KƆRƐNTE PƆLƆ 14

1Kijɛ puu dɛi sigɛ ihibɛ nɛ giri dɛɛraajɛi ye, woi dɛnɛi. Kaa Ama Kikinu sin obu wajunw gɔbe yaa ɛjii daariyɛi. Sigɛ le Ama bɛrɛ sɔɔ goi sɔi sin obu daariyɛi. 2Sabu sɔɔ inɛmɔ le inɛ sɔɔ sɔɔjɛ, inɛ turu kanran sɔɔ womɔ ɛgɛɛlɛ gɔ digɛu, wo sɔɔ womɔ inɛw le sɔɔuwɔlɔ, kaa Ama le sɔɔuwɔ. Wo Ama Kikinu gɔnrɔn le, sɔɔ boŋurun sɔɔuwɔ. 3Kaa, Ama bɛrɛ sɔɔ goi inɛ sɔɔjɛ gɔ, inɛw le sɔɔuwɔ. Wo sɔɔ womɔ gɔ le inɛwin babariyɛmɔjɛ, anrangaju ohobojɛ, kinɛ kakaaliyɛmɔjɛ. 4Inɛ sɔɔ inɛmɔ sɔɔjɛ baŋa gɔ, kuu unrunmɔi sai bariyɛmɔjɛ. Kaa Ama bɛrɛ sɔɔ goi inɛ sɔɔjɛ, Ama inɛw mɔɔnu puu bariyɛmɔjɛ. 5E wooi puu sɔɔ inɛmɔ sɔi sin obu bɛɛ ga mu ibɛɛ wɔun. Kaa kɔɔ dɛi sigɛ, Ama bɛrɛ sɔɔ goi sɔi sin obu e bɛi ye, mu dɛnɛjɔn. Inɛ sɔɔ inɛmɔ sɔɔnɛ, sɔɔ gɔ tiyɛ tagaa ye, Ama inɛw mɔɔnu gɔi babariyɛmɔjɛ ye, ɛjii wɔɔ. Kɔɔi laa ye, Ama bɛrɛ sɔɔ goi inɛ sɔɔjɛ wo dɛi sigɛ niwɛn sɛɛ. 6Ba unrunw, e bɛrɛ selumɛuwɔn: Sɔɔ inɛmɔ e bɛrɛ wiyaa sɔwaajɔn ye, e bɛrɛ inge niwɛin sɛɛ? Kaa Ama mu bɛrɛ sɔɔ jugɔmu turu le ma, jugɔ sɔɔ turu le ma, Ama bɛrɛ sɔɔ goi turu le ma, deeru turu le ma e bɛrɛ wiyaajɔn ye, mui e bɛrɛ niwɛn yato. 7Ajubu yɛnɛi, kijɛ nii nii, kere gin’ ma, kɔni gin’ ma, mii bemɛ kabu kunu bɛɛmɔɔlɛ biyaai ye, kijɛ be gɛɛjɛ gɔ yani paamu kanrun bɛɛmɔdo? 8Iyaa kaan sujɔnɛ, kaan gɔ, tiyɛ le sujɔɔlɛ ye, sɔludasu ii aa kɔmɔ taa ga unruin yegeredo? 9Kɔɔ bana wɔɔ gin’, sɔɔ inɛmɔ le sɔɔ e sɔɔjɛ gɔ ɛjɛlu ye, kijɛ e gɛɛjɛ gɔ aa paamu kanrando? E sɔɔ ebe ooɲɔ le sɔii. 10Aduna nɛ sɔɔ tɔgu dɛin dɛin jooi wɔɔ. Kaa puu ɛhɛgɛmɔjɛ, tiyɛ yasin. 11Kaa mu inɛ turu sɔɔ ɛgɛɛlɔn ye, inɛ wogɔ mu bɛrɛ yerunɛi. Wo bɛrɛ yaa mui yerunɛi. 12E Ama Kikinu sin obu gɔbe daariyɛjɛi digɛu, sigɛ le sin obu Ama inɛw mɔɔnu bariyɛmɔjɛ gɔ, wogɔbe joo dɛnɛi. 13Wogɔ digɛu, u sɔɔ inɛmɔ sɔɔnɛ gɔ, sɔɔ inɛmɔ tiyɛ taga bɛɛ sin obu bɛɛ ga, Ama gɛɛn. 14Kɔɔi laa ye, sɔɔ inɛmɔ le mu Ama gɛɛnjɔn ye, narain, kikinu ma amagɛɛn nɛ too, kaa, hakilɛ wogɔ nɛ tolo. 15Kɔɔ biyaai ye mu yani kanrandɔn? Kikinu ma le Ama gɛgɛɛndɔn, iyaa hakilɛ ma le yaa gɛgɛɛndɔn. Mu kikinu ma le nii niniidɔn, hakilɛ ma le yaa niniidɔn. 16Kɔɔ gin’ wɔlɔ biyaa ye, Amai birɛpoo taganu, u kikinu sai le sɔɔjɛu ye, inɛ waja mɔɔnu nɛ daan gɔ, sɔɔ u gi gɔ inɛɛ wɔnu, wo Amai birɛpoo tagu uwɔ dɛi amina yani gɛɛ bɛɛdo? 17Amai birɛpoo tagu uwɔ sɔɔ yani baa ɛjii bee kanran, woi kijɛ nɛ bari turu kanran wɔlɔ. 18Mu e puu dɛi sigɛ sɔɔ inɛmɔ sɔɔjɔn gɔ dɛi Ama birɛ poo. 19Kaa Ama inɛw mɔɔnu nɛ, sɔɔ inɛmɔ le sɔɔ muɲu joo sɔɔ dɛi, inɛw deere ga, mu bɛrɛ sɔɔ inɛw paamu kanranjɛ, sɔɔ ii numɔrɔn sɔɔ ire. 20Ba unrunw, sɔɔ bana e iyejɛ sibɛ nɛ unrunw gin’ biyɛnɔugi. Mɔmɔɲu sibɛ go unrunw gin’ biyɛi, kaa, sɔɔ paamu kanrun nɛ anranw kibaain biyɛi. 21Tɔɔru dɔn nɛ kijɛ tɔŋɔ unwɔ: “Inɛw Baŋa Ama kijɛ gi: ‘Mu sɔɔ dɛin sɔɔnw le tɔgu ɔn le sɔɔ sɔɔdɔn. Tɔgu waja inɛw le be le sɔɔdɔn. Kaa kɔɔ wooi nɛ, be mui keŋiyɛindenɛ.’” 22Nɛɛ kɔɔ gin’ wɔɔ biyaai ye, sɔɔ inɛmɔ sɔi gɔ, inɛw gawanɛbe sɛɛrɛi. Inɛw gawaaɲu bɛrɛ, sɛɛrɛi laa. Kaa Ama bɛrɛ sɔɔ goi sɔi gɔ, wogɔ inɛw gawaaɲu sɛɛrɛi. Inɛw gawanɛbe bɛrɛ sɛɛrɛi laa. 23Nɛɛ, Ama inɛw mɔɔnu puu nɛ, inɛw gɔ puu sɔɔ inɛmɔ sɔɔnu be wɔnu, jaŋu unrunw wajabe ma, inɛw jaŋu unrunwin laain ma wiyaa tɛmaaɲu ye, be ebaa weje ulaain gɛɛidenɛ ma? 24Kaa e puu Ama bɛrɛ sɔɔ goi sɔɔnu e wɔnu, jaŋu ii waja ma, inɛ jaŋu ii laa ma, logoro ebe nɛ wiyaa yowaai ye, sɔɔ ebe gɔ, hakɛ womɔ wo bɛrɛ jujugɔmɔdo, iyaa woi jajarugado, 25kinɛ womɔ nɛ sɔɔ baŋaraan wo sɛɛ gɔ puu ɛlu gogoodo. Kɔɔ waaru le, wo numaa sugaa ye, girupala minɛ nɛ dujaa gɛlɛnu, Amai bababado. Iyaa, naran go Ama logoro ebe nɛ yato gɛgɛɛdo. 26Nɛɛ ba unrunw, yani wɔɔ? Ama baba ga waaru e mɔrinyaanjɛ, inɛ turu Amai birɛpoo tagu nii sɛɛ, inɛ waja mɔ deerui, inɛ waja mɔ Ama wo bɛrɛ sɔɔ jugɔmui, inɛ waja mɔ sɔɔ inɛmɔ sɔii, inɛ waja mɔ sɔɔ inɛmɔ tiyɛ tagi. Kɔɔ wooi, Ama inɛw mɔɔnu paŋa bariyɛmu sɔɔi biyɛmɔi. 27Sɔɔ inɛmɔ le Ama sɔɔ sɔɔɲu ye, dinrɛn le dinrɛn le, inɛw lɛi ma, taanu ma dɛi joo biyɛmɔnɔugi. Iyaa, inɛ turu sɔɔ gɔ tiyɛ wo tagamɔi. 28Kaa sɔɔ gɔ tiyɛ inɛ taganɛ wɔlɔ ye, sɔɔ inɛmɔ sɔɔnɛ gɔ Ama inɛw mɔɔnu logoro nɛ kelemu wo biyɛmɔ. Baŋa kuu womɔ lee, Ama lee bɛrɛ wo sɔɔmɔ. 29Inɛw Ama titiyaanw, inɛw lɛi ma, taanu ma sɔɔ be sɔɔmɔi. Wajunw gɔbe sɔɔ bemɛ gɔ marun be yɛnɛmɔi. 30Kaa sɔɔ u sɔɔnu, inɛ waja dɛinyaan wɔɔ bɛrɛ, Ama, sɔɔ turu jugɔmaajɛ ye, u inɛ laa baŋa gɔ kelemu biyɛ. 31Inɛw gɔ puui deere ye, anrangaju obo ga, e wooi puu dinrɛn le dinrɛn le, Ama bɛrɛ sɔɔ goi sɔɔ bɛbɛɛdei. 32Ama, oju sɛlɛ go wɔlɔ. Wo jamu Amai. Wogɔ digɛu, inɛ Ama titiyainɛ gɔ, sin obu wo sɛɛ gɔi gɔgɔnrɔnjɛ. Ama inɛw mɔɔnu puu nɛ bana kanranɲu gin’, 34mɔɔnu nɛ, yaanw gɔbe kelemu be biyɛmɔi. Sɔɔ sɔɔ ga be bɛrɛ tɔɔrɔnɛ. Tɔɔru bana gɛɛjɛ le kɛukɛu, tubi ye be biyɛmɔi. 35Be sɔɔ turu paamu kanrun ibɛɛ wɔin ye, ginrun yaa ye be igɛ bɛrɛ selumɛ. Sabu yaanran, Ama inɛw mɔɔnu nɛ sɔɔ sɔɔ ga, wogɔ dɔgɔi. 36Maa, Ama sɔɔ gɔ ebe nɛ goi ma? Maa e bɛrɛ sai Ama sɔɔ dɔi? 37Inɛ turu, unruin inɛ Ama titiyainɛi ga wɔɔ ma, Ama Kikinu sin obu turu yasɛ ga wɔɔ ma biyaai ye, e bɛrɛ sɔɔ tɔŋaa mu tiijɛ ɔn, Inɛw Baŋa tɔɔru turui ga baŋa wo jugɔ. 38Kaa inɛ turu wogɔ jugaa bɛɛlu ye, woi yapajai, woi lugonɔugi. 39Ba unrunw mabe, Ama bɛrɛ sɔɔ goi sɔi sin obu gɔ daariyɛi. Kaa sɔɔ inɛmɔ sɔi sin obu gɔ yaa tɛŋɛnɔugi. 40Sɔɔ gɔ puu oju le ɛjii kanrain.

will be added

X\