1 Ɩ̃ bá Teofil i, nɩ-yaga ƴãw nɩ fãw sɛb manɩ a yele al na ɩ a tɩ sɔgɔ a. 2 Bɛ manɩ nɩ a yele, mɛ̃ a lɛ tɔr za a bɛlɩ dem na nyɛ̃ a a pɛr tib daar ɛ manɩ kʋ̀ tɩ a, ɛ́ bɛ kʋ̀ bɛ a tõ-nʋɔr kɛ bɛ hiere a Naaŋmɩn ƴɛrʋ a. 3 Lɛ so a mãa mɩ̀, ɩ̃ mɩ̀ sowri vla vla bãw a yele al za na ɩ a pɛr tib daar a, ɛ nyɛ̃ a vɩɛl k'ɩ̃ɩ sɛb manɩ a lɛ a na tu taa kʋ̀ fʋ, ɩ̃ bá-vla Teofil i. 4 Ɩ̃ ɩ n a ŋa kɛ fʋ tʋ̃ɔ nyɛ̃ bãw k'aa wulu, bɛ na wul fʋ a, ɩ n sɩza. 5 A lɛn daar a Erɔdɩ na tɩ dɩrɛ naalʋ a Zude tẽw zu a, bawr-maalɛ kãw tɩ be n be a yúor dɩ kɛ Zakari; ʋ tɩ ɩ n Abɩa pal pʋɔ bawr-maalɛ kãw. A ʋ pɔw tɩ ɩ n Aarɔ̃ bʋʋrɛ nɩr, a yúor dɩ kɛ Elizabɛr. 6 Bɛ za ayi tɩ ɩ n nɩ-mɩn a Naaŋmɩn niŋé ɛ tɩ sawr a Sore nɛ-ƴãwnɩ za, nɩ a lɛ ʋ na yel a ceretete. 7 Ɛ cɛ bɛ bɛ tɩ tɛr bie ɛ, a Elizabɛr na tɩ ɩ pɔw-ãan a ƴãw, ɛ bɛ za ayi mɩ̀ lɛ tɩ kor baar a. 8 Bibir kãw, a Zakari tɩ tone nɩ a ʋ bawr-maalɛ tome a Naaŋmɩn niŋé, a ʋ pal pʋɔ nɩbɛ na nɛ bɛ tɩ cɛ na de a tome a ƴãw. 9 Mɛ̃ a lɛ a bawr-maalbɛ na mɩ́ ɩrɛ a, bɛ tɩ ŋmɛ n gbãw kaa ir ʋ k'ʋʋ kpɛ tɩ nyɩw a tɩ-suur-zɔ̃ na nyuur vla vla a, a Sore zi-sõw pʋɔ. 10 A zu-sɛbla tɩ gbõ n taa ar a yẽw puore a tɩ-suur-zɔ̃ nyɩwfʋ daar. 11 Lɛ n'a a Zakari tɩ nyɛ̃ Sore malkɩ, ʋ ar a tɩ-suur-zɔ̃ nyɩwfʋ bawr-maal-kuur dʋrʋ lowr. A malkɩ na cen tɩ páw a Zakari a (1.11). 12 A Zakari na wa nyɛ̃ ʋ a, pʋ̀lá vʋ̃ɔ ʋ na ɛ́ dɛ̃bɩ̃ɛ nyɔw ʋ. 13 Ɛ cɛ a malkɩ tɩ yel ʋ na: «Ta zɔrɛ dɛ̃bɩ̃ɛ ɩ, Zakari i, Naaŋmɩn saw na de a fʋ puoru. A fʋ pɔw Elizabɛr na dɔw nɩ bi-dɛble kʋ̀ fʋ, fʋ por a yúor kɛ Zã. 14 Nʋ̃ɔ̀ na kpɩɛr fʋ nɩ a ʋ ƴãw, fʋ cɩlɛ fʋ za; nɩ-yaga mɩ̀ na cɩlɛ nɩ a ʋ dɔwfʋ ƴãw. 15 Ʋ na ɩ n kpɛ̃ɛ a Sore niŋé, ʋ kʋ̃ nyúur divɛ̃ nɩ dã-bɩ̃ɩ kãw za ɩ; ʋ na cãa nɩ a ʋ mã púorí ɛ a Vʋʋrʋ Sõw paalɩ ʋ. 16 Ʋ na tɛr ɩ a Ɩsɩrayɛl biir yaga lɛb wa n a Sore bɛ Naaŋmɩn zie; 17 ʋ na de nɩ a Naaŋmɩn niwn ɩ a ʋ nɩ-tona, ɛ tɛr a Naaŋmɩn-ƴɛr-manɛ Eli yã nɩ a ʋ fãw, k'ʋʋ ɩ a sãà mɩnɛ nɩ a bibiir lɛ kpɛ taa, ɛ a bɛ-wonbɛ lɛ tɩɛrɛ mɛ̃ a nɩ-mɩn a, ʋ tʋ̃ɔ cɔbrɩ nɩ-bʋʋrɛ na cɛlɛ a Sore a.» 18 A Zakari tɩ sowr ɩ a malkɩ: «Ŋmɩŋmɩn n'a ɩ̃ na ɩ tɩ bãw kɛ a na tu n a a ŋa? Mãa n'ɩ ŋa ɩ dɛ-nyãw ɛ a ɩ̃ pɔw mɩ̀ kor.» 19 A malkɩ tɩ sɔw ʋ na: «Mãa n'ɩ a Gabɩyɛl na mɩ́ be a Naaŋmɩn niŋé a; ʋ tõ m a k'ɩ̃ɩ wa ƴɛr sɔw fʋ, ɛ yel a yel-nʋ̃ɔ̀ ŋa kʋ̀ b. 20 A na ɩ a ŋa a, fʋ na kpar ɩ nʋɔr, fʋ kʋ̃ lɛ tʋ̃ɔ ƴɛr ɛ, ɛ gu a ʋlɩ bibir nɛ a yele a ŋa za nãa wa maalɩ a, fʋ na bɛ saw de a ɩ̃ ƴɛrʋ a ƴãw, ɛ cɛ a daar wa ta a, a ɩ̃ ƴɛrʋ a ŋa na tu na.» 21 A nɩbɛ tɩ ar a cɛlɛ a Zakari, ɛ́ bɛ tɩ bãw ŋmɩŋmɩn za n'a ʋ cɛlɛ a zi-sõw za pʋɔ a lɛ a ɩ. 22 Ʋ na wa yi a, ʋ bɛ tʋɔr ƴɛrɛ na ƴɛr sɔw bɛ ɩ, lɛ so bɛ tɩ bãw k'ʋʋ nyɛ̃ nɩ bom a zi-sõw pʋɔ; ʋ tɩ kpar ɩ nʋɔr ɛ kabrɛ manɛ nɩ a nuru wule bɛ. 23 A Zakari na wa tõ a ʋ bawr-maalɛ tome baar a, ʋ lɛb a kul a ʋ yir. 24 Al pùorí, a ʋ pɔw Elizabɛr wa tɩ tɛr ɩ pʋɔ sɔwlɛ nɩ tɩ ta cuwr anũu. Ʋ tɩ tɩɛrɛ nɩ ʋ pʋɔ: 25 «Nyɛ̃ a lɛ a Sore na maalɩ mɛ̃ a, ʋ saw na jɩr mɛ̃ kaa ƴɛrɛ ŋa, k'ʋʋ ír a vĩ bɛr mɛ̃ a nɩsaalbɛ niŋé.» 26 A Elizabɛr pʋɔ-tɛrʋ cuwr ayʋɔb sob daar, Naaŋmɩn tɩ tõ n a malkɩ Gabɩyɛl, Galile tẽw, tẽle kãw pʋɔ bɛ na bʋɔlɛ kɛ Nazarɛtɩ a, 27 pɔwsɩrale kãw zie na tɩ ƴãw yúor nɩ Daviir yir dɛb kãw bɛ na bʋɔlɛ kɛ Zuzɛb a: a pɔwsɩrale nɛ yúor tɩ dɩ na kɛ Marya. 28 A malkɩ tɩ kpɛ n a ʋ zie yel ʋ: «Cɩlɛ, fʋ̃ʋ Naaŋmɩn na maalɩ yaga za a, a Sore be n fʋ zie.» 29 A Marya na tɩ wõ a ƴɛr-bie a ŋa a, pʋl-vʋ̃ɔ tɩ tɛr ʋ nɩ yaga, ʋ tɩ sowre ʋ tʋɔra a puoru ŋa pɛr. 30 Lɛ n'a a malkɩ yel ʋ: «Ta zɔrɛ dɛ̃bɩ̃ɛ ɩ, Marya a, fʋ nyɛ̃ nɩ maalʋ a Naaŋmɩn zie. 31 Nyɛ̃, fʋ na tɛr ɩ pʋɔ dɔw dɛble, por a ʋ yúor kɛ Yeezu. 32 Ʋ na ɩ n kpɛ̃ɛ, bɛ na bʋɔlɛ ʋ nɩ Naaŋmɩn-na-do-saa-bɛ-pɩɛl-a Bie. A Sore Naaŋmɩn na de nɩ a ʋ sãà Daviir naalʋ da-kɔw kʋ̀ ʋ; 33 ʋ na dɩrɛ nɩ naalʋ kʋra lɛ a Ɩsɩrayɛl bʋʋrɛ zu, ɛ a ʋ naalʋ kʋ̃ tɛr baarʋ daar ɛ.» 34 A Marya tɩ yel ɩ a malkɩ: «Ŋmɩŋmɩn n'a a na ɩ tɩ ɩ a lɛ, Ɩ̃ na bɛ bãw dɛb a?» 35 A malkɩ tɩ sɔw ʋ na: «Vʋʋrʋ Sõw na siw nɩ a fʋ zu, ɛ a Naaŋmɩn-na-do-saa-bɛ-pɩɛl-a fãw na piw fʋ na nɩ a ʋ ɓaarʋ; lɛ so a bie na na dɔw a, na ɩ sõw, ɛ́ bɛ bʋɔlɛ ʋ Naaŋmɩn Bie. 36 A fʋ yɛb Elizabɛr n'ɩ ŋan mɩ̀ tɛr pʋɔ, ʋl na ɩ pɔw nyãw a, a ʋ cuwr ayʋɔb n'ɩ dɩ̃a, ʋl bɛ na tɩ bʋɔlɛ: pɔw-ãan a. 37 Naaŋmɩn sɩrɩ kʋ̃ guu yel kãw za ɩ.» 38 Lɛ n'a a Marya pãa lɛ yel: «Mãa n'ɩ ŋan, a Sore tõ-tõ-bi-pɔw nɛ m, a ɩ m mɛ̃ a lɛ fʋ na yel a.» A malkɩ tɩ bɛr ʋ na ɛ lɛb cen. 39 A lɛn daar, a Marya tɩ ìr a lo a sɔr páw cen a Zude tan pʋɔ tẽw kãw pʋɔ. 40 Ʋ tɩ kpɛ n a Zakari yir pùori a Elizabɛr. 41 Zɩ̃ kɛ a Elizabɛr na tɩ wõ a Marya puoru a, a bie tɩ dam ɩ a ʋ púorí. Lɛ n'a a Vʋʋrʋ Sõw tɩ paalɩ a Elizabɛr, 42 ʋ zɛw kɔkɔr yel kpɛ̃w za: «Naaŋmɩn maalɩ fʋ na gãw a pɔwbɛ za, ɛ mɩ̀ maalɩ a bie fʋ na na dɔw a. 43 Mãa mɩ̀ n'ɩ ãnʋ, a ɩ̃ Sore mã tɔr za sʋ̃ɔmɩ ìr wa a ɩ̃ zie? 44 Nyɛ̃, a fʋ puoru ƴɛr-bie na wa lo a ɩ̃ tòbrí lɛ pɛ a, a bie dam ɩ nʋ̃ɔ̀ damnʋ a ɩ̃ púorí. 45 Zu-nʋ̃ɔ̀ sob nɛ b, fʋ na saw kɛ a lɛ a Sore na tõ bɛ wa yel kʋ̀ b a, na tu n a tub a.» 46 Lɛ n'a a Marya tɩ yel: «Ɩ̃ sɩ́ɛ danɛ nɩ a Sore, 47 ɛ a ɩ̃ tɩɛrʋ za cɩlɛ a Naaŋmɩn ɩ̃ faarɛ ƴãw. 48 Ʋ saw na jɩr a ʋ tõ-tõ-bi-pɔw bãbaalʋ kaa. Sɩza n'a, dɩ̃a na ta a, a nɩbɛ na dɔwr tuur taa a, na bʋɔlɛ mɛ̃ nɩ Zu-nʋ̃ɔ̀ sob, 49 a Naaŋmɩn Kpɛnʋ-za-sob na maalɩ nɔ-ɓãa-yele a ɩ̃ ƴãw a. A ʋ yúor ɩ n sõw, 50 ʋ tɛr ɩ a ʋ nɔ̃wfʋ kʋra lɛ a bɛlɩ dem na zɔrɛ ʋ a zie. 51 Ʋ dɔl ɩ nũu wul a ʋ kpɛ̃nʋ: diw a pɔ̀lʋ dem yaarɩ; 52 ʋ cã n a kpɛ̃nʋ dem lɔb a bɛ naalʋ da-kɔwr zuru, ɛ zɛw a bãbaalbɛ. 53 Ʋ paal ɩ a kɔ̃ dem nɩ a ʋ maalʋ, ɛ bɛr a na-mɩnɛ bɛ lɛb kul nũ-zawlɛ. 54 Ʋ sõw nɩ a Ɩsɩrayɛl bʋʋrɛ, a ʋ tõ-tõ-biir: ʋ na lɛb bãwnɩ a ʋ nɔ̃wfʋ ɩb a, 55 a nʋɔr ʋ na ƴãw kʋ̀ a tɩ sãà mɩnɛ, a Abraham nɩ a ʋ bʋʋrɛ maalʋ ƴãw kʋra lɛ a.» 56 A Marya tɩ kpɛ n a Elizabɛr zie tɩ ta mɛ̃ cuwr ata a, al pùorí, ʋ tɩ lɛb a kul a ʋ yir. 57 A Elizabɛr dɔwfʋ na wa ta a, ʋ dɔw nɩ dɛble. 58 A ʋ sɩman pʋɔ dem nɩ a ʋ nɩbɛ tɩ wõ na kɛ a Sore mal ʋ nɩ yaga a ʋ nɔ̃wfʋ pʋɔ, ɛ tɩ lãw nɩ ʋ cɩlɛ. 59 A bibie anĩ sob na wa vɩɛ a, bɛ tɩ wa n a bie yʋɔr-ŋmãafʋ, ɛ tɩ bɔbr kɛ bɛ por a ʋ yúor kɛ Zakari mɛ̃ a ʋ sãà a. 60 Ɛ cɛ a mã tɩ yel a: «Ʋ̃ʋ'hʋ̃! A ʋ yúor na dɩ na kɛ Zã.» 61 Bɛ tɩ yel ʋ na: «A fʋ yir pʋɔ a, nɩr kãw za bɛ dɩ a a ŋa ɩ.» 62 Bɛ tɩ kabrɛ na sowre a sãà kɛ ŋmɩŋmɩn n'a ʋ bɔbr kɛ bɛ bʋɔlɛ a bie. 63 Ʋ tɩ ƴãw na bɛ de da-pɛwli-sɛbra kʋ̀ ʋ, ʋ sɛb a ƴɛr-bie a ŋa ƴãw: «A ʋ yúor dɩ na kɛ Zã.» A tɩ ɩ n nɔ-ɓãa-yel a bɛ zie. 64 A pɛr nɛ pʋɔ, a Zakari tɩ lɛb a tʋɔr ƴɛrɛ, ɛ tɩ ƴɛrɛ danɛ nɩ a Naaŋmɩn. 65 Lɛ n'a dɛ̃bɩ̃ɛ tɩ nyɔw a sɩman pʋɔ dem za, ɛ a Zude tan pʋɔ za, bɛ tɩ ƴɛrɛ nɩ a yele a ŋa ƴɛrʋ. 66 A bɛlɩ dem za na tɩ wone a yele a ŋa a, tɩ de na ƴãw a bɛ socie pʋɔ, ɛ yere: «Ŋmɩŋmɩn n'a a bie ŋa pãa na wa ŋmɛ̃ a?» A Sore fãw tɩ sɩrɩ na be a ʋ zie. 67 Vʋʋrʋ Sõw tɩ siw na paalɩ a ʋ sãà Zakari, ʋ ƴɛr Naaŋmɩn-ƴɛr-manɛ ƴɛrʋ a ŋa: 68 «A Sore, a Ɩsɩrayɛl Naaŋmɩn tɛr ɩ puoru, ʋ jɩr ɩ a ʋ nɩ-bʋʋrɛ kaa ɛ faa bɛ, 69 ɛ ɩ faafʋ fãw yi a tɩ ƴãw a ʋ tõ-tõ-bie Daviir yir pʋɔ. 70 A a ŋa n'a ʋ tɩ ƴãw a ʋ ƴɛr-man-son yel a koro za, 71 k'ʋʋ na faa tɩ nɩ a tɩ dɔ̃ dem nuru pʋɔ, nɩ a nɩbɛ na hɩ̃ɛn tɩ a nuru pʋɔ. 72 Ʋ wul ɩ a ʋ nɔ̃wfʋ a tɩ sãà mɩnɛ, ɛ cãa lɛ bãwnɩ a ʋ Wõ-ta-sõw, 73 a pɔb ʋ na pɔ a tɩ sãakʋm Abraham zie, 74 k'ʋʋ na faa tɩ nɩ a tɩ dɔ̃ dem nuru pʋɔ a, nɩ k'ʋʋ na ɩ na tɩ bɛr dɛ̃bɩ̃ɛ ɛ ƴãwnɛ ʋ, 75 tʋ̃ɔ ɩ nɩ-son nɩ nɩ-mɩn a ʋ niŋé, a tɩ bibi-vɩɛrɩ za a. 76 Ɛ fʋ̃ʋ bɩ-pɩɩla a, bɛ na bʋɔlɛ fʋ na kɛ Naaŋmɩn-na-do-saa-bɛ-pɩɛl-a ƴɛr-manɛ, fʋ na de nɩ a Sore niwn tʋ̃ɔ cɔbrɩ a ʋ sɛɛ, 77 ɛ ɩ a ʋ nɩ-bʋʋrɛ bãw a faafʋ a bɛ yel-bebe suur pawfʋ zũú, 78 a tɩ Naaŋmɩn nɔ̃wfʋ na bɛ tɛr baarʋ a bãwfʋ n'ɩ a ŋa. A nɔ̃wfʋ ŋa ƴãw n'a, a sa-zu mʋ̃tɔ̃w na pure a ta tɩ. 79 Ʋ tɩ pur a, k'ʋʋ caalɩ a bɛl na be a ligẽ pʋɔ nɩ a kũu ɓaárʋ́ a, ɛ tɛr tɩ lo n a ƴã-ɓaarʋ sɔr.» 80 A bie ʋl a, ʋ tɩ kɛrɛ na ɛ a ʋ yã bɩrɛ; ʋ tɩ be n wɛja kpalɩ pʋɔ tɩ ta a ʋlɩ bibir ʋ na wul ʋ tʋɔra a Ɩsɩrayɛl nɩbɛ a.
