KƆRƐNTE PƆLƆ 9

1Mu, mu bɛrɛ ɛju gin’ bii bɛɛlɔn ma? Maa mui Yesu jaŋu ii tiyaaɲui laa ma? Kɔɔi ye, mu Inɛw Baŋa emɛ Yesui iyelun ma? Inɛw Baŋa dɛi birɛ mu biru sɛɛrɛ gɔ ei laa ma? 2Halu inɛw gamuu mui jaŋu ii tiyaaɲui laa gin’ lugoɲu kanran, e kai mui jaŋu ii tiyaaɲui lugoun jaan. Inɛw Baŋa nɛ e too gɔ dɛi, mui Yesu jaŋu ii tiyaaɲui ga sɛɛrɛ gɔ ei. 3Mui Yesu jaŋu ii tiyaaɲui laa ga inɛw sɔɔ sɔɔɲu gɔbe aŋa bana mu saaido unwɔ: 4Birɛ emɛ dɛi, pana lee, dii lee emɛ yabaun dagalu ma? 5Yesu jaŋu unrunw tiyaaɲu wajunw lee, Inɛw Baŋa Yesu suŋɔw lee, Piɛru lee, bana kanranɲu gin’, emɛ yaa yaanran jaŋu ii jɛɛ ye, emɛ le jɛyai bɛɛnɛ ma? 6Maa birɛ birɛ ye pana kunɔ ga, Barunabasu emɛ lɛi sai le dagaa ma? 7Sɔludasu ii aa, kɔmɔ taa yaa ye kuu unrunmɔ kijɛ le kai unrunmɔ kilɛjɛ? Maa, resɛn tiun yibenɛ womaa, resɛn tiun ii womɔ kayanɔu yɔɔ ma? Maa bɛlugirɛnɛ arusɛgɛ womɔ iru nɔɔnɔu yɔɔ ma? 8Sɔɔ ma Adama unrunw kanran nɛ tee duu womɔ sibaa sɛɛ ma ajubanɔugi. Mɔise tɔɔru gɔ yaa sɔɔ tunmɔ wogɔ woi sɔɔjɛ. 9Mɔise tɔɔru nɛ kijɛ tɔŋɔ unwɔ: “Naa jiŋu dɛnrɛn kiju namaa ye, ii goonɔjɛ aŋa nɛ aŋapɔin e kunɔu jaanla.” Ama, naa dɛi jiire le wɔɔ ga kɔɔ sɔi ma? 10Wo sɔɔ kɔɔ emɛ dɛi sɔɔlu ma? Ee, wo emɛ dɛi sɔi. Inɛ woluwalanɛ gɔ lee, dɛnrɛn laganɛ gɔ lee, be lɛi kɛu, dɛnrɛn kuru bemɛ bɛbɛɛdɛin diyɛdɔn le, birɛ bemɛ birɛun jaan. 11Emɛ, Kikinu sɔɔ logoro ebe nɛ toi gin’ tɔwaabɛin. Nɛɛ, emɛ numɔ ebe kijɛ gamuu gɛlu gin’ gɛlaaɲu ye, wogɔ sɔɔ diyɛi ma? 12Inɛw wajunw numɔ ebe nɛ kijɛ bɛɛuwɔin ye, emɛ, be dɛi sigɛ numɔ ebe nɛ kijɛ bɛɛun dagalu ma? Kaa emɛ le kijɛ jaan gɔ ebaa emɛ bɛrɛ obo kaara emɛ gɛɛnɛ. Emɛ kijɛ puu muyaanbɛin. Kirisito Kibɛru Ɛju oju gɔ tɛŋɛnɔu ga, emɛ kijɛ puu muyaanbɛin. 13Ama Ginrun Diyɛ gɔ nɛ birɛbirɛnw gɔbe, pana bemɛ Ama ginrun gɔ nɛ yagoojɛ ga e inin ma? Iyaa, sadagadumu nɛ sadaga tɛgɛrɛnw gɔbe, kijɛ tɛgɛrɛɲu gɔ nɛ kuru bemɛ gogoojɛ ga e inin ma? 14Kɔɔ bana wɔɔ gin’, inɛw Kibɛru Ɛju taganw gɔbe, Kibɛru Ɛju le kaya ga Inɛw Baŋa yintɔɔru. 15Mu kai, kijɛ kɔɔbe turu kanran dɛnɛlun. Iyaa kanɛ wogɔ sɔɔ tɔŋɔuwɔn ye, ebaa wogɔ mu bɛrɛ kanran dɛi laa. Kuu ma unu sɔɔ ɔn inɛ turu wogɔ yamalaati biyɛ dɛi, mu bɛrɛ mu yinwɛnjɛ ire. 16Kibɛru Ɛju tagu gɔ, mu bɛrɛ kuu ma unu sɔɔi laa. Wogɔ mu bɛrɛ waajibi sɔɔi. Kibɛru Ɛju tagalun ye, bɔnrɔn mu le wɔɔ. 17Diŋɛ ma le, birɛ gɔ nɛ mu yoi bee ye, mu wogɔ nɛ tujɔ bɛbɛɛbɔn. Kaa birɛ gɔ mu bɛrɛ sagu duduurin dɛi, birɛ ga mu bɛrɛ waajibi. 18Nɛɛ, wogɔ nɛ tujɔ mu bɛɛjɛ gɔ ingei? Kibɛru Ɛju taganɛ tinɛ bɛɛjɛ gɔ dɛnɛlu go, bamai kɛɛlɛ wɔlɔ go Kibɛru Ɛju tagaa ye kinɛ kaalu mu bɛɛjɛ gɔ, wogɔ tujɔ ma gɔ woi. 19Mu inɛ turu kanran gunɔ nɛ toloun. Kaa inɛw joo bɛɛ dɛi, mu mui inɛw puu gunɔnɛi bojaa wɔun. 20Yahutunw gɔbe logoro nɛ, bei bɛɛ ga, mu mui Yahutunɛi gin’ bojojɔn. Halu Mɔise tɔɔru kuu ma nɛ gɔnrɔn sɛlɛ kanran, inɛw Mɔise tɔɔru le yaaɲu logoro nɛ yowaai ye, bei bɛɛ ga mu Mɔise tɔɔru le yaauwɔn gin’ biyɛjɔn. 21Iyaa, inɛw Mɔise tɔɔru inin logoro nɛ yowaaun ye, bei bɛɛ ga, be gin’ Tɔɔru wogɔ kuu ma nɛ wɔlɔ gin’ biyɛjɔn. Kaa kɔɔ dɛi giye, Ama tɔɔru le yabalun gin’ wɔlɔn. Waajibi Kirisito tɔɔru kuu ma nɛ yadaan. 22Inɛw gagawu nɛ paŋa sɛnɛ gɔbei bɛɛ ga, mu yaa gagawu nɛ paŋa sɛlɛ gin’ biyɛjɔn. Kunrin, yani biyaai kanran, inɛw gamuui yabu bɛɛ ga, mu mui inɛw puu bɛrɛ kijɛ puui bojojɔn. 23Kɔɔbe puu mu Kibɛru Ɛju gɔ dɛi kanranjɔn. Kibɛru Ɛju tinɛ gɔ nɛ kuru ma bɛɛ ga kanranjɔn. 24Tunmɔ galu jobu nɛ, inɛw gɔ puu jobu jɔjɔbɔɲu. Kaa inɛ turu sai giru galaai ye tujɔ gɔ bɛɛjɛ ga e inin ma? Tujɔ gɔ bana e bɛɛido gin’ jobu gɔ yinjɔbɔi. 25Jobu jɔbɔnw puu, jobu gɔ bɛɛ ga dadaaru joo nɛ kuu unrunbemɛ ɛjii ahaaɲu. Aduna ɔn domɔ tanwaanlɛ gɔ bɛɛdɛin ga, be kɔɔ kanranɲu. Kaa emɛ domɔ asuu wɔɔ dɛi kanranɲu. 26Wogɔ digɛu, mu jobu kale yalu gɔ nɛ giri dɛɛraa jɔbɔuwɔn. Numɔ kumi le tunmɔ girupala laganw gin’ jai jaiyɛuwɔn. Kaa mu para salai lagauwɔlɔn. 27Inɛw wajunw bɛrɛ waaju tagati ye, mu le yabanɛ giye, mui kamu titiimɔ ma liyɛuwɔn dɛi, mu goju ma bɛrɛ bɔnrɔn joo dɔdɔɔnɔjɔn, sɛɛu goju ma gɔgɔnrɔnjɔn.

will be added

X\