YEL-WULA 20

1Al pùorí, ɩ̃ tɩ nyɛ̃ nɩ malkɩ na yi a salom zu siwr a; ʋ tɩ tɛr ɩ a kɔ̃tɔmɛ dɔwrʋ bɔw-zulu pĩi nɩ bãzɔl-tɩbrʋ a ʋ nũú. 2Ʋ tɩ nyɔw nɩ a wa-bɩɛ, a tẽ-kor waab, a pɛr lɛ k'aa Gɛgɛra bɩɩ Sɩtaana, ʋ tɩ nyɔw ʋ na 'lẽ nɩ a bãzɔl-tɩbrʋ ʋl, ɛ gu yome tur. 3A malkɩ tɩ lɔb ʋ na ƴãw a kɔ̃tɔmɛ dɔwrʋ bɔw-zulu pʋɔ, ɛ kpa n a pĩi, ɛ bɛ̀ a nʋɔr pàw, k'aa wa-bɩɛ ta cãa bɛlɛ a ten nɩbɛ ɩ, ɛ gu a yome tur tɩ tɔl baarɩ. Al pùorí, a na fɛr a kɛ̀ bɛ cɛr ʋ bɛr blã. 4Ɛ ɩ̃ tɩ nyɛ̃ nɩ naalʋ da-kɔwr: bɛ tɩ kʋ̀ n a bɛlɩ dem na tɩ zɩ̃ a da-kɔwr a ŋa zu a, a ƴɛrʋ-maalʋ fãw. A bɛlɩ dem bɛ na tɩ kʋ́, a yel-mɩŋa dãsɩɛ a Yeezu na dɩ a ƴãw nɩ a Naaŋmɩn ƴɛrʋ ƴãw a, ɩ̃ mɩ̀ tɩ nyɛ̃ nɩ a bɛ sɩɩ́r. Bɛ bɛ tɩ gbĩ dume pùori a wɛ-dʋ̃w ɛ, nɩ a ʋ dasule mɩ̀ ɛ, ɛ́ bɛ tɩ tɛ̀r a ʋ bãwfʋ a bɛ gbẽé nɩ a bɛ nũú ɛ. Bɛ tɩ lɛb a vʋʋrɛ ɛ dɩ naalʋ lãw nɩ a Kɩrɩta yome tur. 5A kũuni bɛl na cɛ a, bɛ tɩ lɛb vʋʋrɛ ɩ, ɛ gùre a yome tur na tɩ tɔl baarɩ. A kũu-pʋɔ-lɛ-yib dãw-niwn sob ɩ a ŋa. 6Bɛlɩ dem na pʋɔ a kũu-pʋɔ-lɛ-yib dãw-niwn sob ŋa pʋɔ a, bɛ ɩ n zu-nʋ̃ɔ dem ɛ ɩ Naaŋmɩn nɩ-sori. A kũu gb'a ayi sob bɛ ɩrɛ bɛ bom za ɩ: bɛ na ɩ n a Naaŋmɩn nɩ a Kɩrɩta bawr-maalbɛ, ɛ́ bɛ na lãw nɩ nɩ a Kɩrɩta dɩ naalʋ yome tur. 7A yome tur nãá wa tɔl baar a, bɛ na cɛr ɩ a Sɩtaana bɛr ʋ yi a ʋ gaso pʋɔ, 8ɛ́ ʋ na cen na tɩ bɛ̀lɛ a ten ten na be a tẽ-daa za zu a, a pɛr lɛ k'aa Gɔg nɩ Magɔg. Ʋ na bʋɔlɩ bɛ na ɓã taa a zɛbr ƴãw, ɛ́ bɛ na yãwmɛ na mɛ̃ a kʋ̃ɔ-kpɛ̃ɛ nʋɔr biire a. 9Bɛ yɛ́r a pàw a tẽw za, ɛ ŋmãa jil koli a Naaŋmɩn nɩ-bʋʋrɛ laɩ nɩ a tẽ-kpɛ̃ɛ a Naaŋmɩn na nɔnɛ a. Ɛ cɛ, vũu yi n a salom zu siw dɩ bɛ. 10Ɛ a Gɛgɛra na tɩ bɛ̀lɛ bɛ a, bɛ lɔb ʋ na ƴãw a cirbi vũu gbãtar-kpɛ̃ɛ pʋɔ, a wɛ-dʋ̃w nɩ a ƴɛr-man-bɛlɛ-bɛlɛ zie. Be n'a bɛ na nyɛrɛ dɔwrʋ mʋ̃tɔ̃w nɩ tɩ̃ɩsɔw, yome yome za. 11Ɩ̃ lɛ tɩ nyɛ̃ nɩ naalʋ da-kɔw-pla kpɛ̃ɛ nɩ a sob nɛ na zɩ̃ a ʋ zu a. A tẽsɔw nɩ a salom tɩ bɔr ɩ a ʋ niŋé, bɛ bɛ lɛ nyɛ̃ a ɩ. 12Al pùorí, ɩ̃ tɩ nyɛ̃ nɩ a kũuni, a bɛrɛ nɩ a pʋrpʋr, bɛ ar a naalʋ da-kɔw niŋé, ɛ́ sɛbsɩ yùori. Bɛ tɩ lɛb a yùo sɛbɛ ƴẽn sob, a nyɔ-vʋʋrʋ sɛbɛ, ɛ maal ɩ a kũuni a ƴɛrʋ tu n a bɛ ɩ-ɩrɩ na sɛb ƴãw a sɛbsɩ pʋɔ a. 13A kʋ̃ɔ-kpɛ̃ɛ tɩ tɩr ɩ a ʋ kũuni, a kũu nɩ a kpɩmɛ tẽw mɩ̀ tɩr a bɛ kũuni: bɛ tɩ maal ɩ nɩ bɛ za a ƴɛrʋ tu n a bɛ ɩ-ɩrɩ. 14Bɛ tɩ lɔb ɩ a kũu nɩ a kpɩmɛ tẽw ƴãw a gbãtar-kpɛ̃ɛ vũùmí. A gbãtar-kpɛ̃ɛ vũu ɩ n a kũu-gb'a-ayi sob. 15Sob nɛ za, a yúor na bɛ tɩ sɛb a nyɔ-vʋʋrʋ sɛbɛ pʋɔ a, bɛ tɩ lɔb ʋ na ƴãw a gbãtar-kpɛ̃ɛ vũùmí.

will be added

X\