KƆRƐNTE PƆLƆ 8

1Nɛɛ, ɔmɔlɔ nɛ nawan sɛnwaanɲu sibɛ go, sɔɔ marun yɛnɛmɔi. Narain, “Emɛ puu jugɔ yasin” ga emɛ igii wɔin. Kaa jugɔ wogɔ, kuu ulo le inɛi joonɔjɛ. Kaa ihibɛ, gagawu sibɛ go inɛ waja paŋa babariyɛmɔjɛ. 2Inɛ turu unrun jugɔ yasɛ ga wɔɔ ye, wo nimɛ kanran bana kijɛ jugɔun jaan gin’ jugɔlu. 3Kaa, inɛ Amai ibɛɛ wɔɔ gɔ, Ama wogɔ baŋai igii wɔɔ. 4Nɛɛ, ɔmɔlɔ nɛ nawan sɛnwaanɲu, tɛnwɛun jaain wɔɔ ma, jaanla? Ɔmɔlɔ, aduna nɛ kijɛ nanaai laa ga emɛ puu igii wɔin. Ama koturu sai wɔɔ ga yaa emɛ igii wɔin. 5Halu inɛw gamuu ama tɔgu dɛin dɛin, alagala nɛ lee, minɛ nɛ lee bojaa, ama joo, inɛw baŋabe joo wɔin kanran, 6emɛ kai Ama koturu sai wɔɔ ga jugɔɲu. Wogɔ emɛ Ba gɔ woi. Kijɛ puu wo maŋu. Emɛ wo ga wɔin. Inɛw Baŋa yaa koturu sai wɔɔ. Wogɔ Yesu Kirisitoi. Kijɛ puu wo le maŋi. Emɛ wo dɛi ɔnmɔi wɔin. 7Kaa inɛw puu sɔɔ kɔɔ inin. Inɛw gamuu ɔmɔlɔ sɔɔ le wɛɛjiyaa gabaa, halu iye dɔɔ, nawan kɔɔ tunmɔ tɛnwɛnnu, nawan gɔ ɔmɔlɔ mɔi gin’ be bɛrɛ wɔɔ. Nimɛ kanran, wogɔ sibɛ go kinɛjugɔ bemɛ gɔnrɔn sɛlɛ digɛu, be kinɛ yanwan le biyɛɲu. 8Kaa kayɛrɛ, Ama le emi bɛruniyɛnmɔ bɛɛlɛ. Emɛ, kayɛrɛ kayanɛ kanran, Ama sibɛ nɛ emi kijɛ nɛ gamiyɛnjɛ wɔlɔ. Kayɛrɛ kayaaɲu kanran, Ama sibɛ go emi kijɛ nɛ bariyɛjɛ wɔlɔ. 9Kaa kokanran, kuu kajubu le biyɛi. E bɛrɛ gaju wɔlɔ giye kijɛ e kanranjɛ gɔ le digɛnu, inɛw gagawu nɛ paŋa sɛnɛ gɔbei hakɛ nɛ numɔ yoomɔnɔugi. 10U inɛ jugɔ sɛɛi ga wɔɔ gɔ, ɔmɔlɔ turu ginrun nɛ, jaa u kayau, inɛ kinɛjugɔ nɛ gaai paŋa sɛlɛ turu iyaajɛ ye, wogɔ woi damaa ye ɔmɔlɔ bɛrɛ nawan sɛnwaanɲu tɛnwɛnmɔidolo ma? 11Kunrin, inɛ gagawu nɛ paŋa sɛlɛ kɔɔ, Kirisito bainɛ dɛi yinwun kɔɔ, jugɔ uwɔ dɛi susuiyodo. 12E ba unrunw bɛrɛ kunrin hakɛ kanraun, kinɛjugɔ gɔnrɔn sɛlɛ bemɛ barumau e wɔɔ gɔ, e Kirisito bɛrɛ tee hakɛ kanraunwɔi ga jugɔi. 13Wogɔ digɛu, nawan mu tɛnwɛnjɛ dɛi, mu bainɛi damaa ye hakɛ nɛ kunɔjɛ ye, womaa hakɛ nɛ yoonɔu giye, mu asuu nawan tɛnwɛindolɔn.

will be added

X\