TIMƆTE PƆLƆ 3

1Sɔɔ ɔn narain: Inɛ turu Ama inɛw mɔɔnu kajubanɛi bii ibɛɛ wɔɔ ye, wo birɛ ɛjui daaru. 2Nɛɛ, Ama inɛw mɔɔnu kajubanɛ, inɛ jarugu wo le wɔlɔi wo biyɛun jaain wɔɔ. Woi yaanran turu igɛi, inɛ hakilɛ dɛinyaan wɔɔ, kuu kajubu le wɔɔ, inɛ sɔɔ sɛlɛ, ginrun sugo obonɛ, inɛ deeru deeru bɛɛjɛi biyɛun jaan. 3Woi kɔɲɔnɔɔnɛi ma, inɛ koloi ma biyɛun jaanla. Kaa inɛ kaalu, jai jaiyɛɛlɛ, kɛɛlɛ dɛnɛnɛi laai wo biyɛmɔ. 4Ginrun duu womɔ inɛ kajubaa sɛɛ, inɛ unrunw womɔ baba le sɔɔ womɔ yabawin biyɛmɔ. 5Sabu inɛ ginrun duu unrunmɔ bana gɛliyɛɲu inɛɛ gɔ, kɔɔ baŋa yani Ama inɛw mɔɔnu gɔi gɛli bɛɛdo? 6Ama inɛw mɔɔnu kajubanɛ, inɛ tubu kanai biyɛmɔnɔu. Kɔɔi laa ye, inɛ wogɔ tunmɔ kuu ulo le joo ye bii ye, Ama bana jinrun puu kuu baŋa nɛ jarugu wo duuru gin’, kuu womɔ nɛ yaa jarugu duduurɔdɛin. 7Boi womɔ yanwannɔu ga, iyaa jinrun puu kuu baŋa woi pɛnrɛn unrunmɔ nɛ aanɔu ga, Ama inɛw mɔɔnu kajubanɛ, inɛw jaŋu unrunwin laain gɔbe giru nɛ boi ɛju siyɛun jaain wɔɔ. 8Ama inɛw mɔɔnu kajubanw baranw gɔbe kanran, inɛw jige ɛjui sɛin biyɛun jaain wɔɔ. Bei inɛw aŋa lɛilɛi wɔin ma, inɛw kɔɲɔ gunɔ nɛ toin ma, inɛw nabara le kijɛ dɛnɛwin ma biyɛun jaanla. 9Be kinɛjugɔ jarugu sɛlɛ le gagawu sɔɔ boŋurun jugɔmaaɲu gɔ gɛliyɛun jaain wɔɔ. 10Bei yaa suburu yɛnɛu jaain wɔɔ. Kijɛ dagalu turu kanran be le tɛmɛmɔlu ye, kɔɔ onu nɛ birɛ gɔ nɛ bei kunɔ. 11Iyaa kɔɔ gin’ yaanw bemɛ kanran, yaanw jige ɛju sɛin biyɛun jaain wɔɔ. Inɛw wajunw sɔɔ mɔɲu sɔɔwin biyɛun jaanla. Kaa yaanw hakilɛ dɛinyaan, kijɛ wooi nɛ be le gawu bɛbɛɛmɔjɛ biyɛmɔ. 12Ama inɛw mɔɔnu kajubanw baranw gɔbe, yaanran turu igɛi be biyɛmɔ. Unrunw bemɛ lee, ginrun duu bemɛ lee inɛw ɛjii kajubawin be biyɛmɔ. 13Inɛw Ama inɛw mɔɔnu birɛ ɛjii birɛnw gɔbe, baba bɛbɛɛdɛin. Iyaa, Kirisito Yesu nɛ bɔɔi bii emɛ le digɛu gagawu emɛ sɛɛ sɔɔ gɔ, be liliyɛ turu kanran wɔlɔ go, wogɔ sɔɔ sɔɔ bɛbɛɛɲu. 14Mu lɛtɛrɛ ɔn u bɛrɛ tɔŋaa tiiuwɔn. Kaa u bɛrɛ bɛrii wɛwɛɛdɔn diyɛdɔn le wɔun. 15Nɛɛ, mu u bɛrɛ wiyaa bɛɛlun ye, lɛtɛrɛ ɔn, bana Yesu jaŋu unrunwin emɛ biyɛido u bɛrɛ tatagarado. Emi Ama ginrun gonɔ maranwin, wogɔ Ama asuu ɔnmɔi wɔɔ gɔ inɛw mɔɔnui. Wogɔ tiyɛ gɔ, naran Ama bɛrɛ goojɛ jɛin gɔ lee, bɔlɔtei gɔ lee woi. 16Gagawu emɛ sɔɔ boŋurun jugɔmaaɲu gɔ gaai wɔɔ. Inɛ turu kanran wogɔ le jiiru bɛɛidolo. Ama, inɛ taŋaa, unruin tagaraabe. Kikinu Pilu woi teitai wɔɔ ga jugɔmaabe, mɛlɛnkɛbe woi iyaabɛin. Tɔgube logoro nɛ waaju womɔ kunaaɲu. Aduna nɛ wo le gawaabɛin, woi alagala nɛ unaatin.

will be added

X\