JAN PƆLƆ 1

1Inɛ boi womɔ Ɔnmɔ sɔɔ gɛɛɲu gɔ, emɛ wo dɛi e bɛrɛ tɔŋɔuwɔin. Kijɛ puu tɔlɔmɔ nɛ wo yabe. Emɛ woi ɛgaabɛin. Giri emɛ le woi iyaabɛin. Emɛ woi ɛjii yɛnaabɛin. Numɔ emɛ le woi tabaabɛin. 2Ɔnmɔ gɔ, waaru aduna nɛ wiyaa, unruin wo taguru le, emɛ woi iyaabɛin. Kɔɔ sabu dɛi, emɛ sɛɛrɛ womɔ goouwɔin. Ɔnmɔ kɔɔ, asuu ɔnmɔi. Ba Ama le bee. Kaa, kanɛ woi emɛ bɛrɛ jugɔmaaɲu. 3Emɛ, Ba Ama le bɔɔi wɔin. Iyaa Aini womɔ, Yesu Kirisito le bɔɔi wɔin. Nɛɛ, ebaa yaa emɛ le bɔɔi biyɛ ga, emɛ kijɛ emɛ iyi gɔ, emɛ ɛgu gɔ, wogɔ e bɛrɛ tagauwɔin. 4Kinɛ ɛɛlu emɛ kibaai biyɛ ga, emɛ sɔɔ kɔɔbe tɔŋɔuwɔin. 5Yesu Kirisito le kibɛru ɛgaa, e bɛrɛ emɛ tagajɛ gɔ unwɔ: Ama wijɛi. Ɔlɔ turu kanran wo nɛ tolo. 6Nɛɛ, emɛ wo le bɔɔi wɔin gɛɛnu, nimɛ kanran ɔlɔ nɛ yaaɲu ye, emɛ kakalu maŋawin. Naran le yoi yaauwɔnɛ. 7Kaa, Ama, bana wijɛ nɛ too gin’ emɛ wijɛ nɛ yoi yaaɲu ye, emɛ tunmɔ le bɔɔi wɔin. Iyaa, Aini womɔ Yesui ili gɔ, hakɛ wooi nɛ emi ɛhɛjɛmɔjɛ. 8Yɛnɛi, emɛ hakɛ sɛnɛ gɛɛuwɔin ye, kuu emɛ lelemɔuwɔin. Naran emɛ le wɔlɔ. 9Kaa emɛ, hakɛ emɛ gɔbe Ama bɛrɛ tagaa ye, kuu gɔ nɛ iŋiyɛunwɔin ye, Ama kai, wo sɔɔ turu baŋai, teitai wɔɔ, hakɛ emɛ puu emɛ bɛrɛ yaabu kanrun ye, mɔɲu wooi nɛ emi ɛhɛjɛmɔjɛ. 10Nɛɛ, emɛ hakɛ sɛnɛ gɛɛuwɔin ye, emɛ Amai kakalu maŋanɛi bojouwɔin. Sɔɔ womɔ emɛ gɛlɛlain.

will be added

X\