KƆRƐNTE PƆLƆ 6

1Logoro ebe nɛ, inɛ turu baŋa, inɛ waja le sɔɔ biyaajɛ ye, wo Ama inɛw pajaatiyaa ye, aduna saliyɛkirenw bɛrɛ yani yai bɛɛjɛ? 2Ama inɛw gɔbe, aduna saliyɛ be kiredo ga e inin ma? Nɛɛ aduna saliyɛ e kiredo biyaai ye, sɔɔ uji giru goonu e bɛɛun jaanla ma? 3Aduna ɔn sɔɔbe saliyɛi laa koi, halu mɛlɛnkɛbe saliyɛ emɛ kiredo ga e inin ma? 4Kaa e tunmɔ le sɔɔ biyaajɛi ye, inɛw, Ama inɛw mɔɔnu sɔɔ be le digɛla bɛrɛ yai ye sɔɔ gɔ giru goonɔmɔjɛi. 5Ei dɔgɔ aa dɛi sɔɔjɔn. Waajibi logoro ebe nɛ, ba unrunw le sɔɔ yegere ga, inɛ turu hakilɛ sɛɛ kai yato. 6Nɛɛ kɔɔi biyaa ye, bainɛ turu, bainɛ wajai dimɛrɛn ye, saliyɛkirenw Ama le gawanɛ bɛrɛ yaaun jaain wɔɔ ma? 7Naran go, tunmɔ le saliyɛ sɔɔ e sɛɛ gɔ dɛi, kanɛ baa ei numaai sɛɛrɛi. Tunmɔ le saliyɛ yoo dɛi, inge dɛi teitai laa e bɛrɛ kanranɲu gɔ muyɔindelei wɔi? Inge dɛi ei pajaa ye punɔmɔidelei ma? 8Kaa wogɔ gin’ kanran dɛi, e ba unrunw bɛrɛ, teitai laa gɔ lee, bei punu birɛ gɔ lee, e birɛjɛ. 9Koi ye, mɔɲu kanranw gɔbe Ama diinɛ kɛn bɛɛidenɛ ga e inin ma? Kuu ebe lelemɔnɔugi: Salagunw lee, ɔmɔlɔ bulonw lee, dimudimiyɛnw lee, anranw be tunmɔ dɛnɛw lee, 10gugunyɔnw lee, giru kakalagunw lee, kɔɲɔnɔɔw lee, duyɔ duyɔnw lee, kuu numɔ numɔw lee, inɛw kɔɔbe tunmɔ turu kanran Ama diinɛ kɛn bɛɛidenɛ. 11Logoro ebe nɛ e inɛw gamuu kunrin bei. Kaa hakɛ nɛ ei mɔŋaaɲu, ei dɛiin Ama mɔi bojaaɲu, ei teitai bojaaɲu. Kɔɔbe puu Inɛw Baŋa Yesu Kirisito boi le, iyaa, Ama emɛ Kikinu gɔnrɔn le e bɛrɛ kanrin. 12Logoro ebe nɛ inɛw gamuu ɔn gin’ gɛɛɲu: «Mu kijɛ puu kanrun bɛbɛɛjɔn.» Kaa kijɛ puu niwɛn tolo. Maa «Mu kijɛ puu kanrun bɛbɛɛjɔn.» Kaa mu kijɛ turu kanran gunɔi biyɛ ga yabaidolɔn. 13Inɛw gamuu sɔwaa ye, kayɛrɛ bɛrɛ dɛi wɔɔ, bɛrɛ kayɛrɛ dɛi wɔɔ gɛɛɲu. Kaa kolɛi kɛu puu Ama bei susuyodo. Kaa inɛ goju gɔ, sala dɛi maŋanɛ. Goju, Inɛw Baŋa mɔi. Iyaa Inɛw Baŋa, goju mɔi. 14Ama, Inɛw Baŋai yiun nɛ bulugaa wo goonu gin’, emi yaa kunrin gɔnrɔn unrunmɔ le bubulugodo. 15Goju ebe gɔ, Kirisito goju, digɛ dɛin dɛiin ga e inin ma? Nɛɛ, mu Kirisito goju digɛ gɔ jeɲɛ ye, yaanran dimu le kayanɛ goju digɛi bojodɔn ma? Asuu. 16Koi ye, yaanran dimu le kayanɛ le ainɛ yoojɛ, wo le goju turu taŋajɛ ga e inin ma? Ama Dɔn kijɛ gi: “Be lɛi inɛ turu taŋaɲu.” 17Kaa Inɛw Baŋa le inɛ mɔrinyɛnjɛ gɔ, Inɛw Baŋa le kikinu sibɛ go, turu biyɛjɛ. 18Sala dɛi jɔbɔi. Hakɛ waja turu kanran le, inɛ, goju womɔ lɔgɔjiyɛmɔɔlɛ. Puu, goju womɔ le digɛla. Kaa inɛ kuu unrunmɔ sala nɛ obojɛ gɔ, goju womɔi hakɛ nɛ kunɔjɛ. 19Goju ebe gɔ, Kikinu Pilu ginruin ga e inin ma? Kikinu Pilu e nɛ yato. E woi Ama bɛrɛ bɛii. Kuu ebe ebei laa, kaa Ama, dɔnrun kunaa ei ɛbaajɛ ga e inin ma? Ama dɔnrun tujaa ei ɛbu. Wogɔ digɛu, goju ebe le Amai babai.

will be added

X\