TIMƆTE PƆLƆ 1

1Mu Pɔlu, Ama emi Yabanɛ gɔ lee, Kirisito Yesu, diyɛdɔn emɛi wɔɔ gɔ lee, tɔɔru mu bɛrɛ be obu gɔ le kɛukɛu, Kirisito Yesu jaŋu ii tiyaaɲui biyaa wɔɔ gɔ, 2mu, u Timɔte, gagawu nɛ ii ma tɔitɔi gɔ, lɛtɛrɛ ɔn u bɛrɛ tiiuwɔn. Ba Ama lee, Kirisito Yesu, Inɛw Baŋa emɛ lee, nɛɛma lee, amasɔgɔjugɔ lee, jamu lee ui obo. 3Bana waaru Maseduanɛ gana yaa ga oju mu goi le u bɛrɛ mu tɔɔraabe gin’, mu uwaa Epɛse ana nɛ biyɛ ga ibɛɛ wɔun. Inɛw gamuu Epɛse ana nɛ yatoin. Be deeru kakalugu gɔ inɛwin deereuwɔin. Kɔɔ dɛi, mu uwaa Epɛse nɛ bii ye, inɛw kɔɔbei tɛŋɛ ga ibɛɛ wɔun. 4Bei taga, bemaa elumɛ sɔɔ nɛ lee, tirɛ anranw boi digu le digu le, buu, dumɔ sɛlɛ boonu nɛ lee, waaru bemɛ yamalanu biyɛnɔu wa. Sɔɔ kɔɔbe jiiru koolo koolo sai ihingelemɔɲu. Kaa wogɔ, Ama, emɛ dɛi yayabu sɔɔ yegeraa sɛɛ gɔ nɛ giru go emi yaamɔɔlɛ. Yayabu sɔɔ wogɔ emɛ gagawu le jujugɔdɛin. 5Emaa kinɛ hakɛ tolo nɛ lee, kinɛjugɔ jarugu sɛlɛ nɛ lee, gagawu tɔitɔi nɛ lee, ihibɛ goojɛ gɔ le tunmɔi ibɛɛ biyɛ ga, tɔɔru ma kijɛ dɛi mu daanu gɔ kɔɔ woi. 6Inɛw gamuu sɔɔ kɔɔbe le onu dulaatiyaa, be jiiru koolo koolo nɛ manaa toin. 7Be Ama tɔɔru deeru deerewin bii dɛnɛɲu, kaa be kuu bemɛ le sɔɔ be sɔɔjɛ inin, iyaa kijɛ dɛi ɛjii namaa gɛliyaa be sɔɔjɛ gɔ yaa paamau wɔnɛ. 8Nɛɛ Ama tɔɔru gɔ, bana kanraun jaan le kɛukɛu dimiyaanɲu ye, Tɔɔru ɛjui ga emɛ puu igii wɔin. 9Kɔɔ gin’, emɛ sɔɔ ɔn ɛjii paamu kanraun jaain wɔɔ: Tɔɔru kai, inɛ teitai wɔɔ dɛi daananɛ, kaa inɛw kɔkɔlɔmaagunw dɛi lee, inɛw sɔɔ yabaanɛ gɔbe dɛi lee, inɛw Ama babaanɛ gɔbe dɛi lee, inɛw hakɛ kanranw gɔbe dɛi lee, inɛw Ama lee, kijɛ ɛjaa wɔɔ wooi lee babaanɛ gɔbe dɛi lee, inɛw be babe lee, be nabe lee daanw gɔbe dɛi lee, inɛw inɛw daanw gɔbe dɛi lee, 10inɛw salagunw gɔbe dɛi lee, anranw anranw be tunmɔ le diinw gɔbe dɛi lee, inɛw gunɔw dɔnrɔnw gɔbe dɛi lee, inɛw kakalumaŋaw gɔbe dɛi lee, sɛɛrɛ kakalu goonw gɔbe dɛi lee, maa inɛ aai kanran deeru nanaa dimiyɛun jaan gin’ inɛ kanraanlɛ gɔ dɛi lee, tɔɔru gɔ daanaaɲu. 11Deeru nanaa ɔn, Ama mu bɛrɛ Kibɛru Ɛju taga ga tɔɔraabe gɔ le sɛgɛrɛuwɔ. Wogɔ, Ama, duba lee dooro lee baŋa gɔ bɛrɛ gowaa wɛɛ. 12Mu inɛ birɛ womɔ dɛi mui paŋa obonɛ gɔ, Kirisito Yesu, Inɛw Baŋa emɛ gɔi birɛpoo tagauwɔn. Mu pɔɔlɔ inɛ Yesu boi yamalanɛi bee gɔ, jaŋu unrunw womɔ tɔɔɲɔnɛi bee gɔ, inɛ gaari bee gɔ, mui inɛ le gawaɲui ga lugaa, birɛ womɔ gɔ dɛi mui wo yɛmu gɔ dɛi, mu woi birɛpoo tagauwɔn. Kaa Ama amasɔgɔ ma jugaabe, sabu mu jugɔlu go, gagawu sɛlɛ dɛi kanraunbɔn. 14Kaa nɛɛma Inɛw Baŋa nɛ goojɛ gɔ mu sibɛ go gaai narinyaan, gagawu lee, ihibɛ lee, Kirisito Yesu nɛ bɛɛmɔjɛ gɔ mu bɛrɛ jɛɛlaabe. 15Sɔɔ ɔn sɔɔ narain, inɛw puu wogɔ le kinɛpilu le yabaun jaain wɔɔ. Kirisito Yesu, aduna nɛ hakɛ kanranwin yabai wɛi. Logoro bemɛ nɛ hakɛ kanrannɛ yɛmu gɔ mui. 16Kaa Ama, amasɔgɔ ma jugaabe. Kunrin, Kirisito Yesu, muyɔn kibaai womɔ tagara ga wo mui hakɛ kanranw logoro nɛ diyɛnɛ gɔ, mu bɛrɛ laa muyɔn womɔ tagaraabe. Wogɔ le digɛnu maa inɛw ɔnmɔsɔgɔ dɛi wo le gawaidɛin gɔbe puu dɛi sɛɛrɛ gin’ biyɛ ga, Ama yabaabe. 17Asuu Ɔgɔnɛ, asuu ɔnmɔi wɔɔ gɔ, giri le iyemɔɔlɛ gɔ, Ama wo turu gɔ, baba lee, boi sɔmu lee, asuu nasuu womɔi biyɛmɔ. Amina. 18Ii ma Timɔte, waaru galaai gɔ le, inɛw, u dɛi Ama bɛrɛ sɔɔ goi be sɔi gɔbe le kɛukɛu, tinwinrun ɔn ui obouwɔn. Sɔɔ u dɛi sɔin gɔbe ɛjii aa gɛliyaa ye, wogɔ le digɛnu kɔmɔ tai ɛju gɔ taa. 19Gagawu gɔ lee, kinɛjugɔ jarugu sɛlɛ lee le biyɛ. Inɛw gamuu kinɛjugɔ jarugu sɛlɛ le bii gɔi pajaatin dɛi, be gagawu sibɛ go dii nɛ piriyaain. 20Inɛw kunrin kanranw gɔbe logoro nɛ Himɛnɛ lee, Alɛsandere lee yatoin. Bemaa Ama boi yamulu ɛjula jugɔ ga, mu bei Setanu numɔ nɛ kunaabɔn.

will be added

X\