TESALONIKE PƆLƆ 1

1E inɛw Tesalonike ana nɛ Ama inɛw mɔɔnu nɛ toin gɔbe, e inɛw Ba Ama lee, Inɛw Baŋa Yesu Kirisito lee mɔi wɔin gɔbe, mu Pɔlu lee, iyaa Silasu lee, Timɔte lee, emɛ lɛtɛrɛ ɔn e bɛrɛ tɔŋaa tiiuwɔin. Nɛɛma lee, jamu lee e le biyɛmɔ. 2Emɛ e puu dɛi, waaru wooi Amai birɛpoo tagauwɔin. Iyaa waaru Ama emɛ gɛɛnjɛ wooi, emɛ e dɛi wo bɛrɛ gɛɛunwɔin. 3Gagawu ebe dɛi birɛ e birɛjɛ gɔ lee, ihibɛ ebe dɛi birɛ diyɛ e birɛjɛ gɔ lee, iyaa Inɛw Baŋa emɛ Yesu Kirisito nɛ diyɛ ebe bana ɛɛn go daan gɔ, emɛ waaru wooi, emɛ Ba Ama giru nɛ naŋaranɲu. 4Ba unrunw, emɛ igii wɔin, Ama ei ibɛi biyaa, ei unrunmɔi biyɛ ga yɛmaabe. 5Emɛ Kibɛru Ɛju sɔɔ gɔ e bɛrɛ tagaabɛin. Wogɔ, aŋa sɔɔi sai biyɛlu. Kaa Kibɛru Ɛju gɔ, gɔnrɔn diyɛ lee, Kikinu Pilu baru lee iyaa Kibɛru Ɛju wogɔ naran tɔitɔi ga emɛ gawaa wɔin dɛi e bɛrɛ tagaabɛin. Emɛ e sabu dɛi logoro ebe nɛ bana emɛ bee gɔ e igii wɔi. 6E emi lee, iyaa Inɛw Baŋa lee deewin biyaabei. Iyaa ei ɛjii ɔɲaabe kanran, e Inɛw Baŋa Kibɛru Ɛju gɔ, kinɛ ɛɛlu Kikinu Pilu nɛ goo ye bɛɛmɔjɛ gɔ le yabaabei. 7Kɔɔ sabu dɛi, Maseduanɛ gana nɛ lee, Akayi gana nɛ lee inɛw gawaa wɔin gɔbe puu giru nɛ ei giretagurui biyaai. 8Kunrin Inɛw Baŋa sɔɔ gɔ e le digɛu, Maseduanɛ nɛ lee, Akayi nɛ lee sai ginɛlu, kaa gagawu ebe kibɛru gɔ yalu wooi nɛ dɔwaai. Kɔɔ sabu dɛi emɛ sɔɔ turu kanran sɔɔnu doori ga wɔin. 9Ei yɛnɛi emɛ wɛɛ le, bana emi e sɛguru gɔ sɔɔ, inɛw kɔɔbe kuu bemɛ le sɔɔuwɔin. Bana ɔmɔlɔ gɔbe pajaatiyaa, Ama ɔnmɔi wɔɔ gɔ, Ama tɔitɔi gɔ demɛniyɛnmɔ ga, wo le bana e tubi sɔɔ sɔɔuwɔin. 10Iyaa, Aini womɔ Yesui yiun nɛ wo bulomu gɔ, alagala goo ye wo wɛɛido gɔ dɔmiyaan e wɔɔ gɔ sɔɔ sɔɔuwɔin. Wogɔ baŋa gɔ, Ama kinɛbanrun bɛrii wɛɛido gɔ nɛ emi yabanɛ gɔ woi.

will be added

X\