JAN PƆLƆ 3

1Ba Ama emi bana wo ibɛ gɔ yɛnɛi. Ihibɛ womɔ gɔ dɛi, boi emɛ Ama unrunw gɛɛɲu. Iyaa naran go, emɛ Ama unrunwin. Aduna bɛɛnw, emɛ Ba Ama inin gɔ digɛu, emi yaa inin. 2Ba unrunw ibɛ mabe, kanɛ emɛ Ama unrunwin. Kaa, bana emɛ biyɛido tɔitɔi nimɛ kanran tagarala. Kaa, emɛ sɔɔ ɔn igii wɔin: Kirisito waaru wiyaa, emɛ bana wo wɔɔ gin’ tee woi iyedɛin. Emɛ yaa, wo le murin biyɛdɛin. 3Inɛ aai kanran, sɔɔ kɔɔ le Yesu Kirisito nɛ diyɛ womɔ daanaa wɔɔ ye, bana wo ɛjaa wɔɔ gin’, inɛ wogɔ baŋa, kuu unrunmɔ ɛhɛjɛmɔjɛ. 4Iyaa, hakɛ gin ye, tɔɔru yamuli. Inɛ hakɛ kanranjɛ, tɔɔru yamalauwɔ. 5Nɛɛ, Yesu Kirisito, hakɛ emɛ gɔbe goonɔdo ga, aduna nɛ wɛi ga, e igii wɔi. Iyaa, hakɛ turu kanran wo le wɔlɔ. 6Kɔɔ sabu dɛi, inɛ wo le too, hakɛ papajajɛ. Inɛ hakɛ nɛ toi ye biyɛjɛ, woi iyelu, woi inɛɛ. 7Unrunw dagunw, inɛ turu kanran bɛrɛ ei lelemɔnɔugi. Inɛ birɛ teitai birɛjɛ, Yesu Kirisito bana teitai wɔɔ gin’, inɛ kɔɔbaŋa yaa teitai wɔɔ. 8Kaa, inɛ hakɛ pajaalɛ, inɛ wogɔ jinrun puu kuu baŋa inɛi. Tɔlɔ gɔ le baa, jinrun puu kuu baŋa hakɛ kanraunwɔ. Nɛɛ, Ama Aini gɔ, birɛ womɔ yamala ga wɛi. 9Inɛ aai kanran, Ama ii ye, Ama bana gɔ wo nɛ yato gɔ dɛi, wo hakɛ nɛ bii bɛɛlɛ. Ama wo Bai gɔ dɛi, wo hakɛ nɛ bii bɛɛlɛ. 10Ama unrunw lee, jinrun puu kuu baŋa unrunw lee, bana jugɔmɔjɛ gɔ ɔn woi: Inɛ teitai kanraanlɛ ma, wo bainɛ ibɛla ma biyaai ye, inɛ wogɔ, Ama ii laa. 11Kibɛru Ɛju sɔɔ e yabu le baa, sɔɔ e ɛgu gɔ nɛ, emaa tunmɔ ibɛi biyɛ gin. 12Kɔɔ sabu dɛi, emɛ Kayɛn gin’ biyɛmɔnɔugin. Wo Mɔɲu kuu baŋa inɛi bee, iyaa, wo suŋɔrɔin daabe. Birɛ womɔ ɛjula bee dɛi, wo, wo suŋɔrɔn dai. Kaa, wo suŋɔrɔn birɛ gɔ teitai bee. 13Ba unrunw mabe, aduna inɛw ei ibiliyaa wɔin ye, e bɛrɛ maunɛ bojonɔugi. 14Emɛ, emɛ ba unrunw ibɛɛ wɔin gɔ digɛu, emɛ yiun nɛ gowaa, ɔnmɔ nɛ taŋaai ga igii wɔin. Inɛ, wo bainɛ ibiliyaa wɔɔ gɔ, inɛ wogɔ baŋa yinwaain. 15Inɛ aai kanran, wo bainɛ ibiliyaa wɔɔ ye, inɛ kɔɔbaŋa inɛ daanɛi. Iyaa, inɛ daanɛ turu kanran, ɔnmɔsɔgɔ gɔ, wo nɛ tolo ga, e igii wɔi. 16Nɛɛ, ihibɛ bana jugɔmɔjɛ gɔ unwɔ: Yesu Kirisito, emɛ sabu dɛi kinrun womɔ pajaabe. Kɔɔ biyaai ye, emɛ yaa, emɛ ba unrunw dɛi kinrun emɛ pajaun jaain wɔɔ. 17Inɛ ɔgɔinɛ turu, wo bainɛ, kai turu le wɔɔ ga iyaa, kinɛ unrunmɔ ɛɛnnaa, amasɔgɔ womɔ jugɔlu ye, inɛ kɔɔbaŋa, Ama ihibɛ wo nɛ yato ma? 18Aiwa, unrunw dagunw, kɔɔi biyaa ye, aŋa le, ninɛ ɛɛlu le sai, inɛ ibɛɛ wɔɔ gɛɛmɔnɔugin. Kaa birɛ le, naran go inɛ ibɛi biyɛmɔi. 19Kunrin, emɛ naran gɔ le toin ga jujugɔdɛin. Iyaa, kinɛ emɛ nɛ jarugu tolo go, Ama giru nɛ diyɛdɔn le biyɛdɛin. 20Kinɛ emɛ emi jarugaajɛ kanran, Ama, kinɛ emɛ dɛi gaa, wo kijɛ wooi igii wɔɔ. 21Ba unrunw ibɛ mabe, kinɛ emɛ, emi jarugaalɛ ye, emɛ diyɛdɔn le Ama le sɔɔ sɔi bɛbɛɛɲu. 22Iyaa, emɛ tɔɔru womɔbe yagɛlɛin gɔ digɛu, kijɛ wo bɛrɛ ɛju kanraunwɔin gɔ digɛu, emɛ kijɛ emɛ gɛɛnjɛ puu, wo nɛ bɛbɛɛdɛin. 23Nɛɛ, kijɛ emɛ bɛrɛ wo tɔɔrɔjɛ gɔ unwɔ: Emaa, Aini womɔ Yesu Kirisito le gawa. Iyaa, Yesu Kirisito, emɛ bɛrɛ bana tɔɔru gin’ tunmɔ ibɛi biyɛ. 24Inɛ Ama tɔɔru gɔbe le yabajɛ gɔ, Ama le yato. Ama yaa wo le yatoiyojɛ. Ama, Kikinu womɔ emɛ bɛrɛ wo obu gɔ dɛi, Ama, emɛ le yato ga, emɛ igii wɔin.

will be added

X\