KƆRƐNTE PƆLƆ 2

1Mu kai, ba unrunw, Ama sɔɔ boŋurun e bɛrɛ waaru tagai mu wɛi le, mu sɔɔ sigɛ le ma, jaŋu diyɛ sɔɔ le ma wɛɛlun. 2Logoro ebe nɛ waaru mu tobe le, Yesu Kirisito sɔɔi laa ye, sigɛ le baga jai nɛ wo yinwun sɔɔi laa ye, mu kijɛ waja sɔɔ sɔɔ ga dɛnɛlun. 3Wogɔ digɛu, logoro ebe nɛ tou, mu yɛbɛlɛ le bɔun, liliyɛ le bɔun, goju kinwun diyɛ le bɔun. 4Inɛw, hakilɛ bemɛ le sɔɔ yegeraa ye, ɛjii sɔɔɲu gin’ sɔɔ ma nɛ lee, waaju ma nɛ lee, mu wogɔ gin’ e le sɔɔlun. Kaa Ama Kikinu gɔnrɔn bana iyemɔido gin’ e le sɔwaabɔn. 5Gagawu ebe bɔlɔtei gɔ, inɛw hakilɛ sɔɔ nɛ biyɛnɔu, kaa Ama gɔnrɔn kuu nɛ biyɛ ga, mu kɔɔ gin’ sɔwaabɔn. 6Kokanran, emɛ gagawu sibɛ go inɛw giru yaa wɔin bɛrɛ hakilɛ too waaju kakanranɲu. Kaa hakilɛ wogɔ, aduna ɔn hakilɛ sɔɔi laa. Aduna ɔn kuu bɛɛnw hakilɛ sɔɔi kanran laa. Gɔnrɔn bemɛ gɔ puu susuiyodo. 7Hakilɛ sɔɔ emɛ sɔɔjɛ gɔ, wogɔ Ama hakilɛ sɔɔi. Inɛw bɛrɛ wogɔ kijɛ baŋiyaan wɔɔi. Kaa aduna maŋamɔ nɛ baa, emaa Ama dooro le biyɛ ga, Ama hakilɛ wo yɛmu gɔ woi. 8Aduna ɔn kuu bɛɛnnɛ turu kanran hakilɛ wogɔ inɛɛ. Be hakilɛ wogɔ jugaabɛin ye, dooro baŋa gɔi baga jai nɛ pɛgɛbenɛ. 9Yɛnɛi, Ama Dɔn nɛ kijɛ tɔŋɔ unwɔ: “Giri kijɛ iyetɛlu gɔ, suguru kijɛ ɛgɛtɛlu gɔ, inɛ ajubu nɛ kijɛ dɔɔtɛlu gɔ, kijɛ wogɔbe, Ama, inɛw woi ibɛɛ wɔin dɛi yegeraa sɛɛ.” 10Kaa emɛ bɛrɛ, Ama, Kikinu unrunmɔ le digɛu kijɛ kɔɔbe tagaraajɛ. Kikinu gɔ kijɛ puu lubo yɛyɛnɛjɛ, kijɛ puu igii wɔɔ. Halu Ama ajubu too gɔbe igii wɔɔ. 11Adama ii ajubu jugɔnɛ gɔ aai? Kikinu womɔi laa ye yɔɔ ma? Kɔɔ bana wɔɔ gin’, Ama sibɛ go yaa, Ama Kikinui laa ye, Ama ajubu jugɔnɛ wɔlɔ. 12Nɛɛ emɛ, Kikinu emɛ bɛi gɔ, aduna ɔn kikinui laa. Kaa Kikinu emɛ sɛɛ gɔ Ama bɛrɛ goi. Ama, emɛ bɛrɛ sin wo kanrun puu emaa jugɔ bɛɛ ga, Kikinu womɔ emɛ bɛrɛ tii. 13Wogɔ digɛu, sɔɔ kɔɔbe kuu nɛ waaru sɔɔ emɛ sɔɔjɛ, sɔɔ emɛ gɔ Adama ii jaŋu hakilɛ sɔɔi laa. Kaa Ama Kikinu emɛ bɛrɛ bana deerejɛ gin’ sɔɔɲu. Inɛw Ama Kikinu sɛin gɔbe bɛrɛ deeru obonu, Kikinu sɔɔ obojɛ jeɲaa ye, kole be le sɔɔɲu. 14Inɛ Ama Kikinu sɛlɛ gɔ, Kikinu sɔɔ le yabu bɛɛlɛ. Wo sibɛ nɛ wogɔ bomɔ sɔɔi. Iyaa, sɔɔ wogɔbe Kikinu le digɛnu kabu kunu bɛɛmɔjɛ digɛu, wo wogɔbe jugɔ bɛɛlɛ. 15Kaa Ama Kikinu inɛ woi teeremɔjɛ gɔ, wo kijɛ puu kabu kunu bɛbɛɛjɛ. Kaa inɛw wajunw sɔɔ womɔ gɔ paamu kanrun bɛɛnɛ. 16Ama Dɔn kijɛ gi: “Inɛ aa Inɛw Baŋa Ama ajubu gɔbe igii wɔɔ ma? Inɛ aa woi tinwinrun bɛɛjɛ ma?” Kaa, emɛ kai, Kirisito ajubu sɛɛ gɔ woi sɛin.

will be added

X\