aajɛ gɔ dɛi lee, u resɛndii ilɛ gaila nɔɔ. 24Inɛw gamuu, hakɛ bemɛ, saliyɛ kiru baa dɔmiyɛindolo, kanɛ baa ɛlu gowaai. Kaa inɛw gamuu hakɛ gɔ dumɔ nɛ ɛlu goodo. 25Kɔɔ gin’ birɛ ɛju gɔbe yaa bain nɛ ihiyemɔdo. Iyaa birɛ nimɛ ɛlu goolu gɔbe yaa jaa baŋi biyɛidenɛ.

will be added

X\