1 Mu Kirisito deenɛi biyaa mu wɔɔ gin’, e yaa mui deewin biyɛi. 2 E kijɛ wooi nɛ mui ahajubajɛi, iyaa, e bɛrɛ deeru bana mu obu le kɛukɛu e sɔɔ ma yabaa wɔi. Wogɔ digɛu, mu ei sɔmɔuwɔn. 3 Kaa sɔɔ ɔn paamu e kanrun ye mu ibɛɛ wɔun. Ainɛ tuturu puu kuu gɔ Kirisitoi. Yaanran kuu gɔ, wo igɛi. Iyaa Kirisito kuu gɔ, Amai. 4 Wogɔ digɛu, Ama gɛɛnnu ma, Ama bɛrɛ sɔɔ goi sɔɔnu ma, ainɛ aai kanran kuu womɔ sɔi le goraa kanranjɛ ye, wo kuu womɔ baŋa Kirisitoi gailiyɛmɔuwɔ. 5 Kaa yaanran, Ama gɛɛnnu ma, Ama bɛrɛ sɔɔ goi sɔɔnu ma, kuu womɔ nɛ sɔi gorola ye, wo kuu womɔ baŋa, wo igɛi gailiyɛmɔuwɔ. Yaanran kuu kaa sɛɛ be lɛi kɛkɛu. 6 Yaanran, kuu womɔ nɛ sɔi goroidolo ye, kukuli womɔ wo sɛɛmɔ. Kaa yaanran, kukuli sɛɛ ye biyɛ ma, kuu kai ye biyɛ ma, wogɔ dɔgɔi. Kɔɔi biyaa ye, sɔi le kuu womɔ wo goromɔ. 7 Ainɛi, Ama le murin maŋaaɲu. Wo Ama dooroi. Kodigɛu, ainɛ kai, kuu womɔ sɔi le goru kai sɛlɛ. Kaa yaanran wo igɛ dooroi. 8 Waaru ainɛ maŋi le, woi yaanran nɛ goolu. Kaa yaanran, ainɛ nɛ goi. 9 Iyaa, ainɛi yaanran ga maŋanɛ. Kaa yaanrain ainɛ ga maŋi. 10 Wogɔ digɛu, mɛlɛnkɛbe sabu dɛi, yaanran, kuu womɔ nɛ inɛ yadaan sɛɛrɛi giye, kuu womɔ goroun jaain wɔɔ. 11 Kaa kokanran, Inɛw Baŋa le bana emɛ yaajɛ le kɛukɛu, yaanran wɔlɔ ye, ainɛ kanran wɔlɔ. Iyaa ainɛ wɔlɔ ye, yaanran kanran wɔlɔ. 12 Sabu, yaanran, ainɛ nɛ bana goi gin’, ainɛ yaa yaanran woi naranjɛ. Kunrin kijɛ puu Ama maŋajɛ. 13 E kanran, kuu ebe le ajubu yɛnɛi: Ama babu yalu nɛ, yaanran kuu dɛbɛla go, Ama gɛɛn ga, wogɔ dagaa wɔɔ ma? 14 Bana wɔɔ le kɛukɛu, ainɛ kukuli pala siyɛ ga, wogɔ woi gailiyɛmui laa ma? 15 Kaa yaanran kukuli diyɛ yasɛ ye, wogɔ wo bɛrɛ baba sɔɔi. Yaanran bɛrɛ kukuli womɔ gɔ, kuu dɛbi ga obin. 16 Kaa nimɛ kanran inɛ turu sɔɔ kɔɔ kuu nɛ jiiru jiire ibɛɛ wɔɔ ye, emɛ kai kɔɔ sibɛ go bana biyɛɲu waja sɛnɛ. Ama inɛw mɔɔnu gɔbe yaa bana waja sɛnɛ. 17 Nɛɛ kanɛ sɔɔ e bɛrɛ mu sɔɔido sibɛ go, mu ei sɔmɔuwɔlɔn. Mɔɔnu ebe gɔ, ei ɛjii biyɛ dɛi mɔrinyɛɛnlɛi. Mɔɲii biyɛ dɛi mɔrinyɛnjɛi. 18 Sɔɔ pɔlɔ gɔ unwɔ: Ebaa Ama inɛw mɔɔnu sɔɔ dɛi waaru e mɔrinyaanjɛ, logoro ebe nɛ kabu dɛin dɛin yɔɔ ga mu bɛrɛ tagin. Wogɔ nɛ mu bɛrɛ naran uji yato gin’ wɔɔ. 19 Gagawu tɔitɔi le inɛw wɔin gɔbei jugɔmɔ ga, waajibi logoro ebe nɛ gojo biyɛun jaain wɔɔ. 20 Waaru e mɔrinyaanjɛ, naran go Inɛw Baŋa pana kaya dɛi mɔrinyɛɛnlɛi. 21 Kaa pana nɛ dɛinyɛnnu digɛnu, inɛ kanma puu tunmɔ dɔmiyɛnlu go, jaa wo jɛɛlu gɔ kayajɛɛjɛ. Kunrin, inɛw gamuu giyɛ le wɔin, gamuu kayaa nɔwaan bimiliyaa wɔin. 22 Kɔɔi ye, ginrun ebe nɛ jaa kayi ye nɔɔ bɛɛlɛi ma? Maa e Ama inɛw mɔɔnu gɔi gailiyɛmɔu, inɛw kijɛ sɛnɛ gɔbe bɛrɛ dɔgɔ tagarauwɔi? Mu e le inge gɛɛdɔn? Ei sɔsɔmɔdɔn ma? Ai, sɔɔ kɔɔ nɛ mu ei sɔmɔlun. 23 Deeru Inɛw Baŋa bɛrɛ biyaa, e bɛrɛ mu tagu gɔ ɔn woi: Inɛw Baŋa Yesu, digɛ woi numɔ nɛ kuni gɔ, buru jeɲaa, 24 Amai birɛpoo tagaatiyaa, kabalaa kijɛ wo gi: «Ɔn goju mai, e dɛi obin gɔ woi. Mui ajuba ga kunrin kanrain.» 25 Pana kayaajiyaa, wo kɔɔ gin’ resɛndii ilɛ gɔ jeɲaa, ɔn gin’ sɔi: «Resɛndii ilɛ ɔn, Ama aaru kanai, ili ma gɔ le aaru kuni gɔ woi. Waaru ɔn e nɔɔjɛ wooi, mui ajuba ga kunrin kanrain.» 26 Kunrin, buru ɔn gin’ waaru e kayajɛ wooi, resɛndii ilɛ waaru e nɔɔjɛ wooi, e Inɛw Baŋa wɛɛido baa, yiun womɔ sɔɔi sɔɔjɛi. 27 Kɔɔ sabu dɛi, inɛ aai kanran, wo le dagalu wo wɔu, Inɛw Baŋa buru gɔ kayaajɛ ma, gelu womɔ nɛ nɔwaanjɛ ma biyaai ye, Inɛw Baŋa goju lee, ili womɔ lee wo gailiyɛmu dɛi, baŋa jarugu le wɔɔ. 28 Wogɔ digɛu, inɛ kanma puu unruin maraan yɛnaatiyaa ye, kɔɔ gin’ buru gɔ kaya, kɔɔ gin’ gelu gɔ nɛ nɔɔ. 29 Inɛ aai kanran, Inɛw Baŋa goju le sɔɔ bana digɛ lugolu go, buru gɔ kayaajɛ ma, gelu gɔ nɛ nɔwaanjɛ ma biyaai ye, kɔɔbaŋa, wo kayi lee, wo nɔi lee dɛi jarugu yaduyɔ. 30 Sɔɔ kɔɔ digɛu, logoro ebe nɛ inɛw joo jinwaan paŋa dogaain, iyaa gamuu yinwaain. 31 Emɛ, kuu emɛ le, bana emɛ marun yɛyɛnɛɲu biyaai ye, saliyɛ nɛ numɔidenɛ. 32 Kaa aduna le bari ye saliyɛ nɛ jarugu kuu emɛ nɛ sugonɔu giye, Inɛw Baŋa wo saliyɛ emɛ kiraa ye, emi oju nɛ kukunɔjɛ. 33 Ba unrunw mabe, Inɛw Baŋa pana kaya dɛi waaru e mɔrinyaanjɛ, tunmɔ dɔmiyɛin. 34 Inɛ turu giyɛ woi yasɛ ye, ginrun womɔ nɛ pana kayi ye wɛɛ. E mɔrinyɛnjɛ gɔ, kuu ebe nɛ jarugu duurɔjɛi biyɛmɔnɔu dɛi kunrin kanrain. Selumu waja ebe gɔbe, mu wiyaaun ye e le sɔɔdɔn.
