KƆRƐNTE PƆLƆ 16

1Ama inɛw gɔbei bara ga, buudu mɔɔnɔu wɔin gɔ sibɛ nɛ, Galasi gana Ama inɛw mɔɔnu gɔbe bɛrɛ bana mu tɔɔru gin’, e yaa kunrin kanrain. 2Buudu sɛgu gɔ mu dɔwaaun ye biyɛnɔu ga, jugu bai pɔlɔ puu, inɛ tuturu wooi, kijɛ bana wo bɛi le kɛukɛu, buudu dɛiin ginrun nɛ goonu bojo. 3Waaru mu wiyaajɛ, inɛw e yɛmɛido gɔbe, mu be dɛi lɛtɛrɛ tɔŋaa obaa ye, sin obu ebe gɔ le bei Jerusalɛmu yintiidɔn. 4Kuu ma le mu yaaun gin’ wɔɔ ye kanran, inɛw e yɛmu gɔbe mu le yayaadɛin. 5Mu Maseduanɛ gana kɛjɛ tataŋadɔn. Gana wogɔ kɛjaa taŋaa ye, kunrin e bɛrɛ wɛɛdɔn. 6Mu waaru gaila logoro ebe nɛ totoiyodɔn biyɛdo. Halu kaali waaru gɔ puu e le kanrandɔn biyɛdo. Kunrin, yalu yaa mu ibɛ nɛ yaa ga e mui baru bɛbɛɛdei. 7Iye mɔ ɔn, oju galanu sai e bɛrɛ waŋaa ye koi kanran ibɛlaun. Inɛw Baŋa yabaajɛ ye, mu bai gaila e le bii ibɛɛ wɔun. 8Kaa, Pantekɔte janwan dɔɔido baa, mu Epɛse ana nɛ unbiyɛdɔn. 9Halu jaŋuw gɔbe jooi wɔin kanran, birɛ diyɛ birɛ ga, ɔn nɛ mu dɛi taan gɔ gaai pinɛlaa wɔɔ. 10Timɔte e bɛrɛ wɛwɛi ye, logoro ebe nɛ liyɛ sɛlɛ go wo biyɛmɔi. Sabu wo kanran, mu gin’, Inɛw Baŋa birɛ nɛ too. 11Inɛ turu kanran woi gailiyɛmɔnɔu. Kaa woi baraa ye, jamu le mu bɛrɛ dɔɔ ga woi niinɛi. Wo lee, ba unrunw wajunw gɔbe lee, mu bei dɔmiyaan wɔun. 12Bainɛ Apɔlɔsu kai, mu kubɔ joo woi gɛnyaan, ba unrunw gɔbe le ei yai yɛnɛ giyaabɔn. Kaa kanɛ kai, wo e bɛrɛ yaai goolu. Waaru ɛju biyaajɛ ye, wo e bɛrɛ wɛwɛɛdo. 13Ba unrunw, inɛ giri yeiyaa wɔɔ gin’ biyɛnɔugi. Gagawu nɛ ɛɛn go biyɛi, anrangaju le biyɛi, paŋa siyɛi. 14Logoro ebe nɛ, kijɛ puu, ihibɛ le kanrain. 15Ba unrunw, tinwinrun waja kanran unwɔ: Sutepanasu lee, wo maranw lee, e sɔɔ bemɛ igii wɔi. Akayi gana nɛ be laa tubu yoin. Be iyaa Ama inɛw dɛi ɛjii birɛ biraabɛin. 16Inɛw kɔɔbe tunmɔ lee, be le mɔrinyaan, inɛw ɛjii birɛ birɛɲu gɔbe lee, be le tubiyei. 17Sutepanasu lee, Pɔrutunatusu lee, Akayikusu lee, mui yɛnɛi be wɛi gɔ, ɛjii kinɛ ma aabe. E ɔn nɛ yabei ye, kijɛ mu bɛrɛ kanrando ga e bee gɔ puu, be kanraantin. 18Sabu be kinɛ ma kaaliyɛmaa, kinɛ ebe yaa kaaliyɛmaatin. Inɛw ɛju kɔɔ tunmɔbei e kajubaun jaain wɔɔ. 19Rɔmɛ laamu Asi numɔ Ama inɛw mɔɔnu gɔbe ei poonɔuwɔin. Akilasu lee, Pirisilu lee, Ama inɛw mɔɔnu ginrun bemɛ nɛ mɔrinyɛnjɛ gɔ lee, Inɛw Baŋa boi le ei ɛjii poonɔuwɔin. 20Ba unrunw ɔn nɛ wɔin gɔ puu ei poonɔuwɔin. Ama inɛw gin’ ihibɛ le tunmɔi poonɔi. 21Mu Pɔlu, numɔ ma le poo ɔnbe mu tɔŋɔuwɔ. 22Inɛ, Inɛw Baŋai ibɛla gɔ, jebu wo le wɔɔ. Maranata! ee, Inɛw Baŋa emɛ wɛɛ. 23Inɛw Baŋa Yesu nɛɛma gɔ e le biyɛ. 24Mu Kirisito Yesu nɛ e puui ibɛɛ wɔun.

will be added

X\