KƆRƐNTE PƆLƆ 12

1Ba unrunw, nɛɛ, Ama Kikinu sin obu gɔbe sibɛ go, sɔɔ jugɔlu go e bii ye mu ibɛlaun. 2Waaru Ama inin e bee le, ɔmɔlɔ sɔɔ sɔi bɛɛnɛ, suguru ɛgɛɛnɛ tɔgu dɛin dɛin bɛrɛ diŋɛ ebe tolo go, bana e yaabe e igii wɔi. 3Wogɔ digɛu, sɔɔ ɔn ɛjii jugɔi: Inɛ turu kanran, Ama Kikinu gɔnrɔn le sɔɔ sɔɔjɛ ye, Yesui jɛbaaɲu gɛɛ bɛɛidolo. Iyaa inɛ turu kanran, Kikinu Pilu gɔnrɔn le laa ye, Yesui Inɛw Baŋai gɛɛ bɛɛidolo. 4Ama Kikinu sin obu gɔbe, tɔgu dɛin dɛin jooi wɔin. Kaa wogɔbe puu Kikinu turu gɔ obojɛ. 5Birɛ bana birɛɲu gɔ tɔgu dɛin dɛin jooi wɔɔ. Kaa Inɛw Baŋa turu gɔ dɛi birɛɲu. 6Birɛ gɔbe yaa tɔgu dɛin dɛin wɔɔ. Kaa Ama turu gɔ, inɛw wooi bɛrɛ, kɔɔ puu gɔnrɔn gɔ wo obojɛ. 7Inɛw puu niwɛn dɛi, Ama Kikinu, inɛ tuturu bɛrɛ sin obu wo obojɛ le digɛnu unruin tagarajɛ. 8Wo inɛ turu bɛrɛ hakilɛ ɛju le sɔɔ sɔi sin obu obojɛ. Ama Kikinu turu gɔ iyaa, inɛ waja bɛrɛ jugɔ ɛju le sɔɔ sɔi sin obu obojɛ. 9Iyaa Kikinu turu wogɔ, inɛ turu bɛrɛ gagawu sin obu obojɛ, inɛ waja bɛrɛ jiun tɔgu dɛin dɛin bajamu sin obu obojɛ. 10Inɛ turu bɛrɛ taanrinyɛn birɛ biru sin obu obojɛ, inɛ waja bɛrɛ Ama bɛrɛ sɔɔ goi sɔi sin obu obojɛ. Iyaa inɛ waja bɛrɛ, kikinu ɛju lee, mɔɲu lee kabu kunu bɛi sin obu obojɛ. Inɛ waja bɛrɛ iyaa, sɔɔ inɛmɔ sɔi sin obu obojɛ. Inɛ waja bɛrɛ sɔɔ kɔɔbe tiyɛ tagu sin obu obojɛ. 11Ama Kikinu turu gɔ sɔɔ kɔɔbe puu wo kanranjɛ. Wo bɛrɛ bana ɛju gin’ inɛ tuturu puu bɛrɛ sin obu gɔ obojɛ. 12Yɛnɛi, inɛ goju nɛ digɛ jooi yato. Kaa goju gɔ koturu. Digɛ gɔbe bana jooi be bii puu, goju gɔ kai koturu wɔɔ. Kirisito yaa kɔɔ gin’ wɔɔ. 13Emɛ Yahutunw gɔbe lee, Yahutunw tɔgui laain gɔbe lee, gunɔw gɔbe lee, inɛw gunɔwin laain gɔbe lee, emɛ wooi puu goju turu biyɛ ga, Ama Kikinu turu gɔ nɛ emi batise kanraanɲu. Emɛ wooi puu bɛrɛ Kikinu turu wogɔ dii gin’ nɔɔmaabɛin. 14Goju, digɛ turu sai sɛlɛ, kaa digɛ womɔ jooi wɔin. 15Kubɔ, unruin numɔi laa digɛnu, goju digɛi laa gi kanran, wogɔ giye woi goju digɛ turui laa biyɛɛlɛ. 16Suguru, unruin girii laa digɛnu, goju yalu turui laa gi kanran, wogɔ giye woi goju yalu turui laa biyɛɛlɛ. 17Goju gɔ puu girii bee ye, yani kanraan ye suguru ɛgɛmɔdo? Goju gɔ puu sugurui bee ye, yani kanraan ye jiɲu sama bɛɛmɔdo? 18Kaa, Ama, diŋɛ unrunmɔ le kɛukɛu, goju digɛ gɔbe maŋaa, yalu dɛin dɛin nɛ wo kunu. 19Goju gɔ puu digɛ koturu sai bee ye, goju naa gɔ yalu yagɔi biyɛdo? 20Kaa digɛ jooi wɔin. Goju turu wɔɔ. 21Kɔɔi biyaa ye, giri numɔ kai sɛlɛ gɛɛ bɛɛlɛ. Kuu yaa unrun kubɔbe kai sɛlɛ gɛɛ bɛɛlɛ. 22Kaa goju yalu paŋa sɛnɛ gin’ wɔin gɔbe, emɛ kai bemɛ yasin. 23Iyaa goju yalu gaai maala ga emɛ wɔɔ gɔbe, yalu wajunw dɛi sigɛ bei babaɲu. Kunrin goju yalu dɔgɔgu gɔbe, emɛ sigɛ le bei babaŋaranɲu. 24Kaa goju yalu dɔgɔgui laain gɔbe, boŋurun wogɔ kai sɛnɛ. Ama, sɔɔ gɔ puu yegeraa, goju yalu baba sɛnɛ gɔbe bɛrɛ sigɛ le baba obaabe. 25Goju nɛ kabu biyɛnɔu, kaa goju yalu dɛin dɛin gɔbe tunmɔi kajuba ga, Ama kɔɔ gin’ kanraanbe. 26Goju yalu turu ɔɲɛ le wɔɔ ye, wajunw gɔ puu, wo le bari ye ɔɲɛ le biyɛɲu. Goju yalu turu baba biyaajɛ ye, wajunw gɔ puu, wo le bari ye kinɛ ɛhɛɛliyɛmɔɲu. 27Kirisito goju gɔ ei. E inɛ tuturu puu goju womɔ yalu turui biyaai. 28Kunrin, Ama, inɛw unrunmɔ mɔɔnu nɛ, inɛ puu bɛrɛ yalu womɔ obaa daanaabe. Yalu pɔlɔ gɔ nɛ Yesu jaŋu unrunw tiyaaɲu gɔbei daanaabe. Yalu lɛiye gɔ nɛ, inɛw Ama titiyaanw daanaabe. Yalu taaniye gɔ nɛ jaŋudeerenw daanaabe. Kɔɔ onu nɛ taanrinyɛn kanranw gɔbei, kɔɔ onu nɛ jiun bajamu sin obu ma, inɛ baru sin obu ma, inɛ teeremu sin obu ma, sɔɔ inɛmɔ sɔi sin obu ma wɛɛjɛ. 29Inɛw puu jaŋu unrunw tiyaaɲui laain, inɛw puu inɛw Ama titiyaanwin laain, inɛw puu jaŋudeerewin laain. Iyaa, inɛw puu taanrinyɛn kanrun sin obu sɛnɛ, 30jiun bajamu sin obu sɛnɛ, sɔɔ inɛmɔ sɔi sin obu ma, sɔɔ inɛmɔ tiyɛ tagu sin obu ma sɛnɛ. 31Kɔɔi biyaa ye, sin obu sigɛ le maai wɔɔ gɔbe, e wogɔbe daariyɛi. Kaa kɔɔ wooi dɛi sigɛ, oju ɛju nɛ yaaun e jaan gɔ, mu e bɛrɛ tatagadɔn.

will be added

X\