TESALONIKE PƆLƆ 5

1Ba unrunw, sɔɔ kɔɔbe biyɛidɛin bai gɔ ma, waaru gɔ ma dɛi e bɛrɛ tɔŋu tii ga e kai sɛlɛi. 2Sabu, Inɛw Baŋa bai wɛɛido gɔ, gugunyɔnnɛ digɛ bana wɛɛjɛ gin’ wɛɛdo ga e ɛjii igii wɔi. 3Inɛw waaru «Jamui, alupɛi» be gɛɛjɛ gɔ le, kɔɔ waaru le, yaanran bana nɔrun dɛinyɛnjɛ gin’, yanwan diyɛ gɔ kubɔ turu kuu bemɛ nɛ susugodo. Inɛw, wogɔ nɛ ɛli goi bɛɛidenɛ. 4Kaa e kai, ba unrunw, e ɔlɔ nɛ toloi. Kɔɔ gin’ Inɛw Baŋa bai gɔ gugunyɔnnɛ gin’ ei dɛbɛidolo. 5E puu, ei wijɛ inɛwin, aga inɛwin. Emi digɛ ma, ɔlɔ ma inɛwin laa. 6Kɔɔ sabu dɛi, emɛ inɛw wajunw gin’ kikinu sibɛ go giri emɛ yeiyeun jaanla. Kaa emɛ giri yeiyelu go, kuu emɛ ɛjii gɛli ye biyɛun jaain wɔɔ. 7Giri waaru yeiyeɲu gɔ digɛi, iyaa kɔɲɔ le bimili ye biyɛɲu gɔ digɛi. 8Kaa emi aga mɔi, iyaa kuu emɛ ɛjii emɛ gɛliyɛun jaain wɔɔ. Gagawu lee, ihibɛ lee, inrun arugoi gin’ emɛ goriyeun jaain wɔɔ. Iyaa yayabu diyɛdɔn emɛ gɔ, inrun goro gin’ emɛ goriyeun jaain wɔɔ. 9Ama, wo emaa kinɛbanrun unrunmɔ gɔ iye ga emi yɛmɛlu. Kaa Inɛw Baŋa emɛ Yesu Kirisito le digɛnu emaa yayabu gɔ bɛɛ ga emi yɛmaabe. 10Sabu waaru Kirisito wɛɛido le, emɛ ɔnmɔi wɔin ma, yinwaain ma, wo emaa wo le ɔnmɔi biyɛ ga, emɛ dɛi yinwun. 11Kunrin bana kanraun e wɔɔ gin’, e tunmɔi mainiyɛnmɔi, tunmɔ paŋa bariyɛmɔi. 12Ba unrunw, emɛ e bɛrɛ gɛɛunwɔin, inɛw logoro ebe nɛ Ama birɛbirɛnw gɔbe, Inɛw Baŋa oju nɛ ei teeremɔw gɔbe, ei deerenw gɔbe, e bei babai. 13Birɛ be birɛjɛ sabu dɛi e bei ɛjii babai, bei saii ibɛɛ biyɛi. E tunmɔ le jamu le biyɛi. 14Ba unrunw, emɛ e bɛrɛ ɛjii gɛɛunwɔin, inɛw walagunw gɔbei tinwɛnrɛin, inɛw liliyɛgunw gɔbe diyɛ dɛinyɛnmɔi, inɛw yɛbɛlɛgunw gɔbei barai. Inɛw wooi le muyɔn le biyɛi. 15Inɛ turu kanran mɔɲu, mɔɲu le tujɔmɔnɔu ga kuu kajubu le biyɛi. Kaa waaru wooi, tunmɔ bɛrɛ lee, inɛw wooi bɛrɛ lee ɛju kanran ga mainiyɛin. 16E waaru wooi kinɛ ɛɛlu le biyɛi. 17E waaru wooi Ama gɛɛin. 18Kijɛ wooi nɛ Amai birɛpoo tagai. Sabu Kirisito Yesu nɛ, Ama kijɛ e nɛ wo ibɛ gɔ kɔɔ woi. 19E Ama Kikinu birɛ gɔ tɛŋɛnɔugi. 20Inɛw Ama titiyaanw sɔɔ gɔbe yau kanrannɔugi. 21Kaa kijɛ puu ɛjii marun yɛnɛi: Kijɛ ɛju gɔbe gɛliyɛi, 22kijɛ mɔɲu puu dɛi kuu ebe gɛliyɛi. 23Ama, jamu obonɛ gɔ, ei kijɛ puu nɛ womɔi dɛiin biyɛmɔ. Iyaa kikinu ebe lee, kinrun ebe lee, goju ebe lee, bana ebe wooi nɛ, Inɛw Baŋa emɛ Yesu Kirisito wɛɛido baa, Ama ei lelu wooi nɛ paaba. 24Ama, ei boonɔnɛ gɔ, wogɔ kakanrando, sabu wo sɔɔ turu baŋai. 25Ba unrunw, e emɛ dɛi kanran Ama gɛɛin. 26Ba unrunw gɔbe wooi, Ama inɛw gin’ ihibɛ le poonɔi. 27Mu Inɛw Baŋa boi le ei tɔɔrɔuwɔn, ba unrunw gɔbe wooi bɛrɛ lɛtɛrɛ ɔn jaŋai. 28Inɛw Baŋa emɛ Yesu Kirisito nɛɛma gɔ e le biyɛ.

will be added

X\