LUKA 5

1Bibir kãw, a zu-sɛbla tɩ nɛbr ɩ taa a Yeezu zie a Naaŋmɩn ƴɛrʋ bɛr-wob ƴãw, ɛ a Yeezu tɔr za tɩ ar a Zenezarɛtɩ kʋ̃ɔ-kpɛ̃ɛ nʋɔr. 2Ʋ tɩ nyɛ̃ nɩ gbee ayi na gã a kʋ̃ɔ-kpɛ̃ɛ nʋɔr a: a zʋm-nyɔwrbɛ tɩ yi na siw pɛwr a bɛ mɩ̃ɛnɩ. 3A Yeezu tɩ do na kpɛ a gbor kãw pʋɔ, na tɩ ɩ Sɩmʋ̃ gbor a, ɛ zɛlɩ ʋ k'ʋʋ taw zãá nɩ a kõkowr blã. Lɛ n'a a Yeezu pãa tɩ zɩ̃ a gbor pʋɔ ɛ kanɛ nɩ a zu-sɛbla. 4Ʋ na wa ƴɛr baar a, ʋ yel ɩ a Sɩmʋ̃: «Duwri kpɛ n a zulu pʋɔ, nyɩ tɩ lɔb a mɩ̃ɛnɩ nyɔw a zʋmɛ.» 5A Sɩmʋ̃ tɩ yel ʋ na: «Wul-wul-kara a, tɩ bal ɩ tɩ tʋɔra a tɩ̃ɩsɔw za tɩ vɩɛ nɩ zie, ɛ bɛ tuli nyɔw zʋm-bile za ɩ. Ɛ cɛ fʋ̃ʋ na n'ʋ yel a, al ƴãw n'a ɩ̃ na lɔb a mɩ̃ɛnɩ.» 6Bɛ tɩ lɔb ɩ a mɩ̃ɛnɩ nyɔw zʋmɛ yaga yaga za, a mɩ̃ɛnɩ tɩ cɩɛrɛ. 7Lɛ so bɛ tɩ kabrɩ bʋɔlɩ a bɛ zʋm-nyɔw-taabɛ na tɩ be a gbee ayi sob pʋɔ a, kɛ́ bɛ wa sõw bɛ. A bɛ taabɛ tɩ wa na, bɛ wa yaw a zʋmɛ paalɩ a gbee a za ayi a tɩ faar na lĩm. 8A Sɩmʋ̃ Pɩɛr na tɩ nyɛ̃ a lɛ a, ʋ lo na gbĩ dume a Yeezu pile ɛ yel ʋ: «Sore e, taw zaa a ɩ̃ zie, ɩ̃ ɩ n yel-bier sob.» 9Dɛ̃bɩ̃ɛ tɩ ɩrɛ nɩ a Sɩmʋ̃ yaga, ʋlɛ nɩ a nɩbɛ bɛl za na tɩ be a be a, a zʋmɛ bɛ na tɩ nyɔw sɛw a lɛ a ƴãw. 10Lɛ n'a a mɩ̀ tɩ ŋmɛ̃ a Sɩmʋ̃ zʋm-lãw-nyɔw-taabɛ zie, a Zebede bibiir, Zakɩ nɩ Zã. Ɛ cɛ a Yeezu tɩ yel ɩ a Sɩmʋ̃: «Ta zɔrɛ dɛ̃bɩ̃ɛ ɩ, dɩ̃a na ta a, nɩbɛ nɛ bɛ fʋ na nyɔwr» 11Lɛ n'a bɛ tɩ duwri nɩ a gbee lɛb wa a kõkowr ƴãw, wa bɛr bom za ɛ tu a Yeezu pùor. 12A Yeezu na tɩ be a ten al ƴẽn sob pʋɔ a, nɩr kãw na tɩ kɔ̃w ʋ za a, mɩ̀ tɩ be n a be. Ʋ na tɩ nyɛ̃ a Yeezu a, ʋ lo na vɔblɩ muru ɛ lɔbr nuru zɛlɛ nɩ ʋ yere nɩ: «Sore e, fʋ̃ʋ wa bɔbr a, fʋ na tʋ̃ɔ na ɩ ɩ̃ lɛb vɩɛl.» 13A Yeezu tɩ dɔl ɩ nũu tɔ n ʋ ɛ yel: «Ɩ̃ bɔbr a, lɛb vɩɛl!» Ɛ́ daadaa lɛ a ʋ kɔnʋ tɩ baarɩ. 14A lɛ n'a a Yeezu tɩ kpãa ʋ k'ʋʋ taa pore a a ŋa yúor kʋ̀rɛ nɩr ɛ, ɛ yel ʋ: «Nɩ̃ɛ cen tɩ ɩ a bawr-maalbɛ jɩr fʋ ka a, ɛ́ fʋ tɩr a bawr-maal-bom, fʋ na lɛb vɩɛl a ƴãw, mɛ̃ a lɛ a Mõyiir na ƴãw a nʋɔr a: a tʋ̃ɔ wul a nɩbɛ kɛ fʋ lɛb a vɩɛl.» 15A Yeezu yúor tɩ lɛb a bãw yire yaga, ɛ zu-sɛbla na bɛ dɩ vuo a zɔrɛ gbone taa a ʋ zie kɛ́ bɛ tʋ̃ɔ bɛr wõ a ʋ ƴɛrʋ, ɛ ʋ sanɩ a bɛ bàalʋ. 16Ɛ cɛ a Yeezu mɩ́ tɩ taw na yi ʋ yõ zie a wɛjarɩ pʋɔ tɩ puore. 17Bibir kãw a Yeezu na tɩ kanɛ nɩ a nɩbɛ a, Farizɩ̃ɛ mɩnɛ nɩ Naaŋmɩn-Wulu bãw-bãw-karɩ tɩ pʋɔ nɩ a nɩbɛ pʋɔ. Galile lowr tẽli za, nɩ Zude tẽw lowr tẽli nɩ Zeruzalɛm n'a bɛ tɩ yi ɛ wa. A Sore fãw tɩ be n a Yeezu zie k'ʋ sanɛ baalbɛ. 18Nɩbɛ kãw tɩ wa ta na tuo gbɛr a ʋ bʋ̃-gana zu. Bɛ tɩ bɔbr ɩ a lɛ bɛ na na ɩ kpɛ n ʋ bin a Yeezu niŋé a. 19Ɛ cɛ a zu-sɛbla tɩ gbõ n taa zuo, bɛ bɛ tɩ bãw be bɛ na na tu n ʋ kpɛ n a ɩ. Lɛ so bɛ tɩ do a gàrʋ́, ŋmãa sule puo, ɛ tur ʋ nɩ a ʋ bʋ̃-gana bɛr ʋ siw a Yeezu niŋé a nɩbɛ sɔgɔ. 20A Yeezu na tɩ nyɛ̃ a bɛ Naaŋmɩn-sawfʋ ŋa a, ʋ yel a: «Ɩ̃ ba a, a fʋ yel-bebe suur dɩ na.» 21A Naaŋmɩn-Wulu-sɛ-sɛbrbɛ nɩ a Farizɩ̃ɛ mɩnɛ tɩ tɩɛrɛ na: «Ãa n'ɩ a sob ŋa na tʋʋr a Naaŋmɩn zʋmɛ a? Nɩ-buor sob ʋ na tʋ̃ɔ dɩ a yel-bebe suur a bɛ ɩ Naaŋmɩn yõ?» 22Ɛ cɛ a Yeezu na tɩ bãw a bɛ tɩɛrʋ a, ʋ sɔw na yel bɛ: «Bʋ̃ʋ n'ʋ so a tɩɛrʋ a ŋa taabɛ be a nyɩ zie? 23Abobe sob a ɩ kayãan zuo: ɩ̃ na na yel a gbɛr: fʋ páw nɩ a fʋ yel-bebe suur, bɩɩ ɩ̃ na na yel ʋ: ìr cere a? 24Ɛ cɛ ɩ̃ bɔbr a kɛ nyɩ bãwnɩ a, a Nɩsaal Bie tɛr ɩ fãw a tẽw zu na tʋ̃ɔ dɩ a yel-bebe suur.» Lɛ n'a a Yeezu tɩ yel a gbɛr: «Ɩ̃ yere na kʋ̀rɛ fʋ, ìr ɓáw a fʋ bʋ̃-gana kule nɩ a fʋ yir.» 25Daadaa lɛ ʋ ìr a bɛ niŋé, ɛ ɓáw a ʋ bʋ̃-gana lo n a yir sɔr, danɛ nɩ a Naaŋmɩn kule nɩ. 26Nʋɔr tɩ ɓãa nɩ bɛ za bɛ danɛ a Naaŋmɩn ; dɛ̃bɩ̃ɛ tɩ nyɔw bɛ na bɛ yere: «A dɩ̃a a, tɩ nyɛ̃ nɩ yel-bɛ-dãw-nyɛrɩ.» 27A yele a ŋa pùorí, a Yeezu tɩ yi na nyɛ̃ zuru-yar-diere kãw, a yúor na dɩ kɛ Levi a, ʋ zɩ̃ a ʋ tome zie, ʋ yel ʋ: «Tuur mɛ̃!» 28Ʋ tɩ bɛr ɩ bom za, ɛ ìr tuur ʋ. 29A Levi tɩ cɔbr ɩ dɩb a Yeezu ƴãw a ʋ yir; zuru-yar-dierbɛ yaga nɩ nɩbɛ bɛ mɩnɛ tɩ lãw nɩ bɛ na zɩ̃ dɩrɛ. 30A Farizɩ̃ɛ mɩnɛ nɩ a bɛ Naaŋmɩn-Wulu-sɛ-sɛbrbɛ tɩ 'hũ'hune na yere kʋ̀rɛ a Yeezu po-tuurbɛ: «Bʋ̃ʋ n'ʋ so nyɩ lãw nɩ zuru-yar-dierbɛ nɩ yel-bebe dem dɩrɛ ɛ nyúur?» 31A Yeezu tɩ de nɩ a ƴɛrʋ sɔw bɛ: «Nɩ-kpɛn bɛ nɛ bɛ mɩ́ tɛr dɔwta yel-ɩra ɩ, baalbɛ nɛ bɛ. 32Ɩ̃ sɩrɩ bɛ wa k'ɩ̃ɩ wa bʋɔlɩ nɩbɛ na tɩɛrɛ kɛ bɛ ɩ n nɩ-mɩn a ɩ, nɩbɛ na tɩɛrɛ kɛ bɛ ɩ n yel-bebe dem a bʋɔlʋ n'a ɩ̃ wa.» 33A Farizɩ̃ɛ mɩnɛ tɩ yel ɩ a Yeezu: «A Zã po-tuurbɛ nɩ a tɩ po-tuurbɛ mɩ́ tɛr ɩ a mʋta-tuo kʋra lɛ puore nɩ, ɛ cɛ a fʋ po-tuurbɛ cãa dɩrɛ ɛ nyúur.» 34A Yeezu tɩ sɔw na yel bɛ: «Nyɩ tɩɛrɛ kɛ nyɩ na tʋ̃ɔ na fɛr kul-taa cuw dem ƴãw bɛ tɛr mʋta-tuo ɛ a dɛb-sãan be a bɛ zie e? 35Ɛ cɛ bibie na vɩɛ na bɛ ír a dɛb-sãan a bɛ zie, a lɛn daar a, bɛ na mɩ́ tɛr ɩ a mʋta-tuo.» 36Ʋ tɩ cãa na lɛ lɔb zʋkpar ŋa kʋ̀ bɛ yel: «Bɛ bɛ dãw cɩ̃ɛ pɛn kpar-paala ƴãw tɩ ɓe n kpar-kʋra ɩ, alɛ bɛ ɩ lɛ, bɛ na cɩ̃ɛ nɩ a kpar-paala ɛ a pɛn-paala nɩ a kpar-kʋra bɛ de taa ɩ. 37Bɛ mɩ̀ kʋ̃ saw de divɛ̃ paala ƴãw wɔ-gbã-kore pʋɔ ɩ, alɛ bɛ ɩ lɛ a, a divɛ̃ paala na pur ɩ a wɔ-gban bɛr, a divɛ̃ cir ɛ a wɔ-gban sãw. 38Bɛ mɩ́ ƴãw nɩ divɛ̃ paala wɔ̃-gbã-paalɛ pʋɔ. 39Sob nɛ za na nyũ divɛ̃ kʋra mili a, bɛ mɩ́ lɛ bɔbr divɛ̃ paala ɩ, ʋ mɩ́ yel a: ‹A divɛ̃ kʋra n'a nʋmɛ zuo.› »

will be added

X\