PIƐRU PƆLƆ 4

1Kunrin Kirisito, ɔɲɛ iyaabe dɛi, e kanran, wo gin’ ɔɲɛ bɛɛ ga yeguru le biyɛi. Sabu inɛ goju ɔɲɛ iyaajɛ gɔ, woi hakɛ le kabiyaa kilaai. 2Nɛɛ, e kanɛ baa, aduna nɛ bai e bɛrɛ wajaai gɔ wooi, inɛw dadaaru mɔɲu gin’ laa, kaa Ama diŋɛ le kɛukɛu biyɛi. 3E pɔɔlɔ, inɛw Ama inin gɔbe kijɛ kanrun ibiin gɔbe kanraun tanwaanbei. Nɛɛ kɔɔ baa wɔɔ. E kuu sɛlɛ lee, dadaaru mɔɲu lee, kɔɲɔ le bimili lee, yɔgɔrɔ mɔɲu lee, mɔrin ye kijɛ nɔi gabu lee, ɔmɔlɔ bulu tuutaaɲu gɔ lee, wogɔbei kanraunbei. 4Nɛɛ kanɛ, inɛw Ama inin gɔbe, e be le mɔrinyaan ye yanwan mɔɲu naa mɔɲu kɔɔbe kanraanlɛ e wɔɔ gɔ dɛi, be bɛrɛ maunɛ wɔɔ, iyaa ei duduyɔɲu. 5Inɛw ɔnmɔi wɔin gɔbe lee, inɛw yinwaain gɔbe lee saliyɛ kiredo ga, Ama unruin yegeraa wɔɔ gɔ, kijɛ be kanrun gɔbe bei seselumɛdo. 6Kɔɔ sabu dɛi, Kibɛru Ɛju gɔ, inɛw yiunbe bɛrɛ kanran tagaabɛin. Inɛw puu saliyɛ bana kireɲu gin’, waaru ɔnmɔi be bee le inɛw saliyɛ bemɛ kirin gɔbe, Kibɛru Ɛju gɔ be bɛrɛ tagin. Kunrin, bemaa Ama bana kikinui wɔɔ gin’ kikinu sibɛ go ɔnmɔi biyɛ ga Kibɛru Ɛju gɔ be bɛrɛ tagin. 7Kijɛ puu dogogu gɔ bɛruniyaain. Kɔɔ digɛu Ama gɛɛn bɛɛ ga, e hakilɛ ebe daanaa ye, kuu ebe ɛjii gɛliyɛi. 8Kijɛ wooi dɛi sigɛ tunmɔi ɛjii ibɛɛ bii gɔ kinɛ ebe nɛ kunɔi. Sabu ihibɛ, hakɛ joo naa joo yaabu kakanranjɛ. 9E guguun wɔlɔ go, tunmɔ bɛrɛ ginrun sugo oboi. 10Logoro ebe nɛ, inɛ tuturu Ama sin obu dɛin wo bɛrɛ obu gɔ kajubanɛi ɛjui wo biyɛun jaain wɔɔ. Iyaa sin obu dɛin wo bɛi gɔ inɛw puu kai kili biyɛmɔ. 11Kijɛ wooi nɛ baba gɔ Yesu Kirisito le digɛnu Ama mɔi biyɛmɔ ga, inɛ waaju taganɛ gɔ, Ama sɔɔ gɔ inɛw bɛrɛ saanau jaain wɔɔ. Iyaa inɛ inɛw wajunw baranɛ gɔ, Ama wo bɛrɛ paŋa obojɛ gɔ le wo birɛun jaain wɔɔ. Boi sɔmu lee, gɔnrɔn lee, asuu nasuu Yesu Kirisito mɔi. Amina. 12Ba unrunw ibɛ mabe, subɔrɔ nau e bɛrɛ dɔɔjɛ gɔ, kijɛ yeru gin’ bojo ye, maunɛ biyɛnɔugi. 13Kaa, waaru Kirisito dooro tagaraidɛin gɔ le ebaa kanran kinɛ ɛɛlu le joo ye biyɛ ga, e wo gin’ ɔɲɛ iyaabei dɛi, kinɛ ɛɛliyɛmɔi. 14Ei Kirisito jaŋu unrunwin dɛi ei duyaaɲu ye, Ama e yabu, sabu dooro Kikinu, Ama Kikinu gɔ, e le wɔɔ. 15Logoro ebe nɛ, inɛ turu kanran, inɛ daanɛi ma, gugunyɔnnɛi ma, mɔɲu kanrannɛi ma, inɛ waja sɔɔ nɛ aŋa womɔ kunɔnɛi ma gin’ bii ye ɔɲɛ woi bɛɛmɔnɔu. 16Kaa inɛ tuturu wooi, Kirisito inɛi dɛi ɔɲɛ iyeuwɔ ye, wo kɔɔ dɛi dɔgɔ le biyɛnɔu. Kaa, Kirisito inɛi wo wɔɔ gɔ dɛi wo Ama boi sɔmɔ. 17Sabu saliyɛ kiru tɔlɔgu gɔ dɔwaai. Ama ginrun gonɔ maranw gɔbe saliyɛ laa kiredɛin. Nɛɛ, saliyɛ kiru gɔ kuu emɛ nɛ laa tɔlɔdo ye, inɛw Ama bɛrɛ Kibɛru Ɛju goi gɔ le yabanɛ gɔbe le bana yagɔ le dogodo? 18Ama Dɔn bana sɔɔjɛ gin’: “Inɛw teitai gɔbe yaba ga nawin wɔɔ ye, inɛw Amai babanɛ, hakɛ kanranw gɔbe mɔ yani biyɛdo?” 19Kɔɔ gin’, inɛw Ama diŋɛ le kɛukɛu ɔɲɔuwɔin gɔbe, birɛ ɛju kanrun gɔ be digiyɛun jaain wɔɔ. Be iyaa Maŋanɛ, sɔɔ turu baŋa gɔ nɛ sagu bemɛ sɛɛu be duurɔun jaain wɔɔ.

will be added

X\