TESALONIKE PƆLƆ 2

1Ba unrunw, e bɛrɛ emɛ wɛɛ gɔ sɔɔ tiyɛ sɛlɛi biyɛlu ga e kuu ebe le igii wɔi. 2Tesalonike ana nɛ, e bɛrɛ emɛ wɛɛmɔ nɛ, bana Pilipi ana nɛ inɛw emi be ɔɲɔmu gɔ lee, emi be duyi gɔ lee, e wogɔ igii wɔi. Halu jai diyɛ yabe kanran, e bɛrɛ Kibɛru Ɛju wo bɛrɛ goojɛ gɔ taga ga, Ama emɛ gɔ emi anrangaju obaabe. 3Sabu waaju emɛ gɔ nɛ lelemu sɔɔ tolo, ajubu lɔguju tolo, iyaa nabara sɔɔ yaa tolo. 4Kaa Ama bana ibɛ gin’ emɛ sɔɔuwɔin. Sabu Ama Kibɛru Ɛju sɔɔ taga ga emɛ le jaain wɔɔ dɛi, wo wogɔ sagu emɛ bɛrɛ gawaraabe. Emɛ, inɛ kinɛ aamɔ ga dɛnɛɛnɛ, kaa Ama kinɛ aamɔ ibɛɛ wɔin. Wo kinɛ emɛ lubo lubo yɛnɛuwɔ. 5E igii wɔi, emɛ sɔmu ma, sɔɔ emɛ sɔi nɛ kɛɛlɛ dɛnu dadaaru baŋaran ma, emɛ kanrannɛ. Wogɔ nɛ, Ama wo sɛɛrɛ emɛi. 6Halu, emi Kirisito jaŋu unrunw tiyaaɲui dɛi, paŋa emɛ e bɛrɛ dɔɔnu bɛbɛɛbɛin kanran, emɛ inɛw emi sɔmɔ ga dɛnɛnɛ. E ma, inɛw leebe ma, emi sɔmɔ ga emɛ dɛnɛnɛ. Kaa waaru logoro ebe nɛ emɛ tobe le, bana nanɛ unrunw womɔ ɛjii kajubajɛ gin’, emɛ e le tɛgɛ sɛlɛ le biyaabɛin. 8Emɛ ei saii ibɛɛ bɛin dɛi, ei kinɛ emɛ nɛ paa wɔin dɛi, emɛ Kibɛru Ɛju Ama bɛrɛ goi gɔ e bɛrɛ obu ibɛɛ bɛin sai laa, kaa iyaa kinrun emɛ kanran obu ibɛɛ bɛin. 9Ba unrunw, e naran go ɔɲɛ emɛ lee, birɛ kirɛ emɛ iyi gɔ lee naŋali. Waaru Kibɛru Ɛju Ama bɛrɛ goi gɔ e bɛrɛ emɛ tagau bee le, emɛ inɛ turu kanran bɛrɛ, logoro ebe nɛ dɔɔi biyɛnɔu ga, aga lee digɛ lee birɛ biraabɛin. 10E inɛw gawaa wɔin gɔbe logoro nɛ bana emɛ bee gɔ Ama kinɛ aa bee, teitai bee, lelu turu kanran tobele. E lee, Ama lee sɛɛrɛ goonw emɛi. 11E igii wɔi, banɛ aŋai unrunw womɔ le kanranjɛ gin’, emɛ e tuturu bɛrɛ kunrin kanraanbɛin. 12Emɛ ei mainiyɛnmaa, diyɛ ebe dɛinyɛnmaabɛin. Iyaa Ama ebaa, diinɛ unrunmɔ nɛ lee, dooro unrunmɔ nɛ lee yoo ga ei boonɔnɛ gɔ, kinɛ womɔ bana aajɛ gin’ kunrin yoi yaa ga, emɛ e bɛrɛ tɔɔraabɛin. 13Amai waaru wooi kijɛ dɛi birɛpoo emɛ tagajɛ waja kanran yɔɔ. Waaru Ama sɔɔ e bɛrɛ emɛ tagu le, e keŋiyaan, wogɔ le yabaabei. E wogɔ inɛ sɔɔi gin’ lugoli, kaa Ama sɔɔi ga lugaabei. Wogɔ Ama sɔɔi gɔ yaa narain. Sabu Ama, e inɛw gawaa wɔin gɔbe nɛ birɛ birɛuwɔ. 14Ba unrunw, Ama inɛw mɔɔnu Kirisito Yesu nɛ toin, Judea gana nɛ wɔin gɔbe bɛrɛ kijɛ dɔi gɔ e bɛrɛ kanran dɔwaabe. Yahutunw bana inɛw kɔɔbei ɔɲɔmi gin’, e ba unrunw gɔbe ɔɲɛ tutunmɔ wogɔ e bɛrɛ dɔɔmaabɛin. 15Yahutunw, Inɛw Baŋa Yesu lee, inɛw Ama titiyaanw gɔbe lee daabɛin. Be emi ɛjii ɔɲɔmaabɛin, be Ama kinɛ ɛjii banranmɔuwɔin, bei inɛw puu jaŋuwin. 16Be iyaa, inɛw Yahutunw tɔgui laain gɔbe bɛrɛ emaa waaju be bɛrɛ yayabu obojɛ gɔi taganɔu ga, be emi tɛŋɛ ga mainiyɛunwɔin. Be kɔɔ gin’ hakɛ mɔɔnu waaru wooi be kanrun gɔbe kibemɔuwɔin. Kaa nɛɛ dumɔ gɔ, Ama kinɛbanrun gɔ kuu bemɛ nɛ sugaai. 17Emɛ kai, ba unrunw, waaru gaila le emɛ tunmɔ le kabiyaabɛin. Kinɛ emɛ le laa, kaa goju emɛ le tunmɔ le kabin. Kɔɔ onu nɛ, emɛ girupala ebe pilemɛ ye iye ga dadaaru diyɛ le bɛin dɛi, emɛ wogɔ kanrun bɛɛ ga mainiyaanbɛin. 18Emɛ e bɛrɛ pilemu yaa ga ibɛɛ bɛin. Mu Pɔlu, e bɛrɛ wɛɛ ga, kubɔ turu dɛi sigɛ kanraan yɛnaabɔn. Kaa Setanu emi tɛŋaabe. 19Sabu diyɛdɔn emɛ gɔ lee, kinɛ ɛɛlu emɛ gɔ lee, gɔnrɔn bɛi sɛɛrɛ le kuu emɛ unɔ emɛ bɛɛido gɔ lee, Inɛw Baŋa emɛ Yesu waaru unruin wo tagaraido gɔ le, giru womɔ nɛ, inɛw leei laa, kaa ei tee biyɛdo. 20Ɔnhɔn, kuu ulo emɛ sɔɔ gɔ lee, kinɛ ɛɛlu emɛ gɔ lee ei.

will be added

X\