KƆRƐNTE PƆLƆ 10

1Ba unrunw, emɛ babe bɛrɛ sɔɔ dɔi gɔ jugɔlu go e bii ye mu ibɛlaun. Be puu kulumɔ bei teeremaa gɛlɛbe gɔ doɲu nɛ sɛɛu yaaubɛin. Be puu nɛudii Banrun gɛɛɲu gɔ nɛ sɛɛu kɛjaa taŋaabɛin. 2Kulumɔ gɔ nɛ lee, nɛudii gɔ nɛ lee, be puu Mɔise le digɛu kunrin batise kanraanbɛin. 3Be puu pana kikinugu turu gɔ woi kayin. 4Be puu dii kikinugu tunmɔ gɔ woi nɔyin. Dumɔ kikinugu be le yaaube gɔ, be dumɔ wogɔ dii nɔɔubɛin. Dumɔ wogɔ Kirisitoi bee. 5Kaa kɔɔ wooi nɛ, be logoro nɛ, inɛw joo kanran gɔ, Ama kinɛ aalu. Wogɔ digɛu, be olusolo nɛ numaa yinwaain. 6Nɛɛ sɔɔ kɔɔbe emɛ bɛrɛ tinwinrun sɔɔi biyaai. Emaa be gin’ dadaaru mɔɲu le biyɛnɔu ga, be bɛrɛ sɔɔ dɔi gɔ, emɛ bɛrɛ deeru sɔɔi. 7Ama Dɔn nɛ bana tɔŋɔ ɔn le kɛukɛu, be logoro nɛ gamuu bɛin gin’ ɔmɔlɔ bulowin biyɛnɔugi: “Inɛw gɔbe dɛinyaan jaa kayaa, dii nɔwaanbɛin. Kɔɔ onu nɛ, be ingelaa ɔmɔlɔ gɔ dɛi yɔgɔrɔ yɔgɔraabɛin.” 8Be gin’ emɛ sala nɛ yoomɔnɔugin. Be logoro nɛ inɛw gamuu wogɔ nɛ yowaa, bai turu nɛ inɛw muɲu pɛɛlɛi taanusigɛ yinwun. 9Be gin’ emɛ Inɛw Baŋai suburu yɛnɛmɔnɔugin. Be logoro nɛ gamuu Inɛw Baŋai subɔraa, yuguru bei kɛraa dai. 10Be gin’ guguun guunnɔugi. Logoro bemɛ nɛ inɛw gamuu Ama le guguun gunwaan, Dadaanɛ gɔ wiyaa, bei daati. 11Kijɛ ɔnbe puu be bɛrɛ dɔi gɔ, inɛw wajunwin deere dɛi dɔi. Sɔɔ gɔ puu tɔŋaa, emɛ inɛw waaru dumɔ le bɛrii wɔin gɔbe, emaa wogɔ le soŋirinyɛn dɛi tɔŋi. 12Wogɔ digɛu, u inɛ ihiŋɛ ga sɛɛ gɔ, numɔnɔu ga kuu uwɔ u kajubaun jaain wɔɔ. 13Subɔrɔ e bɛrɛ dɔɔjɛ gɔ, Adama ii puu bɛrɛ subɔrɔ dɔɔjɛ gɔ woi. Ama, sɔɔ turu baŋai digɛu, subɔrɔ e bɛrɛ dɔɔjɛ gɔ, paŋa ebe dɛi ire biyɛ ga wo yabaidolo. Iyaa subɔrɔ gɔ wiyaai ye, wogɔ muyɔnɲu paŋa e bɛrɛ ohobodo, subɔrɔ gɔ nɛ gooɲu bana yaa ohobodo. 14Sɔɔ kɔɔbe puu sabu dɛi, ba unrunw ibɛ mabe, ɔmɔlɔ bulu le kabi ye biyɛi. 15E hakilɛ inɛw sɛin gin’ mu e le sɔɔuwɔn. E yaa kuu ebe le sɔɔ ma gɔ marun yɛnɛi. 16Inɛw Baŋa pana nɛ, dii gelu jeɲaa ye, Amai birɛpoo tagaa ye, waaru resɛndii ilɛ gɔ emɛ nɔɔjɛ, emɛ Kirisito ili gɔ le bɔɔi biyaain ga tagaraun wɔnɛ ma? Buru kabulu ye emɛ kayajɛ gɔ, Kirisito goju le bɔɔi biyaain ga tagaraun wɔnɛ ma? 17Buru gunu koturu sai kabalaɲu. Emɛ wooi puu buru gunu tunmɔ gɔ woi gamalaɲu digɛu, halu emɛ jooi wɔin kanran, emɛ puu goju turu. 18Nɛɛ Isɛrɛlu tɔgu sɔɔ yɛnɛmɔi. Ama bɛrɛ arusɛgɛ sadaga tɛgurin nawan inɛw tɛnwɛnɲu gɔbe, be sadagadumu gɔ le bɔɔi biyaain. 19Mu ɔmɔlɔ ma, ɔmɔlɔ nawan ma kijɛ nanaai gɛɛuwɔn ma? Ai. 20Kaa kijɛ mu gɛɛjɛ gɔ unwɔ: Inɛw Ama inin gɔbe, sadaga be goonɔjɛ gɔ, Ama bɛrɛ goonɔɔnɛ. Kaa jinrunbe bɛrɛ goonɔɲu. Ebaa jinrunbe le bɔɔi biyɛ ga mu ibɛlaun. 21Inɛw Baŋa gelu nɛ nɔɔnu, iyaa jinrunbe gelu nɛ nɔɔnu, e kanrun bɛɛidelei. Inɛw Baŋa tabalu nɛ kaya, jinrunbe tabalu nɛ kaya, e kanrun bɛɛidelei. 22Maa koi ye emɛ Inɛw Baŋa kinɛbanrun ingelemɔ ibɛɛ wɔin ma? Ajubu emɛ nɛ, paŋa emɛ, womɔ dɛi gaa ma? 23Inɛw gamuu gɛɛjɛ gin’: «Emɛ kijɛ puu kanrun bɛbɛɛɲu.» Kaa kijɛ puu niwɛn tolo. «Emɛ kijɛ puu kanrun bɛbɛɛɲu.» Kaa kijɛ puu inɛi bariyɛɛlɛ. 24Inɛ turu kanran kuu womɔ too toonɔu, kaa inɛw wajunw too yaa too. 25Kinɛjugɔ jarugu sɔɔ biyɛnɔu dɛi, selumu kunɔlu go ibɛ nɛ kijɛ dɔnrɔnɲu puu, ɛbɛ ye kayai. 26Ama Dɔn bana gɛɛjɛ gin’: “Aduna gɔ lee, kɔlɔ womɔ kijɛ puu lee, Inɛw Baŋa Ama mɔi.” 27Inɛ jaŋu ii laa ei jaa nɛ boonaajɛ ye, e yai ibɛɛ wɔi ye, kinɛjugɔ jarugu sɔɔ biyɛnɔu dɛi, selumu kunɔlu go e bɛrɛ kijɛ wo obojɛ puu kayai. 28Kaa inɛ turu u bɛrɛ sɔwaa, nawan kɔɔ ɔmɔlɔ nawain gi ye, inɛ u bɛrɛ taganɛ gɔ lee, kinɛjugɔ jarugu sɔɔ lee dɛi, nawan kɔɔ tɛnwɛnnɔu. 29Kinɛjugɔ jarugu sɔɔ mu gi gɔ, kinɛjugɔ uwɔ ui jarugajɛ dɛi laa, kaa inɛ u bɛrɛ taganɛ gɔ kinɛjugɔ womɔ woi jarugajɛ dɛi sɔɔuwɔn. Nɛɛ inɛw gamuu ɔn gin’ selumu bɛbɛɛɲu: «Inɛ waja kinɛ jugɔ womɔ woi jarugajɛ dɛi, maa kijɛ mu dɛnɛjɛ kanrannɔu yɔɔ ma? 30Mu kijɛ mu kayajɛ dɛi Amai birɛpoo tagaabɔn ye, birɛ poo tagu le pana mu kayajɛ dɛi inge dɛi boi ma yanwanjɛ?» 31Wogɔ digɛu, jaai kayajɛi ma, kijɛi nɔɔjɛi ma, kijɛ ingei kanran e kanranjɛ puu, Amai baba ga kanrain. 32Yahutunw ma, tɔgu waja inɛw ma, Ama inɛw mɔɔnu ma, kinɛ bemɛ, e le digɛnu yanwaain biyɛmɔnɔugi. 33Mu yaa kijɛ puu nɛ, inɛw puu bɛrɛ bana ɛju gin’ kanran ga mainiyɛunwɔn. Mu kuu ma bɛrɛ kijɛ ɛju dɛnɛɛlɔn. Kaa inɛw puu yayabu gɔ bɛɛ ga, inɛw puu bɛrɛ kijɛ ɛju kanranjɔn. E yaa mu kanranjɛ gin’ kanrain.

will be added

X\