JAN PƆLƆ 5

1Inɛ aai kanran, Yesui Ama Yabanɛ Diyɛ tii gɔi ga, gawaa wɔɔ ye, inɛ kɔɔ Ama ii. Nɛɛ, inɛ aai kanran, banɛ ibɛɛ wɔɔ ye, unrunw womɔ gɔbei yaa ibɛɛ wɔɔ. 2Kɔɔ bana wɔɔ gin’, emɛ Ama unrunwin ibɛɛ wɔin ga, Ba Ama bana emɛ ibɛ lee, tɔɔru womɔbe bana emɛ gɛlɛ lee nɛ jugɔmɔdo. 3Yɛnɛi, Amai ibɛi bii gɔ, wogɔ, tɔɔru womɔbe yabu gɔ woi. Inɛ aai kanran, Ama ii ye, wo aduna kuu nɛ gɔnrɔn bɛbɛɛjɛ. Kɔɔ sabu dɛi, Ama tɔɔru gɔbe gɛliyɛ ga, emɛ bɛrɛ naula. Nɛɛ, aduna kuu nɛ kijɛ gɔnrɔn bɛɛjɛ gɔ, wogɔ, gagawu emɛ gɔ woi. 5Naran go, Yesu Ama Aini ga, inɛ gawaa wɔɔ gɔi laa ye, aduna ɔn kuu nɛ inɛ gɔnrɔn bɛɛjɛ wɔlɔ. 6Yesu Kirisito, aduna nɛ wo wɛi. Waaru wo wɛi le, wo batise womɔ dii lee, ili womɔ lee nɛ wɛi. Dii nɛ sai wɛɛlu. Kaa dii lee, ili lee nɛ wɛi. Ama Kikinu yaa, Yesu dɛi sɛɛrɛ gogoojɛ. Ama Kikinu, narain. 7Aiwa, sɛɛrɛ taanu wɔin: 8Ama Kikinu sɛɛrɛ lee, dii sɛɛrɛ lee, ili sɛɛrɛ lee. Sɛɛrɛ taanu kɔɔ puu tunmɔ le sɛgɛraa wɔin. 9Emɛ, inɛw sɛɛrɛ le gagawaɲu. Nɛɛ, Ama sɛɛrɛ gɔ inɛ mɔ dɛi gaa. Aiwa, Ama, Aini womɔ dɛi sɛɛrɛ wo goi gɔ kɔɔ woi. 10Kunrin, inɛ Ama Aini le gawaajɛ, kinɛ womɔ nɛ sɛɛrɛ gɔ yasɛ. Kaa inɛ Ama le gawalu gɔ, Ama, Aini womɔ dɛi sɛɛrɛ wo goi gɔ le gawalu gɔ digɛu, inɛ kɔɔ, Amai kakalu maŋanɛi bojouwɔ. 11Nɛɛ, sɛɛrɛ gɔ unwɔ: Ama, emɛ bɛrɛ ɔnmɔsɔgɔ obaajɛ. Ɔnmɔ kɔɔ, Aini womɔ le bɛɛmɔjɛ. 12Inɛ aai kanran, Aini gɔ le yato ye, inɛ kɔɔbaŋa ɔnmɔ gɔ yasɛ. Ama Aini gɔ le inɛ tolo, ɔnmɔ gɔ sɛlɛ. 13Nɛɛ, e, inɛw Ama Aini le gawaa wɔin gɔbe, ebaa ɔnmɔsɔgɔ yasɛi jugɔ ga, mu sɔɔ kɔɔbe e bɛrɛ tɔŋɔuwɔn. 14Iyaa, kijɛ emɛ gɛɛnjɛ puu, Ama diŋɛ le sɛgɛraa ye, wo gɛɛn emɛ kekeŋiyɛnjɛ ga, emɛ wogɔ diyɛdɔn yasin. 15Iyaa, wo gɛɛn emɛ kekeŋiyɛnjɛ ga, emɛ igii wɔin dɛi, kijɛ ingei kanran wo bɛrɛ emɛ gɛɛindo puu, emɛ kijɛ wogɔ yaa biyaaɲu ga igii wɔin. 16Inɛ turu wo bainɛ hakɛ kanraun wo wɔu iyaajɛ ye, yiun nɛ inɛi hakɛ jɛyaajɛi laa ye, baŋa wo bainɛ gɔ dɛi Ama gɛɛn. Yiun nɛ, hakɛ inɛi jɛyaajɛi laa ye, Ama, bainɛ gɔ bɛrɛ ɔnmɔ obu ye, woi yayabado. Kaa, yiun nɛ hakɛ inɛi jɛyaajɛ yɔɔ. Hakɛ wogɔ dɛi gɛɛn gɛɛlun. 17Narain, kanran teitai laa puu hakɛi. Kaa, yiun nɛ hakɛ inɛi jɛyaalɛ yɔɔ. 18Inɛ aai kanran, Ama ii ye, hakɛ kanrannu biyɛɛlɛ ga, emɛ igii wɔin. Ama Aini woi gɛlɛ. Iyaa, Mɔɲu kuu baŋa, kuu womɔ nɛ gɔnrɔn sɛlɛ. 19Nɛɛ, emɛ kai, emi Ama mɔi ga igii wɔin. Kaa aduna bɛɛnw puu Mɔɲu kuu baŋa numɔ nɛ toin. 20Ama Aini gɔ wiyaa, hakilɛ emɛ bɛrɛ obaa, emɛ Ama tɔitɔi gɔi jugaaɲu ga igii wɔin. Yesu Kirisito le digɛu, emɛ Ama wogɔ le toin. Ama tɔitɔi gɔ, ɔnmɔsɔgɔ gɔ, Yesu gɔ yaa woi. 21Unrunw mabe, ɔmɔlɔ dɛi kuu ebe kajubai.

will be added

X\