JAN PƆLƆ 4

1Ba unrunw ibɛ mabe, inɛw titiyaanw kakalugunw joo aduna nɛ gowaa yɔɔin. Kɔɔ sabu dɛi, Ama Kikinu, unrunbe le yɔɔ inɛw gɛɛɲu puu le gawanɔugi. Kaa, kikinu be le wɔɔ gɔ, Ama Kikinui ma suburu yɛnɛi. 2E sɔɔ ɔn le, Ama Kikinu jujugɔdei: Inɛ aai kanran, Yesu Kirisito aduna nɛ emɛ gin’ inɛi biyaa, wɛi gɛɛjɛ ye, inɛ kɔɔ Ama Kikinu wo le yɔɔ. 3Kaa, inɛ aai kanran, Yesu sibɛ nɛ, sɔɔ kɔɔ le yabalu ye, Ama Kikinu wo le wɔlɔ. Kikinu wo le wɔɔ gɔ, Kirisito jaŋunɛ yawɛɛjɛ be giyaa e ɛgu gɔ kikinui. Kikinu wogɔ kanɛ baa aduna nɛ yɔɔ. 4Kaa e kai, unrunw mabe, ei Ama mɔi. Kikinu e le wɔɔ gɔ, aduna nɛ kikinu wɔɔ gɔ dɛi gaa. Kɔɔ sabu dɛi, e inɛw titiyaanw kakalugunw gɔbei gɔnraanjɛi. 5Be, aduna inɛwin gɔ digɛu, aduna sɔɔi sɔɔɲu. Kɔɔ sabu dɛi, aduna inɛw yaa bei kekeŋiyɛnɲu. 6Kaa, emi Ama mɔi. Inɛ Ama igii wɔɔ, emi kekeŋiyɛnjɛ. Inɛ Ama mɔi laa, emi keŋiyɛɛnlɛ. Kunrin, emɛ naran Kikinu lee, kakalu kikinu lee, kabu kunu bɛbɛɛdɛin. 7Ba unrunw, ihibɛ gɔ Ama bɛrɛ goojɛ. Kɔɔ sabu dɛi, tunmɔ ibɛi biyɛmɔi. Inɛ ihibɛ sɛɛ gɔ, Ama ii, iyaa, Amai igii wɔɔ. 8Ama ihibɛi. Kɔɔ sabu dɛi, inɛ ihibɛ sɛlɛ gɔ, Ama inɛɛ. 9Ama, emɛ sibɛ go ihibɛ womɔ bana wo taguru unwɔ: Aini turu womɔ le digɛnu emaa ɔnmɔi biyɛ ga, wo, woi aduna nɛ tiyaabe. 10Nɛɛ, ihibɛ tɔitɔi gɔ emɛ yani jugɔɲu? Emɛ Amai ibɛi biyaabɛin dɛi, ihibɛ tɔitɔi gɔ jugɔdɛin ma? Ai, Amai, emi ibɛi biyaa, Aini womɔ tiyaa, hakɛ emɛ yaabu kanran ga, woi sadagai boju. Ihibɛ tɔitɔi gɔ emɛ kɔɔ gin’ jugin. 11Ba unrunw ibɛ mabe, nɛɛ, Ama kɔɔ gin’ emi ibɛi bii ye, emɛ yaa tunmɔ ibɛi emɛ biyɛun jaain wɔɔ. 12Inɛ turu kanran Amai iyetɛlu. Kaa, emɛ tunmɔi ibɛɛ wɔin ye, Ama, emɛ le yato. Iyaa, ihibɛ womɔ kinɛ emɛ nɛ emɛ sɛɛ gɔ, kibaa wɔɔ. 13Emɛ Ama le yatoin, Ama emɛ le yato. Wo, Kikinu womɔ emɛ bɛrɛ obaabe dɛi, emɛ wogɔ igii wɔin. 14Iyaa, Ba Ama, Aini womɔ, aduna Yabanɛi biyɛ ga tiyaabe. Emɛ wogɔ iyaa, sɛɛrɛ goouwɔin. 15Yesu Ama Ainii ga inɛ gɛɛjɛ gɔ, Ama, inɛ wogɔ le yato. Inɛ wogɔ yaa, Ama le yato. 16Nɛɛ, Ama, emi bana wo ibɛ gɔ, emɛ wogɔ jugaa, wogɔ le gawaabɛin. Ama ihibɛi. Iyaa, inɛ ihibɛ sɛɛ gɔ, Ama le yato. Ama yaa wo le yato. 17Logoro emɛ nɛ ihibɛ kibaai ye, saliyɛ kirɛidɛin bai gɔ, emɛ diyɛdɔn le biyɛdɛin. Sabu aduna nɛ bana emɛ gɔ, Yesu Kirisito bana gin’ wɔɔ. 18Ihibɛ, liliyɛ sɛlɛ. Kinɛ nɛ ihibɛ kibaai ye, liliyɛ donugutiijɛ. Kɔɔ sabu dɛi, inɛ liliyɛ le wɔɔ, kinɛ womɔ nɛ ihibɛ gɔ kibelu. Inɛ liyɛ liyɛjɛ, kanɛ baa kuu unrunmɔ nɛ jarugu duuraati. 19Kaa emɛ kai, Ama laa emi ibɛi bii gɔ digɛu, emɛ ihibɛ yasin. 20Inɛ turu, unrun Amai ibɛɛ wɔɔ gɛɛnu, wo bainɛi ibiliyaa wɔɔ ye, inɛ kɔɔ kakalu maŋanɛi. Wo bainɛ, giri womɔ le wo iyejɛ gɔi ibɛla ye, inɛ kɔɔbaŋa, Ama iyeelɛ wo wɔɔ gɔ, ibɛi bii bɛɛlɛ. 21Iyaa, Yesu Kirisito, emɛ bɛrɛ ɔn gin’ tɔɔru: Inɛ Amai ibɛ gɔ, wo bainɛ yaa ibɛi wo biyɛun jaain wɔɔ.

will be added

X\