1 Alɛ n'a so a mãa, Pol, ɩ̃ puore a Naaŋmɩn. Ɩ̃ be n a gaso pʋɔ a Yeezu Kɩrɩta tome ɩ̃ na tone a nyɩɩm nɩ-bʋʋr-yoru ƴãw a zũú. 2 Nyɩ bãw nɩ a maalʋ a Naaŋmɩn na kʋ̀ m a nyɩ ƴãw a ʋ pʋ-tɩɛrʋ maalʋ ƴãw a, 3 a lɛ ʋ na wul mɛ̃ ɩ̃ bãw a ʋ yel-sɔwla a, mɛ̃ a lɛ ɩ̃ na sɛb ŋmãa-ŋmãa kʋ̀ nyɩ a. 4 Nyɩmɛ wa kanɛ a ɩ̃ sɛbɛ a, nyɩ na nyɛ̃ nɩ a lɛ ɩ̃ na bãw a yel-sɔwla na caarɩ a Kɩrɩta sɛw a. 5 A Naaŋmɩn yel-sɔwla ŋa a, ʋ bɛ tɩ wul ʋ a koro za nɩbɛ mɛ̃ a lɛ ʋ na ƴãw a Vʋʋrʋ Sõw wul ʋ a ƴɛrɛ ŋa a ʋ nɩ-toni na ɩ son a, nɩ a ʋ ƴɛr-manbɛ a ɩ. 6 A Naaŋmɩn yel-sɔwla ʋl n'ɩ ŋa: a Yel-nʋ̃ɔ̀ zũú, a Yeezu Kɩrɩta pʋɔ, ʋ ɩ na a nɩ-bʋʋr-yoru mɩ̀ pʋɔ a gbã-dɩ-bʋ̃-been nɛ pʋɔ, bɛ pʋɔ a ƴãgã-been nɛ pʋɔ, nɩ a nɔ-been nɛ ʋ na ƴãw a pʋɔ. 7 Ɩ̃ lɩɛb ɩ a Yel-nʋ̃ɔ̀ tõ-tõ-bie, a maalʋ a Naaŋmɩn na kʋ̀ m nɩ fãw a zũú. 8 A mãa na ɩ a pʋrɩ woro a Kɩrɩta-nɩbɛ za pʋɔ a, mãa n'ʋ a Naaŋmɩn kʋ̀ a maalʋ ŋa, k'ɩ̃ɩ hieri yel a Kɩrɩta Naalʋ na bɛ vʋʋr a Yel-nʋ̃ɔ̀ kʋ̀ a nɩ-bʋʋr-yoru, 9 ɛ ɩ a ɩ cãa a nɩsaalbɛ za zie, a lɛ a Naaŋmɩn na mɩ́ ɩ a ʋ yel-sɔwla tu a ʋ tub a; ʋl na ɩ bome za íre a, ʋ ɩ n a ʋ yel-sɔwla ŋa gã koro za a ʋl mɩŋa pʋɔ. 10 A ŋa n'a a ƴɛrɛ ŋa, a Lãw-yir ƴãw, a salom zu naalʋ-dɩrbɛ nɩ fãw dem bãw a Naaŋmɩn yã-bãwfʋ pɔlɛ za. 11 A a ŋa za tu n a lɛ a Naaŋmɩn na tɩ cɔbrɩ a yele bìn kʋra lɛ a, a yele ʋ na maalɩ a tɩ Sore Yeezu Kɩrɩta pʋɔ a. 12 A Kɩrɩta tɩ na saw de ɛ lãw nɩ a ƴãw n'a, tɩ mɩ́ sʋ̃ɔmɩ saw bɛr dɛ̃bɩ̃ɛ ɛ ar a Naaŋmɩn niŋé. 13 A na ɩ a ŋa a, ɩ̃ zɛlɛ nyɩ na, nyɩ ta saw a kpɩɛrʋ ɩ̃ na sawr dier a nyɩ ƴãw a tʋ̃ɔ nyɩ ɛ, a ɩ n a nyɩ yúor-vɩɛlʋ-danʋ. 14 Alɛ n'a so ɩ̃ gbine dume a Naaŋmɩn Sãà niŋé, 15 ʋl zie dɔwlʋ za na yi, a salom zu nɩ a tẽw zu ka a. 16 Ʋl na kpɛ yúor-vɩɛlʋ-danʋ naalʋ a, ɩ̃ zɛlɛ na k'ʋʋ ɩ a Vʋʋrʋ kʋ̀ nyɩ a fãw, k'aa nyɩ pʋ̃ɔmɩ́ nɩr tɛr fãw. 17 Ʋ saw a Kɩrɩta kpɩɛr a nyɩ socie pʋɔ, a nyɩ Naaŋmɩn-sawfʋ zũú, nyɩ tɛ nyɩgɛ ɛ kpɛmɛ a nɔ̃wfʋ pʋɔ. 18 Lɛ n'a nyɩ na tʋ̃ɔ bãw, lãw nɩ a Kɩrɩta-nɩbɛ za, a lɛ a Kɩrɩta nɔ̃wfʋ na yɛlmɛ̃ ɛ wõwme a, na kɛrɩ ɛ zulme a, 19 ɛ́ bãw a Kɩrɩta nɔ̃wfʋ na gãw bãwfʋ za a, lɛ n'a a Naaŋmɩn na paalɩ nyɩ ʋ za. 20 A Naaŋmɩn, na na tʋ̃ɔ mɩ́ maalɩ yel za tɩ zuo nɩ a lɛ tɩ na zɛlɛ bɩɩ tɩɛrɛ a, a ʋ fãw na tone a tɩ pʋɔ a zũú a, 21 ʋlɛ so yúor-vɩɛlʋ-danʋ a Lãw-yir pʋɔ a Yeezu Kɩrɩta yúor ƴãw, kʋra lɛ nɩ yome yome za. Amɛn.
