KƆRƐNTE PƆLƆ 1

1Mu Pɔlu, Ama diŋɛ womɔ le mui boonaa, Kirisito Yesu jaŋu ii tiyaaɲui bojaajɛ gɔ, mu lee, emɛ bainɛ Sɔsutɛnɛ lee, 2Ama inɛw mɔɔnu, Kɔrɛnte ana nɛ wɔɔ gɔ bɛrɛ, emɛ lɛtɛrɛ ɔn tiiuwɔin. Yalu yago nɛi kanran, Inɛw Baŋa emɛ Yesu Kirisito, emɛ Baŋa gɔ lee, be Baŋa gɔ lee boi boonw gɔbe wooi le bariyaa, Ama, Kirisito Yesu nɛ ei dɛiin bojaa, inɛw unrunmɔi bojodo ga, e inɛw boonaaɲu gɔbe, emɛ lɛtɛrɛ ɔn e bɛrɛ tiiuwɔin. 3Ama emɛ Ba lee, Inɛw Baŋa Yesu Kirisito lee, e bɛrɛ nɛɛma lee, jamu lee obo. 4Ama ma, Kirisito Yesu nɛ e bɛrɛ nɛɛma bana wo kanrun gɔ dɛi, mu waaru wooi e dɛi woi birɛpoo tagauwɔn. 5Kirisito dɛi, Ama kijɛ puu numɔ ebe nɛ joonaa, e, Ama sɔɔ sɔi sin obu puu lee, Ama sɔɔ jugu sin obu puu lee yasɛi. 6Naran go, Kirisito dɛi e bɛrɛ sɛɛrɛ goin gɔ, sɔɔ wogɔ logoro ebe nɛ paŋa biyaajɛ. 7Nɛɛ kai, Ama sin obu e bɛɛlu turu kanran wɔlɔ. E kunrin Inɛw Baŋa emɛ Yesu Kirisito unruin wo tagaraido gɔ kinɛ ɔgu le dɔmiyaan wɔi. 8Dumɔ gɔ baa, ebaa numɔlu go gain gain iŋiyɛn ga, ei gɛliyɛnɛ gɔ yaa Kirisito woi. Inɛw Baŋa emɛ Yesu Kirisito bai wɛɛido gɔ le, ebaa jarugusɛlɛ le biyɛ ga, Ama, dumɔ gɔ baa ei gɛgɛliyɛdo. 9Wo sɔɔ turu baŋai. Naran go, Aini unrunmɔ, Yesu Kirisito, Inɛw Baŋa emɛ gɔ le ebaa bɔɔi biyɛ ga Ama ei boonɔnɛ gɔ, wo sɔɔ turu baŋai. 10Ba unrunw, Inɛw Baŋa emɛ Yesu Kirisito boi dɛi mu e bɛrɛ gɛɛunwɔn, e puu sɔɔ ebe turu biyɛmɔi. Logoro ebe nɛ mii kabu biyɛmɔnɔugi. Kaa, kinɛ ajubu turu, dadaaru turu le biyaajɛi ye, ɛjii mii turu biyɛi. 11Ba unrunw mabe, logoro ebe nɛ jiiru ɛjii yato ga, Kulowe ginrun bɛɛnw gamuu, mu bɛrɛ tagaabɛin. 12Kijɛ gɛɛ mu ibɛ gɔ unwɔ: E tuturu puu, gamuu unrunbe Pɔlui dimɛi gɛɛjɛi, gamuu Apɔlɔsui dimɛi gɛɛjɛi, gamuu Piɛrui dimɛi gɛɛjɛi, gamuu iyaa, Kirisitoi dimɛi gɛɛjɛi. 13Kɔɔi ye Kirisito gɔi gamalaa, dɛin dɛin bojaaɲu ma? E dɛi, mu Pɔlui baga jai nɛ pɛgaabɛin ma? Maa mu Pɔlu boi le ei batise kuni ma? 14Logoro ebe nɛ Kirisupusu lee, Gayisu lee laa ye, mu inɛ turu kanran batise kunɔlun. Wogɔ digɛu, Ama birɛpoo. 15Kunrin, inɛ turu kanran ebaa boi ma le batise yoi gɛɛ bɛɛidolo. 16Narain, mu Sutepanasu ginrun bɛɛnw gɔi yaa batise kunaabɔn. Inɛw kɔɔbei laa ye, inɛw waja batise kunaabɔn ma inɔn. 17Inɛwin batise kunɔ ga Kirisito wogɔ dɛi mui yɛmaa tiilu. Kaa, maa Kibɛru Ɛju waaju kanran dɛi mui tii. Kaa, Kirisito baga jai sɔɔ gɔ nɛ gɔnrɔn too gɔ gailiyɛmɔnɔu dɛi, mu waaju gɔ, inɛw hakilɛ jugɔ sɔɔ le tagauwɔlɔn. 18Kirisito, baga jai nɛ wo yinwun sɔɔ gɔ, inɛw suiyoidɛin bɛrɛ wogɔ bomɔ sɔɔi. Kaa emɛ inɛw yayabu oju nɛ yaauwɔin bɛrɛ, wogɔ Ama gɔnrɔin. 19Kodɛi Ama Dɔn nɛ Ama kijɛ gi: “Mu hakilɛgunw hakilɛ gɔ niwɛn sɛlɛ bojodɔn. Jugɔ jugɔnw jugɔ gɔ, kijɛ kanmai laa bojodɔn.” 20Nɛɛ hakilɛginɛ yago wɔɔ? Jaŋudeerenɛ diyɛ yago wɔɔ? Maa, aduna ɔn jiiru kunɔnɛ yago wɔɔ? Aduna ɔn hakilɛ gɔ bomɔ sɔɔi ga Ama tagaralu ma? 21Yɛnɛi, Ama hakilɛ, aduna nɛ unruin taguru gɔ, aduna kuu womɔ hakilɛ le, Ama hakilɛ wogɔi yɛnaa, kole Amai jugaa bɛɛlu. Kɔɔ sabu dɛi, bomɔ waaju emɛ tagajɛ ɔn le inɛw gawaaɲu gɔbei yaba ga, Ama bɛrɛ ɛjii biyaai. 22Yahutunw, sɛɛrɛ taanrinyɛin digɛin. Tɔgu wajunw, hakilɛi dɛnɛɲu. 23Emɛ kai, Kirisitoi baga jai nɛ pɛgaabɛin sɔɔi waaju kanranɲu. Wogɔ Yahutunw sibɛ nɛ kinɛ yanwan sɔɔi. Tɔgu wajunw sibɛ nɛ bomɔ sɔɔi. 24Kaa inɛw Ama boonaajɛ gɔbe, Yahutunwin sɛlɛ, tɔgu wajabei sɛlɛ, be bɛrɛ, Kirisito Ama gɔnrɔin, Ama hakilɛi. 25Sabu, Ama sibɛ go bomɔi gin’ kijɛ wɔɔ gɔ, aduna hakilɛ dɛi sigɛ hakilɛ sɛɛ. Iyaa, Ama sibɛ go yɛbɛlɛi gin’ kijɛ wɔɔ gɔ, aduna paŋa dɛi sigɛ paŋa sɛɛ. 26Ba unrunw, e inɛw Ama ei boonu gɔbe, kuu ebe sɔɔ ajubu yɛnɛi: Logoro ebe nɛ inɛw sibɛ go hakilɛgunw joo tolo, inɛ gɔnrɔn sɛɛ joo tolo, inɛ diyɛ joo tolo. 27Kaa aduna ɔn nɛ bomɔi ga kijɛ lugoɲu gɔbe, Ama, kijɛ wogɔbe yɛmaa, hakilɛgunw bɛrɛ kole dɔgɔ iyemu. Iyaa aduna ɔn nɛ kijɛ yɛbɛlɛi ga lugoɲu gɔbe, Ama kijɛ wogɔbe yɛmaa, paŋa sɛnw gɔbe bɛrɛ kole dɔgɔ iyemu. 28Aduna ɔn kijɛ koolo gɔbe, kijɛ lugoun baalu, kijɛ kanmai laa wɔin gɔbe, Ama, kijɛ wogɔbe yɛmaa, kijɛ diyɛi ga wɔin gɔbei, kijɛi laa kole boju. 29Kunrin, Ama giru nɛ inɛ turu kanran kuu unrunmɔ unɔ bɛɛlɛ. 30Nɛɛ e kai, Ama ei Kirisito Yesu le mɔɔnaajɛ. Wo Kirisito Yesui, hakilɛ emɛ gɔ woi boju. Ama giru nɛ, emɛ Kirisito dɛi teitai wɔin, wo dɛi Ama emi dɛiin bojaa sɛɛ, wo dɛi hakɛ nɛ emi gowaa, iyaa emɛ kuu goonu biyaaɲu. 31Nɛɛ Ama Dɔn nɛ tɔŋaa wɔɔ gin’: “Inɛ aai kanran, kuu womɔ uhunɔdo ye, Inɛw Baŋa kijɛ kanrun dɛi kuu womɔ unɔ.”

will be added

X\