KƆRƐNTE PƆLƆ 13

1Halu mu inɛw sɔɔ sɔɔɲu ma, mɛlɛnkɛbe sɔɔ sɔɔɲu ma sɔsɔɔjɔn kanran, ihibɛ sɛlɔn ye, sɔɔ ma inrun ma, gaŋaran ma, siɲɛ gin’ wɔɔ. 2Halu mu Ama bɛrɛ sɔɔ goii sɔɔjɔn kanran, halu jugɔ puu lee, kijɛ boŋurun puu lee igii wɔun kanran, halu gagawu diyɛ kokoo yalu womɔ nɛ goonɔjɛ yasɔn kanran, ihibɛ sɛlɔn ye, mui kijɛ kanmai laa. 3Halu mu arusɛgɛ ma puu dɛgugunw bɛrɛ gamalaa obaajɔn kanran, halu goju ma tɛgɛrɛ ga obaajɔn kanran, ihibɛ sɛlɔn ye, wogɔ mu bɛrɛ niwɛn turu kanran sɛlɛ. 4Ihibɛ muyɔn yasɛ. Ihibɛ ɛhɛju le jowaa wɔɔ, inɛ waja kijɛ daariyɛɛlɛ. Kuu unrunmɔ unɔɔlɛ, kuu ulo sɛlɛ. 5Ihibɛ kijɛ dagalu turu kanran kanraanlɛ, kuu unrunmɔ too tee toolɛ, kinɛbanrun sɛlɛ, ajubu mɔɲu sɛlɛ. 6Ihibɛ teitai laa dɛi kinɛ ɛɛliyɛmɔɔlɛ. Kaa naran dɛi kinɛ ɛhɛɛliyɛmɔjɛ. 7Ihibɛ sɔɔ puu mumuyɔnjɛ, kijɛ wooi nɛ, ihibɛ gagawu le biyɛjɛ, kijɛ wooi nɛ diyɛdɔn le biyɛjɛ, kijɛ wooi tatariyɛjɛ. 8Ama bɛrɛ sɔɔ goi sɔi bai turu dodogodo, sɔɔ inɛmɔ sɔi dodogodo, jugɔ dodogodo, kaa ihibɛ asuu sɔsɔgɔjɛ. 9Emɛ kijɛ puu sɛɛu jugaa wɔnɛ, jugɔ emɛ kibelu. Ama bɛrɛ sɔɔ goi emɛ sɔɔjɛ gɔ yaa kibelu. 10Kaa kijɛ kibaai gɔ waaru wiyaajɛ, kijɛ kibelu gɔ mamanado. 11Waaru dagi mu bee le, mu ii dagi bana le kɛukɛu sɔɔ sɔɔubɔn, ii dagi bana le kɛukɛu sɔɔ iyeubɔn, ii dagi bana gin’ ajubu ajubaubɔn. Kaa waaru inɛ na mu taŋu le, mu ii bana gɔ pajaatun. 12Kanɛ kijɛ bana emɛ iyejɛ gɔ purugi wɔɔ. Kikinu yɛni nɛ kijɛ emɛ yɛnɛjɛ gin’ wɔɔ. Kaa bai turu, emɛ giri le giri le kijɛ ihiyedɛin. Iye, jugɔ emɛ kibelu. Kaa bai turu, emɛ sɛɛu sɔɔ jujugɔdɛin. Ama bana sɛɛu mui jugɔjɛ gin’, mu yaa kunrin kijɛ jujugɔdɔn. 13Nɛɛ, kijɛ taanu ɔnbe sɔsɔgɔɲu: Gagawu lee, diyɛdɔn lee, ihibɛ lee. Kaa be taanu logoro nɛ, diyɛnɛ gɔ ihibɛi.

will be added

X\