ZAKƖ 3

1Ɩ̃ yɛbr ɩ, nyɩ ta bɔbr kɛ́ nyɩ ɩ wul-wulbɛ yaga ɩ. Nyɩ bãw na k'aa tɩɩm na wule a nɩbɛ a, bɛ na maal ɩ tɩ nɩ a ƴɛrʋ a kpɛmɛ zuo a nɩbɛ dem. 2Tɩ za tule nɩ yaga za. Nɩr bɛ wa tule towtow a ʋ ƴɛrʋ pʋɔ a, ʋ ɩ n nɩ-vla baarɩ, ʋ na tʋ̃ɔ na nyɔw ʋ mɩŋa. 3Tɩ mɩ́ ƴãw nɩ nɔ-bamɛ a wie ƴãw k'aa sawr a tɩ nʋɔr, kɛ̀ tɩ tʋ̃ɔ so a ƴãgamɛ za lɩɛbɛ cere nɩ be tɩ na bɔbr a. A wie nɩ a nɔ-bamɛ (3.3). 4Bɩɩ nyɩ mɩ̀ nyɛ̃ a gbee a: alɛ saa bɛrmɛ̃ sɛw ŋmɩn, ɛ a sɛsɛb fure nɩ fãw darɛ a a, ɛ cɛ, bʋ̃-dãana zaa pʋrɩ n'ʋ bɛ mɩ́ dãanɛ nɩ a, ɛ a cere a be a gbor-duwre na bɔbr a. 5Lɛ mɩ̀ n'a, a zɛl ɩ n a ƴãgan ɓɛrmɛ na ɩ pʋrɩ lɛ a, ɛ na tʋ̃ɔ pɔrɛ ʋ na maalɛ yel-bɛrɛ a ƴãw. Nyɩ tɩɛrɩ nyɛ̃ a lɛ vũu cãpile na mɩ́ nyɩw wɛ-kpɛ̃ɛ a! 6A zɛl mɩ̀ ɩ n vũu. Faalʋ tẽw n'ʋ be a tɩ ƴãgan pʋɔ, sãwnɛ a tɩ beba za. Ʋ mɩ́ ɩ na a tɩ beba za nyɔw vũu, na ɩ a tẽ-faa vũu mɩŋa a. 7Dʋ̃-bʋʋrɛ kãw za bɛ be be a nɩsaal kʋ̃ tʋ̃ɔ pɔwlɩ ɛ: a wɛ-dʋn nɩ a lili, a bʋ̃-vuri nɩ a zʋ́mɛ. 8Ɛ cɛ nɩsaal za kʋ̃ tʋ̃ɔ pɔwlɩ a zɛl ɛ: ʋ kpɛ n faa ɛ lɩɛbɛ kʋra lɛ, ʋ ɩ n lɔw tɛwr na kʋ́rɛ a. 9Ʋlɛ n'ʋ tɩ mɩ́ danɛ nɩ a Sore tɩ Sãà, ɛ ʋlɛ n'ʋ tɩ mɩ́ ŋmɩɛr ɩ ƴãwn a nɩsaalbɛ na ɩ a Naaŋmɩn ŋmɛ̃-ta-taabɛ a. 10A nɔ-been nɛ̃ pʋɔ n'a a maalʋ bɩɩ a ŋmɛ-ƴãw ƴɛr-bie yire. Ɩ̃ yɛbr ɩ, a bɛ tɛr sɔr k'aa mɩ́ ɩ a lɛ ɩ. 11A kʋ̃ɔ-nʋ̃ɔ̀ nɩ a kʋ̃ɔ-tuo na tʋ̃ɔ na bule yire bul-nɔ-been ƴãw ɩ? 12Ɩ̃ yɛbr ɩ, kãkãw na tʋ̃ɔ na wɔ̃ lɩ̃ɛmɛ, ɛ suw-tɩɛ wɔ̃ kãkamɛ bɩɩ? Bul-nʋɔr na ɩ nyaarʋ a kʋ̃ tʋ̃ɔ bule kʋ̃ɔ na nʋmɛ a ɩ. 13Ãa n'ʋ bãw yã ɛ tɛr yã a nyɩ pʋɔ? Ʋ wul a sãá cenu na vɩɛl a pʋɔ, nɩ ɩ-ɩrɩ na ɩ yã-bãwnɛ nɩ su-siwra sob ɩ-ɩrɩ a pʋɔ. 14Ɛ cɛ nyu-faa nɩ zuo-taa tɩɛrʋ wa n'a be a nyɩ socie pʋɔ a, nyɩɩm ta zɛwr nyɩ tʋɔra ɛ ŋmarɛ ziri piwr ɩ a yel-mɩŋa ɩ. 15A yã-bãwfʋ ŋa tɔ bɛ yi Naaŋmɩn zie ɩ; tẽw zu n'a ʋ yi, nɩsaalʋ zie, kɔ̃tɔmɛ zie mɔ̃ mɩ̀. 16A be a nyuur nɩ a zuo-taa tɩɛrʋ na be a, a damnʋ nɩ a ɩ-faar bʋʋrɛ za mɩ̀ be n be. 17Ɛ cɛ a yã-bãwfʋ na yi a Naaŋmɩn zie a, ʋ mɩ̀ de nɩ niwn ɩ vɩɛlʋ tɛwr; al pùorí ʋ ɩ ƴã-ɓaarʋ, su-nʋ̃ɔ̀, nʋɔr sawfʋ; ʋ mɩ́ ɩ n nɩbaal-zɔba nɩ ɩ-vɩɛlɩ tɛwr; ʋ bɛ mɩ́ owre ɩ, ɛ bɛ sɔwlɛ a ʋ pʋ-tɩɛrʋ ɛ. 18Bɛlɩ dem na mɩ́ ɩrɛ a ƴã-ɓaarʋ ɩb a, a ƴã-ɓaarʋ pʋɔ n'a bɛ mɩ́ bʋ̀r, ɛ a wɔmɛ bɛ na mɩ́ wa de a, alɛ n'ɩ a mɩnʋ.

will be added

X\