TÍTƖ̀ 1

1Pol, na ɩ Naaŋmɩn tõ-tõ-bie nɩ Yeezu nɩ-tona a, bɛ ƴãw na k'ɩ̃ɩ ɩ a Naaŋmɩn nɩ-kaa-iri tɛr Naaŋmɩn-saw-deb, ɛ bãw a yel-mɩŋa na tu a Naaŋmɩn ƴãwfʋ a, 2kɛ́ bɛ tɩɛrɛ a nyɔ-vʋʋrʋ na be kʋra lɛ a. A Naaŋmɩn na bɛ ŋmarɛ ziri a, tɩ ƴãw nɩ nʋɔr k'ʋʋ na kʋ̀ bɛ nɩ a nyɔ-vʋʋrʋ ŋa, ɛ a dɩta-pɛ-yome za wa bãw be. 3A daar na wa ta a, ʋ ɩ n a ʋ ƴɛrʋ sãá hieru ʋ na tõ m k'ɩ̃ɩ hiere a pʋɔ, mɛ̃ a lɛ a Naaŋmɩn tɩ Faarɛ na ƴãw a nʋɔr a. 4Mãa n'ʋ kʋrɛ fʋ a sɛb-tʋɔla ŋa, Títɩ̀ ɩ, fʋ̃ʋ na ɩ ɩ̃ bie tɔr za a Naaŋmɩn-saw-deb tɩ na lãw a pʋɔ a. A Naaŋmɩn Sãà nɩ a tɩ Faarɛ Kɩrɩta Yeezu, bɛ kʋ̀ b maalʋ nɩ ƴã-ɓaarʋ. 5Mãa wa bɛr fʋ a Kɩrɛtɩ tẽw a, ɩ̃ bɔbr a kɛ fʋ baa cɔbrɩ a yele a be, ɛ zɩɩlɩ nɩ-kore tẽw-kpɛ̃ɛ za pʋɔ, mɛ̃ a lɛ ɩ̃ na wul fʋ a. 6A fɛr a kɛ bɛ za been been ta tɛr sãwna bɛ yere ɩ, bɛ kul pɔw beƴẽni, tɛr bibiir na tɛr Naaŋmɩn-saw-deb a, ɛ́ nɩr kʋ̃ tʋ̃ɔ yel kɛ bɛ bɛ ɩrɛ vla a, bɩɩ bɛ ɩ n bɛ-wonbɛ a. 7Bʋ̃ʋ n'ʋ vɛ̃, a fɛr a k'aa Lãw-yir-kaarɛ ta tɛr sãwna bɛ yere ɩ, ʋ na kaarɛ a Naaŋmɩn yele zie a ƴãw: ʋ ta ɩrɛ pɔ̀lʋ ɛ, ta ɩ suur sob ɛ, ʋ ta ɩ dã-nyuure nɩ nɔ-haa-bɔbrɛ ɩ, ʋ ta ɩrɛ nyãnyu-ɩb ɛ. 8A fɛr a k'ʋʋ nɔnɛ a sãanbɛ nyɔwfʋ, ʋ nɔnɛ a vla, ʋ bãw yã, ɛ ɩ nɩ-mɩŋa nɩ nɩ-sõw, bãw ʋ tʋɔra tɛrʋ; 9a fɛr a k'ʋʋ tu a ƴɛrʋ na sɛwnɩ saw deb a pùor sɩza, mɛ̃ a lɛ a wulu na bin a. A ŋa n'a ʋ na tʋ̃ɔ kpaalɛ a nɩbɛ a wul-vla pʋɔ, ɛ wule a bɛ tulu a bɛlɩ dem na ŋmɩɛr a ʋ ƴɛrʋ lɔbr a. 10Bɛ-wonbɛ sɩrɩ bɛ dɩ vuo ɩ, baa zuo a za a Zifʋ mɩnɛ bɛl na lɩɛbɩ a Kɩrɩta-nɩbɛ a pʋɔ; bɛ nɔnɛ nɩ ƴɛr-zawlɛ tule nɩ a nɩbɛ. 11A fɛr a kɛ fʋ ɩ bɛ pàw a bɛ nɛɛ, bʋ̃ʋ n'ʋ vɛ̃, yi-ɓile nɩbɛ tɩɛrʋ n'a bɛ damn nyawr taa, bɛ na mɩ́ wule lɛ a na bɛ sɛw kɛ bɛ wule a, ɛ a ɩ nyãnyu-tɛra ƴãw a. 12A bɛ pʋɔ a, bɛl mɩŋa ƴɛr-manɛ kãw tɩ yel a: «A Kɩrɛtɩ tẽw nɩbɛ ɛ, zir-ŋmarbɛ nɛ bɛ kʋra lɛ, wɛ-dʋn-faar nɛ bɛ, yã-to dem na gu dɩb tɛwr a.» 13Ɛ́ yel-mɩŋa n'ɩ a a ŋa ʋ na yel a. Alɛ so, kpãa bɛ sɩza bɛ tʋ̃ɔ tɛr Naaŋmɩn-saw-deb na tori a, 14ɛ ta tuur a Zifʋ mɩnɛ suolu pùor ɛ, nɩ nɩsaalbɛ na gùr pùor cɔw a yel-mɩŋa a nɛ-ƴãwnɩ ɛ. 15Bom za vɩɛl ɩ parpar, bɛlɩ dem na vɩɛl parpar a zie. Ɛ cɛ bɛlɩ dem dɛwr na mar, ɛ́ bɛ bɛ tɛr saw-deb a, bom za bɛ vɩɛl parpar a bɛ zie ɩ, a bɛ yã nɩ a bɛ tɩɛrʋ nɩ̃ɛ na mar dɛwr. 16Bɛ mɩ́ yel a kɛ bɛ bãw nɩ a Naaŋmɩn, ɛ cɛ a bɛ ɩ-ɩrɩ wule kɛ lɛ bɛ n'a ɩ. Bɛ kpɛ n faa bɛ pɩɛl ɛ, zu-kpɛn dem na kʋ̃ tʋ̃ɔ yel-vla kãw za maalɩ a nɛ bɛ.

will be added

X\