PIƐRU PƆLƆ 1

1Mu Piɛru, Yesu Kirisito jaŋu ii tiyaaɲu gɔ, mu lɛtɛrɛ ɔn, e, Ama inɛw yɛmu, aduna ɔn nɛ yerunwin wɔin gɔbe, inɛw Rɔmɛ laamu, Pɔn lee, Galasi lee, Kapadɔse lee, Asi lee, Bitini lee numɔ nɛ ginaa wɔin gɔbe bɛrɛ tɔŋaa tiiuwɔn. 2Ebaa Yesu Kirisito sɔɔ yaba ga, ili womɔ le ei ɛjɛmɔ ga, Ba Ama pɔɔlɔ baa sɔɔ bibiyɛdo ga wo kɛju gɔ le kɛukɛu ei yɛmi. Iyaa Kikinu womɔ gɔnrɔn le ei Ama tɔgu dɛiin bojaaɲui digɛu ei yɛmi. Ama, nɛɛma lee, jamu lee ei gaai obo. 3Inɛw Baŋa emɛ Yesu Kirisito Ama gɔ, iyaa wo Ba gɔi sɔmɔmɔi. Amasɔgɔjugɔ diyɛ womɔ sabu dɛi, Yesu Kirisitoi yiun nɛ bulogu gɔ le digɛu Ama emi pilemaa narun. Emɛ kunrin diyɛdɔn ɔnmɔ gɔ yasin. 4Iyaa Ama, inɛw womɔ dɛi kɛn maŋaa sɛɛ gɔ, wogɔ bɛɛ ga emɛ kinɛ ɔgu le wɔin. Wo wogɔ e dɛi alagala nɛ gɛliyaa wɔɔ. Wogɔbe, arusɛgɛ asuu yanwaannɛbei, lɔgɔjiyɛɛnɛbei, kumujiyeenɛbei. 5Yayabu, waaru dumɔ gɔ le jugɔmɔidɛin ga kanɛ baa yegeraaɲu gɔ, yayabu wogɔ bai e bɛɛido baa, e inɛw gagawu ebe dɛi Ama, gɔnrɔn unrunmɔ le gɛlɛ gɔbe, e dɛi Ama kijɛ ɛju wogɔbe alagala nɛ bojaa sɛɛ. 6Halu kanɛ waaru gaila le, subɔrɔ tɔgu dɛin dɛin dɛi kinɛ ebe jijinwɛndo bibiyɛ kanran, e kijɛ ɛju wogɔ dɛi kinɛ ɛɛliyɛmɔuwɔi. 7Subɔrɔ kɔɔbe, gagawu ebe pinɛ yɛnɛdɛin ga e bɛrɛ dɔɔuwɔ. Kange, halu pinɛ womɔ yaun nɛ yɛyɛnɛɲu kanran, woi kijɛ sɔgɔɔlɛi. Kunrin, gagawu ebe gaai kange dɛi ire wɔɔ gɔ yaa, yagɔ baa ɛɛn ma jugɔ ga, pinɛ womɔ yɛyɛnɛɲu. Kɔɔ gin’ e boi sɔmu lee, dooro lee, baba lee, Yesu Kirisito waaru unruin wo tagaraido gɔ le bɛbɛɛdei. 8Halu e woi iyetɛnɛ kanran woi ibɛɛ wɔi. Halu e kanɛ woi iyeuwɔnɛ kanran, e wo le gawaa wɔi. E kɔɔ sabu dɛi kinɛ ɛɛlu diyɛ naa diyɛ le wɔi. Kinɛ ɛɛlu gɔ bana gaa gɔ aŋa le sɔi bɛɛmɔɔlɛ. 9Sabu e kijɛ dɛi gawaa e wɔɔ gɔi bɛɛuwɔi: Wogɔ kikinu ebe yayabu gɔ woi. 10Yayabu kɔɔ sɔɔ dɛi, inɛw Ama titiyaanw denu dɛnaabɛin, selumu selumaabɛin. Iyaa, be Ama e bɛrɛ nɛɛma oboido gɔ dɛi sɔɔ wɛɛido sɔwaabɛin. 11Inɛw Ama titiyaanw gɔbe nɛ Kirisito Kikinu tobe gɔ, Kirisito ɔɲɛ iyeido sɔɔ lee, kɔɔ onu nɛ dooro wo bɛɛido sɔɔ lee, giru nɛ baa sɔwaatiyaabɛin. Waaru yagɔ le ma, bana inge le ma biyɛdo ma ga, be mainiyaan jugɔ ibɛɛ bɛin. 12Inɛw Ama titiyaanw gɔbe bɛrɛ sɔɔ taga ga sagu duurin gɔ, wogɔ kuu bemɛ dɛi laa, kaa e dɛi ga Ama be bɛrɛ jugɔmaabe. Sɔɔ wogɔ, kanɛ inɛw Kibɛru Ɛju waaju taganw gɔ le digɛu e bɛrɛ tagaaɲu. Be Kikinu Pilu alagala gowaa tiin gɔ gɔnrɔn le sɔɔ gɔ tagaabɛin. Halu mɛlɛnkɛbe kanran wogɔ paamu kanran ga daariyaabɛin. 13Kɔɔ sabu dɛi yeguru le biyɛi, hakilɛ kunɔi. Kuu ebe ɛjii gɛliyɛi. Yesu Kirisito waaru unruin wo tagaraido gɔ le nɛɛma e bɛrɛ oboidɛin gɔ, diyɛ ebe sɛɛu wogɔ nɛ daanai. 14E, Ama sɔɔ le yabawin biyɛi. Pɔlɔ pɔlɔ, Amai jugɔlu ebe waaru le dadaaru e sɛbe gɔbe le biyɛnɔugi. 15Ama ei boonɔnɛ gɔ bana ɛjaa wɔɔ gin’, kijɛ e kanranjɛ wooi nɛ e yaa ɛjaai biyɛi. 16Sabu Ama Dɔn nɛ tɔŋaa gi: “E ɛjaai biyɛi, sabu mu ɛjaa wɔun.” 17Inɛwin kabu kunɔlu go, inɛ tuturu, birɛ womɔ le kɛukɛu saliyɛ womɔ Ama kirenɛ gɔ, woi e Bai ga wo bɛrɛ gɛɛnjɛi ye, iyɛru nɛ waaru e wɔɔ le e Ama giri liyɛ le biyɛi. 18Nɛɛ, e tirɛ anranw oju niwɛn sɛlɛ ei be deeraabe gɔ nɛ inge le ei dɔrugaabɛin ma e igii wɔi. Kijɛ yanwanjɛ, sarudu ma, kange ma gin’ le kai ei dɔrugɔnɛ. 19Kaa Kirisito ili dɔnrun diyɛ gɔ le ei dɔrugaabɛin. Kirisito, wo peju ii jiun sɛlɛ ma, lɔgɔ ma tolo gin’ biyaabe. 20Ama, Kirisito gɔi aduna maŋamɔ nɛ yɛmaabe. Iyaa kanɛ waaru dumɔ ɔn le, Ama, ɛju ebe dɛi woi daii tagaraabe. 21Ama, Kirisitoi yiun nɛ bulugaa, dooro wo bɛrɛ obonɛ gɔ, e Kirisito wogɔ le digɛu wo le gawaa wɔi. Kunrin gagawu ebe gɔ lee, diyɛdɔn ebe gɔ lee, Ama nɛ bojaa sɛi. 22Gagawu nɛ e ba unrunw gɔbei kinɛpilu le ibɛɛ biyɛ ga, e naran gɔ le yabu le digɛu kinɛ ebe ɛjɛmaabei. Kodigɛu e tunmɔi kinɛ ebe wooi le, ɛjii ibɛɛ biyɛi. 23Ama sɔɔ ɔnmɔi wɔɔ gɔ asuu wɔɔ gɔ le digɛu ei pilemaa naraanɲu. Ei narannɛ gɔ inɛ yinwɛnjɛi laa, wo asuu yɔɔ. 24Sabu Ama Dɔn nɛ tɔŋaa gi: “Adama unrunw puu belu gin’ wɔin, daula bemɛ olu belu puyo gin’ wɔɔ. Belu mamaaŋiyɛnjɛ, puyo womɔ babagajɛ. 25Kaa, Inɛw Baŋa Ama sɔɔ gɔ asuu sɔsɔgɔjɛ.” Sɔɔ wogɔ Kibɛru Ɛju, sɔɔ e bɛrɛ tagu gɔ woi.

will be added

X\