TESALONIKE PƆLƆ 4

1Kɔɔ wooi onu nɛ, ba unrunw, e yoiyaara ebe bana Ama kinɛ aaido gɔ emɛ le deyaabei. Narain, e kanɛ baa bana kanraun e wɔɔ gɔ kɔɔ woi. Iyaa kanɛ ebaa wogɔ dɛi sigɛ kanran ga, emɛ Inɛw Baŋa Yesu boi le e bɛrɛ gɛɛunwɔin, emɛ gimaa e bɛrɛ gɛɛunwɔin. 2Inɛw Baŋa Yesu, emɛ bɛrɛ tɔɔru obaa ei obo gi gɔbe, e wogɔ igii wɔi. 3Ama kijɛ ibɛ gɔ unwɔ: Wo ebaa unrun dɛi dɛiin biyɛ, iyaa sala sɔɔ turu nɛ kanran yoonɔu ga ibɛɛ wɔɔ. 4Inɛw Ama inin gɔbe, dadaaru mɔɲu le bana be kanranjɛ gin’ laa, kaa Ama kinɛ bana aajɛ gin’, iyaa, inɛw bɛrɛ bana baba sɛɛ gin’, inɛ tuturu yaanran womɔ le ɛjii biyɛ. 6Inɛ turu kanran, yaanw sɔɔ kɔɔ dɛi wo bɔɔnɛ bɛrɛ mɔɲu kanran ma, woi jama ma kanrannɔu. Inɛw Baŋa, inɛw kɔɔ gin’ kanranw gɔbei lalagado ga emɛ laa e bɛrɛ sɔwaabɛin, ei daii tagaaginaabɛin. 7Sabu Ama, sala dɛi emi boonɔlu, kaa emaa dɛiin, womɔi biyɛ ga wo emi boonaabe. 8Kɔɔ sabu dɛi inɛ deeru kɔɔbe le yabalu gɔ, wo inɛ le yabalu kanranlu, kaa Ama, Kikinu Pilu womɔ ei obonɛ gɔ le yabalu kanrun. 9Ba unrunw gagawu nɛ e bɔɔnw gɔbe ibɛɛ bii sibɛ go e bɛrɛ dɔn tɔŋu ye tiinu doori. Sabu Ama ebaa tunmɔi ibɛɛ biyɛ ga ei deeraabe. 10Iyaa e ba unrunw Maseduanɛ gana puu nɛ wɔin gɔbe wooi, e bei yaa ibɛɛ wɔi. Kaa emɛ e bɛrɛ gɛɛunwɔin, ba unrunw, e nimɛ kanran wogɔ dɛi sigɛ kanrain. 11Bana ebaa kanran ga laa baa emɛ tɔɔru gin’, e maini ye jamu le biyɛi, inɛw wajunw sɔɔ nɛ yoonɔugi, kuu ebe le birɛ birɛi. 12Kɔɔ gin’, inɛw Yesu le gawaa wɔnɛ gɔbe, ei bababadɛin. Iyaa inɛ turu kanran bɛrɛ ei dɔɔi biyɛidolo. 13Ba unrunw, inɛw Ama le bii diyɛdɔn sɛnɛ gɔbe aŋai kinɛ jiun le biyɛɲu gin’ ebaa biyɛnɔu ga, inɛw yinwaan wɔin gɔbe sibɛ go ebaa naran gɔ jugɔ ga emɛ ibɛɛ wɔin. 14Sabu emɛ Yesu yinwaan bulaai ga gawaa wɔin. Inɛw Yesu le gawaa wɔu yinwin gɔbe kanran, Ama bei Yesu le bubulugodo ga emɛ gawaa wɔin. 15Sɔɔ e bɛrɛ sɔɔi emɛ do ɔn Inɛw Baŋa deeraabe. Inɛw Baŋa bai wɛɛido, emɛ inɛw ɔnmɔi wɔin gɔbe, inɛw yinwaan diin gɔbe giru nɛ galaidenɛ. 16Sabu, Ama mii diyɛ tɔɔru obu lee, mɛlɛnkɛbe puu kuu baŋa mii lee, Ama kaan mii gɔ lee waaru ɛgɛmaajɛ, Inɛw Baŋa, kuu womɔ le alagala goo ye susugodo. Inɛw Kirisito le gawaa wɔu yinwɛnw gɔbe laa bubulodɛin. 17Kɔɔ onu nɛ emɛ inɛw ɔnmɔi wajaain gɔbe, emɛ be le bari ye daa go anrankulumɔ nɛ Inɛw Baŋai sɛgɛrɛ ga emi uhunɔdɛin. Kunrin emɛ asuu Inɛw Baŋa le bibiyɛdɛin. 18E sɔɔ kɔɔbe le tunmɔ kinɛ kaaliyɛmɔi.

will be added

X\