PIƐRU PƆLƆ 5

1Mu Ama inɛw mɔɔnu inɛ na gɔ, nɛɛ mu, e inɛw Ama inɛw mɔɔnu logoro nɛ inɛw nawin wɔin gɔbe bɛrɛ gɛɛunwɔn. Mui Kirisito ɔɲɛ sɛɛrɛi. Mu iyaa dooro jugɔmɔidɛin gɔ nɛ gamulu ma bɛbɛɛdɔn. Inɛw naw gɔbe bɛrɛ kijɛ mu gɛɛjɛ unwɔ: 2E pejugirɛnw gin’, Ama peju kulɔ e bɛrɛ sagu duuru gɔi ɛjii kajubai. Kinɛ aalu lei laa, kaa Ama diŋɛ le kɛukɛu, kinɛ ɛju le woi kajubai. Kɛɛlɛ bɛɛ sai dɛi kanrannɔugi, kaa kuu ebe obaa ye kanrain. 3Inɛw e bɛrɛ gawaraaɲu gɔbei paŋa tagaranɔugi, kaa peju kulɔ gɔ giru nɛ, giru taguru ɛjubei biyɛi. 4Kɔɔ gin’, waaru pejugirɛnw Kuu Baŋa unruin tagaraido, e dooro ɔgɔdomɔ kɔɔlɔɔlɛ gɔ bɛbɛɛdei. 5Kɔɔ bana wɔɔ gin’, e sagatara unrunw gɔbe, inɛw e dɛi gaain gɔbe le tubiyei. E wooi puu kuu sunugu le bii ye tunmɔ kai kilɛi. Sabu Ama Dɔn sɔwaa gi: “Ama, inɛw kuu unrunbemɛ unɔw gɔbe le jajaiyɛjɛ, kaa inɛw kuu sunugu le wɔin gɔbe bɛrɛ nɛɛma ohobojɛ.” 6Ama waaru kɛjɛido gɔ le womaa kuu ebe unɔ ga, e kɔɔ dɛi Ama numɔ gɔnrɔn sɛɛ gɔ doɲu nɛ kuu ebe sunugoi. 7Diyɛdai ebe wooi kuu womɔ nɛ duurɔi, sabu wo mai ebe yasɛ. 8E kuu ebe ɛjii gɛliyɛi, giri yemɛi. Jaŋunɛ ebe, jinrun puu kuu baŋa gɔ, yara durojɛ gin’, inɛ wo tɛnwɛindo bɛɛ ga gɔŋɔlɔuwɔ. 9Gagawu nɛ ɛɛn go bii ye wo le jaiyɛi. Sabu gagawu nɛ e ba unrunw aduna yalu wooi nɛ wɔin gɔbe ɔɲɛ kɔɔ tunmɔ bɛɛuwɔin ga e igii wɔi. 10Kaa waaru gaila ei ɔɲaai onu nɛ, nɛɛma wooi obonɛ Ama gɔ, Kirisito le ebaa dooro sɔgɔ womɔ nɛ yoo ga ei boonaajɛ baŋa gɔ, wo tunmi ei titibemɔdo, ei ɛɛn go ihiŋiyɛnmɔdo, paŋa ei ohobodo, bɔlɔtei ɛju nɛ ei dadaanado. 11Gɔnrɔn gɔ asuu nasuu womɔi biyɛmɔ. Amina. 12Lɛtɛrɛ dumi ɔn e bɛrɛ tɔŋɔ tii ga Silasu mui baraabe. Mu, woi bainɛ sɔɔ turu baŋai ga lugaa wɔun. Mu ei anrangaju obu ibɛɛ wɔun. Iyaa e bɛrɛ daii tagauwɔn, Ama nɛɛma tɔitɔi gɔ kunrin wɔɔ. E wogɔ nɛ ɛɛn go iŋiyɛin. 13Babilɔnɛ ana nɛ, Ama inɛw mɔɔnu e gin’ Ama yɛmu gɔ ei poonɔuwɔ. Maruka, ii ma kanran ei poonɔuwɔ. 14E Ama inɛw gin’ tunmɔi ihibɛ le poonɔi. E inɛw Kirisito mɔi wɔin gɔbe puu, jamu e le biyɛ.

will be added

X\