EBIRE 13

1Nyɩ cãa nɔnɛ taa mɛ̃ yɛbr a. 2Nyɩ taa yiire a sãanʋ deb yele bɛrɛ ɩ. Bʋ̃ʋ n'ʋ vɛ̃, a sãanʋ deb ŋa pʋɔ n'a bɛ mɩnɛ de malkɩ mɩnɛ sãanʋ ɛ bɛ bãwnɩ a ɩ. 3Nyɩ tɛr a gaso pʋɔ dem tɩɛrʋ mɛ̃ nyɩ lãw nɩ bɛ na be a gaso pʋɔ a; nyɩ tɛr a bɛlɩ dem bɛ na dɔwrɛ a tɩɛrʋ, nyɩ mɩ̀ na tɛr ƴãgamɛ a. 4A nɩbɛ za, bɛ tɛr maal-ɩrɛ a kul-taa ƴãw, a dɛbr nɩ a pɔwbɛ na kul taa a, bɛ be taa bɛl tɛwr ƴãw. Bʋ̃ʋ n'ʋ vɛ̃, Naaŋmɩn na maal ɩ nɩ a pɩ̃ɔ-yel-maalbɛ nɩ a pɔw-gaa-yel-bier-maalbɛ ƴɛrʋ. 5A libi-nɔ̃w ta tʋ̃ɔ nyɩ ɛ; a lɛ nyɩ na tɛr a, a man nyɩ. Bʋ̃ʋ n'ʋ so, a Naaŋmɩn yel a: «Ɩ̃ bɛ be za na bɛr fʋ ɛ, ɩ̃ kʋ̃ jɛ b bɛr towtow ɛ.» 6Lɛ so tɩ na tʋ̃ɔ bɛr tɩɛrʋ ɛ yel: «A Sore n'ɩ a ɩ̃ sõwne, ɩ̃ kʋ̃ zɔrɛ bom za dɛ̃bɩ̃ɛ ɩ. Bʋ̃ʋ n'ʋ nɩsaal na tʋ̃ɔ ɩ m?» 7Nyɩ lɛb tɩɛrɩ a nyɩ niwn-dierbɛ yele, bɛl na tɩ manɩ a Naaŋmɩn ƴɛrʋ kʋ̀ nyɩ a. Nyɩ nyɛ̃ a lɛ bɛ na vʋʋrɩ tɩ kpi n a, nyɩ cɔwrɛ a bɛ Naaŋmɩn-saw-deb. 8A Yeezu Kɩrɩta been n'ʋ, a zãa nɩ a dɩ̃a, nɩ a yome za. 9Nyɩ ta saw wul-pɛ-bʋʋrɛ za nɩ wul-yoru wa bɔr ɩ nyɩ ɛ. Naaŋmɩn maalʋ n'ʋ a maal ɩ k'ʋʋ mɩ́ ɩ a nɩr ʋ kpɛmɛ socir, bʋ̃-dɩrɩ bɛ n'a ɩ; a bɛlɩ dem na tuur a nɛɛ bɛ na ƴãw caarɩ a bʋ̃-dɩrɩ a ŋa a, bɛ bɛ dãw nyɛ̃ tɔnɛ a pʋɔ ɩ. 10Tɩ tɛr ɩ bawr-maal-kuur, a pɛn-sɛw pʋɔ bawr-maalbɛ na bɛ tɛr sɔr na dɩ bom na dɔwlɩ a ʋ zu a ɩ. 11A dʋn al, a bawr-maal-kara na mɩ́ ɩ a zɩ̃ɩ kpɛ n a zi-sõw-za-pʋɔ-zi-sõw pʋɔ, tɩ de tɩr a yel-bebe suur pawfʋ ƴãw a, bɛ mɩ́ yi na zaa nɩ a dʋn a ŋa ƴãgamɛ a kapamɛ pʋɔ tɩ nyɩw bɛr. 12A lɛ n'a so a Yeezu mɩ̀ yi zaa a tẽw pʋɔ tɩ kpi, k'aa ʋl mɩŋa zɩ̃ɩ tʋ̃ɔ ɩ a nɩbɛ bɛ ɩ son. 13A na ɩ a ŋa a, nyɩ ɩ tɩ yi a kapamɛ pʋɔ tuor ʋ, ɛ saw de a ʋlɩ vĩ-been nɛ. 14Bʋ̃ʋ n'ʋ vɛ̃, a tẽw zu ka a, tɩ bɛ tɛr tẽ-kpɛ̃ɛ ʋ be be kʋra lɛ ɩ. A tẽ-kpɛ̃ɛ ʋl na waar a n'ʋ tɩ bɔbr. 15Tɩ tu a Yeezu maalɛ danʋ bawr kʋra lɛ kʋ̀rɛ a Naaŋmɩn, a pɛr lɛ kɛ danʋ na yire nɛɛ na íre a ʋ yúor a pʋɔ. 16Nyɩ taa yiire a nɩbɛ maalʋ nɩ a sõw-taa bɛrɛ ɩ, a bawr a ŋa taabɛ n'a mɩ́ nʋmɛ a Naaŋmɩn zie. 17Nyɩ sawr a nyɩ niwn-dierbɛ nʋɔr ɛ siwre nyɩ tʋɔra a bɛ zie. Bʋ̃ʋ n'ʋ vɛ̃, bɛ kaarɛ nɩ a nyɩ zie kʋra lɛ, mɛ̃ Naaŋmɩn nãa wa sowri bɛ na a. Nyɩ ɩrɛ bɛ tʋ̃ɔ tone a bɛ tome nɩ nʋ̃ɔ̀, ɛ ta tone zɛbr ɩ ɛ, a kʋ̃ wa n tɔnɛ za a nyɩ zie ɩ. 18Nyɩ puore kʋ̀rɛ tɩ. Tɩ bãwnɩ a na a tɩ tɩɛrʋ na vɩɛl a, bʋ̃ʋ n'ʋ vɛ̃, tɩ bɔbr a kɛ tɩ ɩrɛ vla a yele za pʋɔ. 19Ɩ̃ zɛlɛ nyɩ na kɛ́ nyɩ puore kpɛ̃w za, a Naaŋmɩn saw ɩ̃ lɛb wa a nyɩ zie fɔ̃w. 20A ƴã-ɓaarʋ Naaŋmɩn ɩ na a tɩ Sore Yeezu, na lɩɛbɩ a pi-cɩ̃ɩn-kpɛ̃ɛ, a zɩ̃ɩ ʋ na cir bin nɩ Wõ-taa na be kʋra lɛ a ƴãw a, ʋ ɩ na ʋ lɛb yi a kũuni pʋɔ. 21A Naaŋmɩn ŋa a, ʋ ɩ kɛ̀ nyɩ mɩ́ tʋ̃ɔ yel-vla za maalɩ, tʋ̃ɔ maalɛ a ʋ pʋ-tɩɛrʋ; ʋ mɩ́ maalɩ a lɛ na pɛlɩ a ʋ pʋɔ a, a tɩ zie, a Yeezu Kɩrɩta ƴãw, ʋl na so danʋ a yome yome za a. Amɛn. 22Yɛbr ɩ, ɩ̃ zɛlɛ nyɩ na kɛ́ nyɩ dɩ kanyir bɛr wõ a kpaalʋ ƴɛr-bie a ŋa, ŋmãa ŋmãa lɛ n'a ɩ̃ sɛb nyɩ. 23Nyɩ bãwnɩ a kɛ́ bɛ lɛb a bɛr a tɩ yɛb Timote. Ʋlɛ wa wa fɔ̃w a, ɩ̃ na wa na wa nyɛ̃ nyɩ, mãa nɩ a ʋl za. 24Nyɩ pùori a nyɩ niwn-dierbɛ za nɩ a Kɩrɩta-nɩbɛ za. A bɛl na yi a Ɩtali tẽw a, puore nyɩ na. 25A Naaŋmɩn maalʋ, ʋ be a nyɩ za zie!

will be added

X\