YEL-WULA 15

1Al pùorí, ɩ̃ tɩ nyɛ̃ nɩ bãwfʋ yũo a salom zu, bãwfʋ na ɩ kpɛ̃ɛ ɛ ɩ nɔ-ɓãan a: malkɩ mɩnɛ ayopõi tɩ tɛr ɩ bʋ̃-faar ayopõi, a pɛr-baarɩ; bʋ̃ʋ n'ʋ vɛ̃, alɛ n'a na pãa wul a Naaŋmɩn suur na ìr a. 2Ɩ̃ mɩ̀ tɩ nyɛ̃ nɩ bom na ɩ mɛ̃ kʋ̃ɔ-kpɛ̃ɛ kʋ̃ɔ na ɩ walwal ɛ jɛr ɩ vũu a. A bɛlɩ dem, na tɩ zɛb tʋ̃ɔ a dʋ̃w nɩ a ʋ dasule nɩ a ʋ yúor sɔr-nʋɔr a, tɩ tɛr ɩ a korijom a Naaŋmɩn na kʋ̀ bɛ a, ar ɩ a kʋ̃ɔ-kpɛ̃ɛ zu. 3Bɛ tɩ yiele nɩ a Naaŋmɩn tõ-tõ-bie Mõyiir yielu, nɩ a Péle yielu a ŋa: «Sore Naaŋmɩn kpɛnʋ-za-sob i, a fʋ tome ɩ n tõ-bɛrɛ ɛ ɩ nɔ-ɓãa-tome. Ten za Nãà a, a fʋ ɩb tu n mɩnʋ nɩ yel-mɩŋa. 4Ãa n'ʋ kʋ̃ zɔrɛ fʋ, Sore e, ãa n'ʋ kʋ̃ zɛwr a fʋ yúor? Bʋ̃ʋ n'ʋ vɛ̃, fʋ̃ʋ yõ n'ʋ ɩ sõw, a ten za nɩbɛ na wa na wa lo gbĩ dume a fʋ niŋé, a fʋ ɩ-ɩrɩ na tu yel-mɩŋa sãá a ƴãw.» 5Al pùorí, ɩ̃ tɩ nyɛ̃ nɩ a Ŋmɩn-yi-kpɛ̃ɛ ʋ yuo a salom zu, a Ŋmɩn-yir ʋl pʋɔ a Wõ-taa pɛn-sɛw na tɩ be a. 6A malkɩ ayopõi bɛl, na tɩ tɛr a bʋ̃-faar ayopõi a, tɩ yi n a Ŋmɩn-yir pʋɔ; bɛ tɩ su n kpar-wowr-pɛlɛ parpar ɛ ŋmãa nɩ salmɛ̃ kpàgɛ́ a nyãa zu. 7A bʋ̃-vʋʋrɩ ƴẽn sob tɩ kʋ̀ n a malkɩ ayopõi salmɛ̃ koli-nyuuri ayopõi, na paalɩ a Naaŋmɩn na vʋʋrɛ kʋra lɛ a suur a. 8A Naaŋmɩn yúor-vɩɛlʋ-danʋ nɩ a ʋ kpɛnʋ tɩ ɩ na zʋ̀ʋ́r paalɩ a Ŋmɩn-yi-kpɛ̃ɛ, ɛ a bɛ tɩ tɛr nɩr na kpɛ a ʋ pʋɔ ɩ, ɛ gu a malkɩ ayopõi bʋ̃-faar ayopõi tɩ tɔl baarɩ.

will be added

X\