TESALONIKE PƆLƆ 3

1Nɛɛ kunrin, emɛ ei iyelu go bii gɔ muyaan bɛɛnɛ kanraan, emɛ sai Atɛnɛ ana nɛ biyɛ ga yabaa, 2Timɔte, emɛ bainɛ, Kirisito Kibɛru Ɛju tagu Ama birɛ gɔ nɛ emɛ bɔɔnɛ gɔ, e bɛrɛ tiyaabɛin. Logoro ebe nɛ tɔɔɲɔ diyɛ e bɛrɛ dɔɔuwɔ gɔ dɛi inɛ turu kanran kinɛ yanwannɔu dɛi, womaa ei tibemɔ ga, gagawu ebe nɛ womaa ei mainiyɛnmɔ ga, emɛ woi e bɛrɛ tiyaabɛin. E kuu ebe le igii wɔi, tɔɔɲɔ kɔɔbe tunmɔ emɛ bɛrɛ sɔɔ dɔdɔɔdo ga kɛjaa sɛbɛin gɔbei. 4Kunrin waaru e le emɛ bee le, emɛ, ɔɲɛ emɛ bɛrɛ dɔdɔɔdo ga e bɛrɛ tagaaginaabɛin. E igii wɔi, kijɛ wogɔi biyaabe. 5Kɔɔ sabu dɛi mu ei iyelu go bii gɔ muyaan bɛɛlu kanraan, gagawu ebe bana wɔɔ jugɔ ga, Timɔte e bɛrɛ tiyaabɔn. Setanu, inɛi subɔrɔnɛ gɔ ei susubɔrɔdo ma ga liyaabɔn. Iyaa wogɔ le digɛnu birɛ emɛ, birɛ niwɛn sɛlɛi biyɛnɔu ga mu liyaaun. 6Kaa kanɛ Timɔte e bɛrɛ gowaa wiyaai. Wo gagawu ebe dɛi lee, ihibɛ ebe dɛi lee kibɛru ɛju jɛɛlaabe. Ebaa iye bai dɔɔ waaru wooi ihibɛ le emi ajubauwɔi gi, iyaa bana ei iye ga ɛjii daariyaa emɛ wɔɔ gin’, e ɛjii emi iyi dadaaru le wɔi ga emɛ bɛrɛ tagaabe. 7Kɔɔ sabu dɛi, ɔɲɛ emɛ nɛ lee, tɔɔɲɔ emɛ nɛ lee, ba unrunw, emɛ e dɛi kinɛ emɛ kaaliyaai. Kijɛ kinɛ emɛ kaaliyɛmu gɔ, wogɔ gagawu ebei. 8E Inɛw Baŋa nɛ ɛjii kinɛ daanu le wɔi dɛi, emɛ naran go kanɛ ɔnmɔi wɔin. 9Kanɛ emɛ e dɛi Amai birɛpoo ɛjii tagu bɛbɛɛdɛin. Emɛ e dɛi giru womɔ nɛ kinɛ ɛɛlu emɛ sɛɛ gɔ puu dɛi woi birɛpoo tagauwɔin. 10Emaa kuu emɛ le ei pilemu ye iye bɛɛ ga, iyaa gagawu ebe sibɛ go kijɛ dɔɔlu gɔ kibemɔ ga, aga lee digɛ lee, emɛ Ama bɛrɛ ɛjii gɛɛunwɔin. 11Ama, wo emɛ Ba gɔ lee, Inɛw Baŋa emɛ Yesu lee, emaa ei yɛnɛi yai bɛɛ ga, oju gɔ be yegeremɔ. 12Nɛɛ e kai, bana ei emɛ ibɛ gin’, tunmɔ ibɛɛ bii gɔ nɛ lee, inɛw puu ibɛɛ bii gɔ nɛ lee, Ama ei gabiyɛmɔnu, giru jɛyaa. 13Kunrin Inɛw Baŋa emɛ Yesu, inɛw womɔi wɔin gɔbe wooi le waaru wo wɛɛido, wo ei gɔnrɔn ohobodo, iyaa emɛ Ba Ama giru nɛ, wo bɛrɛ kuu ebe obu sibɛ go ei jarugusɛlɛ le biyɛmɔdo.

will be added

X\