PIƐRU PƆLƆ 3

1E kanran, yaanw gɔbe, e igɛbe le e tubiyeun jaain wɔɔ. Kɔɔ gin’ bana ɛju ebe le digɛnu igɛnw gamuu Ama sɔɔ le gawanɛ ye, inɛw gawaa wɔin bibiyɛdɛin. Kunrin e sɔɔ sɔi kai siyɛidelei. 2Sabu bana ebe gɔ aŋai ɛjii wɔɔ lee, aŋai baba sɛɛ gɔ lee, be ihiyeɲu. 3Saŋa saŋi ebe bain saŋa saŋi biyɛmɔnɔugi: Kuu ɛru sigɛ le ma, kange dugɔi ma, sɔi dɔnrun diyɛ e goriyeido ma nɛ hakilɛ ebe bojonɔugi. 4Kaa saŋa saŋi ebe gɔ kinɛ ebe kɔlɔ nɛ saŋa saŋiyaan wɔi biyɛmɔi. Saŋa saŋi wogɔ asuu bibiyɛdo, wogɔ kinɛ kuu sunugu sɛɛ, kaali wɔɔ nɛ goi. Wogɔ Ama giru nɛ kijɛ puu dɛi sigɛ ɛjii wɔɔ. 5Pɔɔlɔ yaanw Ama giri liyɛnw, Ama nɛ diyɛ bemɛ daanaa bɛin gɔbe, be kɔɔ gin’ unrunbei saŋaraunbɛin. 6Sara kunrin bee. Wo Abarahamu sɔɔ yabaa, woi unrun baŋai ga boonɔube. E ɛju kanranjɛi ye, iyaa kijɛ turu nɛ kanran kinɛ ebe yanwaanlɛ ye, ei Sara unrunw yaanwin. 7E igɛnw gɔbe, e kanran bana ɛju le yaanw ebe le biyɛi. Be e gin’ gɔnrɔn sɛnɛ ga paamai. Kunrin be sibɛ go baba le biyɛi. Sabu Ama, nɛɛma womɔ dɛi ɔnmɔ wo obojɛ gɔ, e wooi bɛrɛ tunmɔ go obojɛ. Kijɛ turu kanran amagɛɛn ebe tɛŋɛnɔu ga, e kɔɔ gin’ kanrain. 8Kɔɔ wooi onu nɛ, e wooi sɔɔ turu gɔ le biyɛi. E tunmɔ amasɔgɔ jugɔi. Ba unrunw gin’ tunmɔi ibɛɛ biyɛi. Tunmɔ le kinɛ ɛju le biyɛi. Tunmɔ le kuu sunugu le biyɛi. 9Inɛ mɔɲu kanrannɛ gɔi mɔɲu le tujɔnɔugi, maa inɛ duyɔ duyɔnɛ gɔi duyɔ le tujɔnɔugi. Kaa be dɛi Ama boi booi. Sabu waaru Ama ei boonu le wo ei duba kanrando ga boonu. 10Sabu Ama Dɔn kijɛ gi: “Inɛ, aduna kayi ibɛɛ wɔɔ ye, inɛ, bai ɛju iye ibɛɛ wɔɔ ye, mɔɲu dɛi ninɛ womɔ ai gɛliyɛ, nabara sɔɔ dɛi aŋa womɔ ai gɛliyɛ. 11Wo mɔɲu kanrun le onu kigelemaatiyaa ye, ɛju kanran. Wo jamu dɛnɛ, wogɔ onu nɛ digiyɛ. 12Sabu Inɛw Baŋa Ama, giri unrunmɔ inɛw teitai wɔin bɛrɛ dɛɛraa wɔɔ, wo gɛɛn bemɛ keŋiyɛunwɔ. Kaa Inɛw Baŋa Ama, mɔɲu kanranw gɔbe le jajaiyɛjɛ.” 13Ɛju kanrun dɛi e saii mainiyɛunwɔi ye, inɛ aa e bɛrɛ mɔɲu kakanrando ma? 14Kaa halu teitai dɛi ei ɔɲɔmɔdɛin kanran, Ama e yabu. E, inɛw giri liyɛnɔugi. Iyaa kikinu manu le biyɛnɔugi. 15Kaa, Kirisitoi kinɛ ebe nɛ babai, woi Inɛw Baŋa ebei ga jugɔi. Diyɛdɔn le e wɔɔ tiyɛ gɔ inɛ aai kanran e bɛrɛ selumaajɛ ye, e waaru wooi inɛ wogɔ aŋa saa ga yeguru le biyɛi. 16Kaa e wogɔ tɛgɛ sɛlɛ le, iyaa baba le kanrain. Waaru ei mɔɲu kanranwin giyaa ei jaaraaɲu, ei Kirisito mɔi digɛu bana ɛju le e wɔɔ gɔ dɛi, inɛw sɔɔ mɔɲu sɔɔnw gɔbe bemaa sɔɔ bemɛ dɛi dɔgɔ le biyɛ ga, e kinɛjugɔ jarugu sɛlɛ le biyɛi. 17Ama diŋɛi ye, kanran mɔɲu dɛi ɔɲɛ bɛɛ dɛi, kanran ɛju dɛi ɔɲɛ bɛɛ ire. 18Sabu Kirisito, kuu unrunmɔ le hakɛ ebe dɛi kubɔ turu sai yinwaan kilaai bii. Ei Ama genɛ nɛ jɛyaa ga, wo inɛ teitai bee gɔ, inɛw teitai laain dɛi yinwun. Inɛw, Kirisito goju gɔi daabɛin, kaa Ama, Kikinu unrunmɔ le digɛu yiun nɛ woi bulomaabe. 19Wo Kikinu wogɔ le, kikinu pɔɔlɔ Ama sɔɔ yabanɛ kanrin, kaju nɛ toin gɔbe bɛrɛ waaju tagai yaabe. Wogɔ Nɔwe waaru le, Ama waaru muyaan bee gɔ le, diikoro diyɛ gɔ waaru yegereubɛin gɔ le bii. Diikoro wogɔ nɛ inɛw lugo gaila, tiyɛ gɔ inɛw gagara sai dii nɛ yabaabɛin. 21Dii wogɔ, batise kanɛ ei yabajɛ gɔ sɛɛrɛi bee. Batise wogɔ goju lɔgɔ goonɔ dɛi laa, kaa Ama giru nɛ kinɛjugɔ jarugu sɛlɛ pui kunu sɔɔi. Batise wogɔ, Yesu Kirisito, yiun nɛ wo bulu gɔ dɛi ei yabajɛ. 22Yesu Kirisito alagala ulaa, Ama numɔ iin sibɛ nɛ daan. Mɛlɛnkɛ gɔbe lee, alagala paŋagunw gɔbe lee, alagala sɛmɛgunw gɔbe lee, wo le tubiyaa wɔin.

will be added

X\