TIMƆTE PƆLƆ 2

1Laa gɔ, inɛw puu dɛi amagɛɛn lee, Ama bɛrɛ gɛɛn kunu lee, kai Ama bɛrɛ tagu lee, Amai birɛpoo tagu lee nɛ, inɛw bemaa biyɛ ga mu ui tinwɛnrɛunwɔn. 2Kunrin, emaa jamu lee, iyaa, diyɛ daanaa ye, Ama giri liyɛ nɛ lee, bana jaan gin’ sɔɔ wooi nɛ ɛjii biyɛ ga, ɔgɔnw lee, paŋagunw gɔbe puu lee dɛi Ama bɛrɛ gɛɛn ga, mu tinwinrun obouwɔn. 3Wogɔ kanran ga Ama emi Yabanɛ gɔ bɛrɛ ɛjii wɔɔ, kinɛ womɔ aauwɔ. 4Wo inɛw puu wa yayabu bɛɛ ga, bemaa naran gɔ jugɔ ga ibɛɛ wɔɔ. 5Sabu Ama koturu sai yɔɔ, iyaa Ama lee, inɛw lee logoro nɛ sɔɔ yegerenɛ koturu sai yɔɔ. Wogɔ, inɛ Kirisito Yesu gɔ woi. 6Wo inɛw wooi dɔrugɔ ga kuu unrunmɔ obaabe. Kunrin wo, Ama, inɛw wooi wa yayabu bɛɛ ga ibɛɛ wɔɔ sɛɛrɛ gɔ, waaru jaan gɔ le tagaraabe. 7Wogɔ sabu dɛi mui waaju taganɛ lee, Yesu jaŋu ii tiyaaɲu lee biyɛ ga bojaaɲu. Mui inɛw Yahutunw tɔgui laain gɔbe dɛi, gagawu lee naran lee jaŋudeerenɛi bojaaɲu. Mu narain sɔɔjɔn, kakalui maŋaalɔn. 8Kunrin iyaa, mu anranw bemaa kinɛ ɛjaai le numɔ daa go dɛɛraa ye, kinɛbanrun siyɛlu go, jiiru wɔlɔ go, yalu wooi nɛ Ama gɛɛn ga ibɛɛ wɔun. 9Kɔɔ gin’ yaanw kanran, sɔi be le dagaa wɔɔ goriyaa ye, baba lee, kuu sunugu lee le bii ye, kuu ɛru sigɛ le ma, kange le ma, dugɔi le ma, sɔi dɔnrun gaa ɛju le ma, saŋa saŋi ye biyɛnɔu. 10Kaa yaanw Ama birɛ nɛ toin bana le kɛukɛu, birɛ ɛju be birɛmɔ. 11Yaanran, deeru wo bɛrɛ deereɲu gɔ, sɔɔ sɔɔlu go, sɔɔ sɛɛu yabaa ye dee. 12Mu yaanran womaa deeru deere ma, anranw kuu nɛ paŋa le biyɛ ma ga yabaalɔn. Kaa wo kelemu biyɛun jaain wɔɔ. 13Sabu Adama laa maŋaabɛin, kɔɔ onu nɛ Hawai maŋaabɛin. 14Iyaa inɛ dɔburu yabu gɔ Adamai laa, kaa yaanran gɔi dɔburu yabaa, Ama sɔɔ gɔ le yabalu kanrun. 15Kɔɔ wooi logoro nɛ, yaanran, gagawu nɛ lee, ihibɛ nɛ lee, ɛjaai bii nɛ lee, kuu sunugu nɛ lee, dumɔ gɔ baa biyaajɛ ye, ii nɔrun dɛi woi yayabadɛin.

will be added

X\