ZAKƖ 4

1A taw-taa nɩ a zɛbr na mɩ́ be a nyɩ cara pʋɔ a, nyɩnɛ n'a a mɩ́ yi? A nʋ̃ɔ̀ faar vʋla na mɩ́ mʋɔr a nyɩ ƴãgamɛ pʋɔ a, be bɛ n'a a mɩ́ yi ɛ? 2Nyɩ mɩ́ nyɛ̃ nɩ bom bɔbr ʋ ɛ kʋ̃ tʋ̃ɔ páw ʋ ɛ, a ɩ kʋ́-taa nɩ nyuur, ɛ̀ nyɩ zɛbr taa ɛ tawr taa zaa lɛ. Bʋ̃-kãw vʋla mɩ́ kpɩɛr nyɩ na, ɛ́ nyɩ kʋ̃ tʋ̃ɔ páw ʋ ɛ, lɛ n'a nyɩ mɩ́ ìr ɩ a zɛb-taa nɩ a taw-taa. Nyɩ bɛ tɛr a ɩ, nyɩ na bɛ zɛlɛ a Naaŋmɩn zie a ƴãw. 3Nyɩ mɩ́ zɛlɩ na ɛ bɛ páw ɛ, a nyɩ tɩɛrʋ na bɛ vɩɛl a ƴãw: nyɩ na mɩ́ zɛlɛ a nyɩ nʋ̃ɔ̀ wob tɛwr ƴãw a. 4Naaŋmɩn bɛl-bɛlbɛ bɛ ŋa! Nyɩ bɛ bãw kɛ́ nɩr wa ɩ a tẽ-daa bá a, ʋ mɩ́ lɩɛb ɩ Naaŋmɩn dɔ̃ sob ɛ? Lɛ so, ʋlɩ sob wa bɔbr k'ʋʋ ɩ a tẽ-daa bá a, ʋ mɩ́ lɩɛb ɩ Naaŋmɩn dɔ̃ sob. 5Nyɩ tɩɛrɛ kɛ́ zawla lɛ ƴãw n'a a Sɛb-sõw yel a ƴɛr-bie a ŋa bɩɩ? «A Naaŋmɩn bɛ sawr a vʋʋrʋ ʋ na ƴãw ʋ kpɩɛr a tɩ pʋɔ a ƴãw ɛ.» 6Ɛ cɛ a maalʋ a Naaŋmɩn na kʋ̀ tɩ a ɩ n kpɛ̃ɛ zuo lɛ. Bʋ̃ʋ n'ʋ vɛ̃, bɛ mɩ̀ cãa na lɛ yel: «A Naaŋmɩn mɩ́ ba n gbɛr a pɔ̀lʋ dem niŋé, ɛ maalɩ a su-siwri dem.» 7A na ɩ lɛ a, nyɩ mɩ́ bɛr nyɩ tʋɔra kʋ̀ a Naaŋmɩn; nyɩ mɩ́ ba gbɛr a Gɛgɛra niŋé, ʋʋ na zɔ na zãá nɩ nyɩ. 8Nyɩ taw pɩɛlɩ a Naaŋmɩn, ʋʋ na taw na pɩɛlɩ nyɩ. Nyɩ pɛw a nyɩ nuru, nyɩɩm yel-bebe dem bɛ ŋan ɩ; nyɩ maalɩ a nyɩ socie a vɩɛl, nyɩɩm nɩbɛ a tɩɛrʋ na põ a! 9Nyɩ saw a nyɩ bãbaalʋ, nyɩ ɩ ko-tuolu dem, nyɩ kone; nyɩ bɛr laarʋ ɛ kone, ɛ a nyɩ nʋ̃ɔ̀ lɩɛbɩ pʋ-sãwna. 10Nyɩ siwre nyɩ tʋɔra a Sore niŋé, ʋʋ na zɛw nyɩ na. 11Yɛbr ɩ, nyɩ ta mɩ́ manɛ taa yel-faar ɛ. Ʋlɩ sob na manɛ a ʋ yɛb yel-faar, ɛ bãwnɛ a ʋ sãwna a, ʋ sãwnɛ nɩ a Naaŋmɩn-Wulu yúor, ɛ bãwnɛ a Naaŋmɩn-Wulu yele. Ɛ cɛ fʋ̃ʋ wa dɩrɛ nɩ a Naaŋmɩn nʋɔr ƴɛrʋ a, fʋ bɛ ɩ a Naaŋmɩn nʋɔr nɔ-sawrɛ ɩ, fʋ ɩ n a ʋ ƴɛr-dɩrɛ. 12Naaŋmɩn yõ n'ʋ ɩ a nɔ-ƴãwnɛ nɩ a ƴɛr-dɩrɛ; ʋl yõ n'ʋ na tʋ̃ɔ faa, ʋl yõ n'ʋ na tʋ̃ɔ kʋ́. Fʋ̃ʋ a, ãa nɛ b, na bãwnɛ a fʋ tɔ sãwna? 13Ƴɛrɛ ŋa a, nyɩ bɛrɛ wone, nyɩɩm na yere kɛ́: «Dɩ̃a bɩɩ bio, tɩ na cen nɩ tẽ-kpɛ̃ɛ ŋa pʋɔ, tɩ maalɩ yuon a be, yɛ̀r yɛ̀rʋ́ páw libie a.» 14Ɛ́ nyɩ na bɛ bãw a lɛ a nyɩ nyɔ-vʋʋrʋ na na ŋmɛ̃ a bio a! Bʋ̃ʋ n'ʋ vɛ̃, nyɩ ɩ na mɛ̃ bʋ̃-tʋlʋ uuru na mɩ́ sãanɛ wa baarɛ ɛ lɛ bɔr a. 15A ŋa n'a a nɩ̃ɛ mɩ́ sɛw kɛ́ nyɩ yel: «A Sore wa saw a, tɩ na vʋʋrɛ na, ɛ tɩ na ɩ n bom ŋa bɩɩ bom ŋa.» 16Ɛ cɛ nyɩ mɩ́ bɛr a ɛ zɛwr nyɩ tʋɔra pɔrɛ nɩ pɔb tɛwr. A pɔb a ŋa taabɛ bɛ vɩɛl ɛ. 17Lɛ so, nɩr wa bãw a vla maalʋ ɛ bɛ maalɛ a, ʋ maal ɩ yel-bier.

will be added

X\