TIMƆTE PƆLƆ 4

1Ama Kikinu daii sɔwaa gi: «Waaru dumɔ gɔbe le, inɛw gamuu gagawu gɔ papajadɛin. Be kikinu kakalumaŋaw sɔɔ yayabadɛin, iyaa jinrunbe deeru onu nɛ didimiyɛndɛin.» 2Be inɛw aŋa lɛilɛigunw lee, inɛw kakalumaŋaw lee bɛrɛ unrunbei liligijiyemɔdɛin. Inɛw, inɛw ligijiyemɔw wogɔbe, kinɛjugɔ bemɛ yanwaan, hakɛ gunɔ nɛ too. 3Inɛw kɔɔbe purupagu lee, kijɛ gamuu kayi lee jaanla ga deereuwɔin. Kaa Ama, inɛw gawaa wɔin, naran jugaa wɔin gɔbe bemaa woi birɛpoo tagaatiyaa ye kunrin kaya gi. Ama, kakayɔn kɔɔbe kɔɔ dɛi boju. 4Ama kijɛ maŋu gɔbe puu ɛjii wɔɔ. Kijɛ jumɔɲu turu kanran wɔlɔ. Kaa Amai birɛpoo tagu le kayaun jaain wɔɔ. 5Sabu Ama sɔɔ gɔ lee, amagɛɛn gɔ lee dɛi kakayɔn gɔ ɛjaa wɔɔ. 6U sɔɔ kɔɔbe, ba unrunw bɛrɛ deeraajɛu ye, ui Kirisito Yesu birɛbirɛnɛ ɛjui bibiyɛdo. Ui gagawu le kɔwaaɲu, u deeru ɛju gɔ sɛɛu dimiyaan wɔu ga jujugɔmɔdo. 7Elumɛ tiyɛ sɛlɛ, gagawu sɔɔ le sɛgɛrɛɛlɛ gɔbe paja. Ama giriliyɛ nɛ bariyɛ bariyɛ yaa ga ɛjii mainiyɛn. 8Gojutere le biyɛ ga maini gɔ niwɛn gaila sɛɛ. Kaa kanɛ lee, waaru wɛɛido gɔ lee dɛi, ɔnmɔ pui emɛ bɛrɛ kunaaɲu dɛi, Ama giriliyɛ gɔ kijɛ wooi nɛ niwɛn yasɛ. 9Sɔɔ kɔɔ sɔɔ narain, iyaa inɛw puu wogɔ le sɛɛu yabaun jaain wɔɔ. 10Emɛ birɛ birɛuwɔin, jaiyɛuwɔin. Sabu emɛ, Ama ɔnmɔi wɔɔ, Ama inɛw wooi Yabanɛ gɔ, sigiyaa inɛw wo le gawauwɔin gɔbe Yabanɛ gɔ le diyɛ emɛ daanaaɲu. 11U sɔɔ kɔɔbe inɛw bɛrɛ taga, wogɔbe le bei deere. 12Inɛ turu kanran bɛrɛ, uwaa ii dagi giye ui gailiyɛmɔnɔu. Kaa u sɔɔ nɛ lee, bana uwɔ nɛ lee, ihibɛ nɛ lee, gagawu nɛ lee, ɛjaai bii nɛ lee, inɛw gawaa wɔin gɔbe wooi giru nɛ ui giretagurui biyɛmɔ. 13Mu wɛɛido baa, u Ama Dɔn inɛw puu giru nɛ jaŋu nɛ lee, inɛwin mainiyɛnmu nɛ lee, deeru deeru nɛ lee ɛjii kuu kunɔ. 14Inɛw, u dɛi Ama bɛrɛ sɔɔ goi be sɔi gɔ le digɛu, waaru inɛw naw kuu uwɔ nɛ numɔ yaŋaraan, Ama gɛɛin gɔ le, Ama uwaa kijɛ kanrun bɛɛ ga, gɔnrɔn u bɛrɛ wo obu gɔ, sin obu wogɔ pajanɔu. 15Inɛw puu giru nɛ u mainiyaan, giru go yaauwɔu ga tagara dɛi, u sɔɔ kɔɔbe kanran. Wogɔ nɛ ɛjii kuu uwɔ obo. 16U kuu bana uwɔ lee, deeru uwɔ gɔ lee ɛjii kajuba. Sɔɔ wogɔbe nɛ ɛjii mainiyɛn. U kunrin kanraunwɔu ye, kuu uwɔ lee, inɛw sɔɔ uwɔ keŋiyɛnw gɔbe lee yaa yayabadou.

will be added

X\