PIƐRU PƆLƆ 2

1Kɔɔ dɛi, e, mɔmɔɲu wooi lee, nabara wooi lee, iyaa aŋa lɛilɛi lee, ele lee, inɛw mɔɲu sɔɔ sɔi puu lee pajai. 2Ibanrin kanɛ naraanɲu bana wo na iru daariyɛjɛ gin’, iru koro kikinugu lɔgɔ tolo dadaaru gɔ ei aamɔi. E wogɔ nɔwaan ye, kole digɛnu ei gagabiyɛdo, ei yayabadɛin. 3Ama Dɔn sɔwaa gi: “E Inɛw Baŋa Ama yagɔ baa ɛjii wɔɔ ma maraan yɛnaabei.” 4Inɛw Baŋa genɛ nɛ dɔɔi. Woi tibu ɔnmɔ inɛw kamaa pajin gɔi, kaa Ama tibu maai wɔɔi ga yɛmaabe gɔi. 5E yaa tibu ɔnmɔi wɔin gin’ bii ye, Inɛw Baŋa womaa ei jeɲɛ ye ginrun kikinugu e le ujɔ ga genɛ womɔ nɛ dɔɔi. E ginrun wogɔ kɔlɔ nɛ inɛw Ama bɛrɛ sadagadɔɔnɔw dɛiin bojaaɲui bibiyɛdei. Kɔɔ gin’ Yesu Kirisito le digɛnu sadaga Ama Kikinu le digɛ Ama bɛrɛ dɔdɔɔnɔdei, wogɔ Ama yayabajɛ. 6Sabu Ama Dɔn nɛ ɔn gin’ tɔŋi: “Yɛnɛ, ginrun sibɛ tibu maai wɔɔ gɔ yɛmaa mu Siɔn nɛ duunaajɔn. Kaa, inɛ wo le gawaajɛ gɔ, wo asuu dɔgɔ iyeidolo.” 7E inɛw Kirisito le gawaa wɔin gɔbe, e bɛrɛ tibu gɔ gaai maai wɔɔ. Kaa inɛw wo le gawanɛ gɔbe dɛi Ama Dɔn nɛ tɔŋaa gin: “Ginrun ujɔnw tibu kamaa pajin gɔ, tibu wogɔ, ginrun sibɛ tibu gɔ woi bii.” 8Iyaa Ama Dɔn yalu waja nɛ tɔŋaa gi: “Wogɔ tibu inɛw kubɔ tomɔmɔjɛ gɔ woi, dumɔ bei numɔmɔjɛ gɔi.” Be Kibɛru Ɛju sɔɔ gɔ le yabanɛ dɛi kubɔ bemɛ tomi. Ama pɔɔlɔ baa kunrin biyɛdo ga sɔwaa galaai. 9Kaa ei tɔgu yɛmaaɲui. Ei Ama bɛrɛ sadagadɔɔnɔw, Ama ɔgɔnɛi wɔɔ gɔ birɛbirɛnwin. Ei tɔgu Ama unrun dɛi dɛiin bojaa sɛɛi. Iyaa ei tɔgu Ama mɔi wɔɔi. Ama ɔlɔ nɛ ei goonaa, wijɛ womɔ kijɛ puu dɛi sigɛ doorojɛ gɔ nɛ ei jɛɛlɛnɛ gɔ birɛ ɛju naa ɛju gɔbe ebaa inɛw wooi bɛrɛ taga ga, wogɔ dɛi ei yɛmi. 10Pɔɔlɔ e Ama tɔgui laai bei, kaa kanɛ ei Ama tɔgui. Pɔɔlɔ, Ama, amasɔgɔ ebe jugɔlu bee, kaa kanɛ amasɔgɔ ebe jugaaɲu. 11Ba unrunw ibɛ mabe, ei aduna ɔn nɛ yerunwin, ei oju galanwin. Kɔɔ sabu dɛi mu e bɛrɛ gɛɛunwɔn, e dadaaru mɔɲu kinɛ ebe nɛ goojɛ, kikinu ebe le jaiyɛjɛ gɔ dɛi kuu ebe gɛliyɛi. 12Inɛw Ama inin gɔbe giru nɛ bana ebe ɛjii biyɛmɔi. Kunrin, halu be ei jaaraa, ebaa mɔɲu kanranwin giyaaɲu kanran, be waajibi kanran ɛju ebe gɔ ihiyedɛin. Iyaa bai Ama saliyɛ kirei wɛɛido gɔ le, be Ama boi sɔsɔmɔdɛin. 13Inɛw Baŋa dɛi, e aduna paŋagunw wooi le tubiyei: Ɔgɔnɛ diyɛ, kijɛ puu kuui wɔɔ gɔ lee, 14sɛmɛgunw lee, inɛw mɔɲu kanranw gɔbei mɔɲii tujɔ ga, ɛju kanranw gɔbei sɔmɔ ga, ɔgɔnɛ diyɛ gɔ bei tii. 15Ama diŋɛ gɔ unwɔ: Kanran ɛju ebe gɔbe le, bomɔgunw jugɔ sɛlɛ le sɔɔ sɔɔnw gɔbe bɛrɛ sɔɔ sɔɔɲu bɛɛmɔnɔugi. 16E hɔɔlɔnw gin’ biyɛi. Kaa hɔɔlɔi bii ebe gɔ kijɛ mɔɲu dɛbu gɛlii biyɛmɔnɔugi, Ama birɛbirɛnw gin’ biyɛi. 17E inɛw puui babai: Gagawu nɛ e ba unrunw gɔbei ibɛɛ biyɛi, Ama giri liyɛi, ɔgɔnɛ diyɛ gɔi babai. 18Gunɔw gɔbe, e baba wooi le e baŋabe le tubiyei. Baŋa ɛju gɔbe, kinɛ ɛju le wɔin gɔbe sai laa, halu baŋa nau gɔbe le kanran tubiyei. 19Halu ɔɲɛ gɔ wo le jaanla bee kanran, Ama kinɛ aamɔ dɛi, inɛ ɔɲɛ muyaanjɛ ye, wogɔ Ama giru nɛ sɔɔ ɛjui. 20Mɔɲu e kanrun dɛi ei lagaaɲu ye, e wogɔ muyaanjɛi giye wogɔ dɛi ei sɔmɔ ga wɔi ma? Kaa ɛju e kanrun dɛi ei ɔɲɔmaaɲu ye, e wogɔ muyaanjɛi ye, Ama giru nɛ wogɔ sɔɔ ɛjui. 21Kijɛ dɛi Ama ei boonu gɔ yaa kɔɔ woi. Sabu Kirisito, kuu womɔ le e dɛi ɔɲaabe. Ebaa kubɔnami unrunmɔ dimiyɛn ga, wo giru tagurui biyaabe. 22Wo hakɛ turu kanran kanrantɛlu. Iyaa, aŋa womɔ nɛ nabara sɔɔ wo goou inɛ turu kanran ɛgɛtɛlu. 23Waaru woi be duyɔ le, wo duyaa tujɔlu. Inɛw waaru woi ɔɲɔmi le, wo bei ɔɲɔmu tujɔdo gɛɛlu. Kaa teitai le Ama saliyɛkirenɛ gɔ numɔ nɛ sɔɔ unrunmɔ pajaabe. 24Emaa hakɛ sibɛ go inɛw yinwin bii ye, emaa teitai gɔ dɛi ɔnmɔi biyɛ ga, Kirisito goju womɔ le ɔɲɔu, kuu womɔ le baga jai nɛ hakɛ emɛ duiyaabe. Woi be lagu gɔ dɛi ei bajaai. 25E peju manaayaabɛin gin’ bei. Kaa kanɛ, kikinu ebe girɛnɛ lee, kikinu ebe gɛliyɛnɛ gɔ lee bɛrɛ ei pilemaa jɛɛlaaɲu.

will be added

X\