EFƐƐZƖ 1

1A mãa Pol, Naaŋmɩn na nɔ̃w yã ƴãw ɩ̃ ɩ a Yeezu Kɩrɩta nɩ-tona a, mãa n'ʋ sɛbr a Kɩrɩta-nɩbɛ na be a Efɛɛzɩ tẽw a, ɛ́ saw de a Yeezu Kɩrɩta bɛ lɛbr pùor a. 2A Naaŋmɩn tɩ Sãà nɩ a Sore Yeezu Kɩrɩta kʋ̀ nyɩ maalʋ nɩ ƴã-ɓaarʋ. 3A Naaŋmɩn, tɩ Sore Yeezu Kɩrɩta Sãà, tɛr ɩ puoru. Tɩ na lãw nɩ a Kɩrɩta a, ʋ maalɩ tɩ nɩ a tẽ-vla pʋɔ, nɩ maal-pɛ-bʋʋrɛ za Vʋʋrʋ Sõw na tɩrɛ a. 4Ʋ bɛ tɩ ír a tẽ-daa sɛr ɛ, ɛ de niwn kaa ir tɩ a Kɩrɩta ƴãw, kɛ́ tɩ wa lɩɛbɩ nɩ-son na bɛ tɛr sãwna bɛ yere a, a ʋ nɔ̃wfʋ pʋɔ, a ʋ niŋé. 5Ʋ tɩ de nɩ niwn bãwnɩ tɩ, k'ʋʋ wa de tɩ tɩ ɩ a ʋ bibiir a Yeezu Kɩrɩta ƴãw. A ŋa n'a ʋ tɩ nɔnɛ ɛ bɔbr. 6A na ɩ a ŋa a, nyɩ ɩ tɩ danɛ a Naaŋmɩn na ƴãw a ʋ Bi-nɔna kʋ̀ tɩ a maalʋ sɛw a ŋa zawla lɛ a. 7A Kɩrɩta zɩ̃ɩ n'a cir yaarɩ faa tɩ, ɛ̀ tɩ páw a tɩ sãwna suur. A ŋa n'a a Naaŋmɩn wul k'aa ʋ maalʋ bɛ tɛr manʋ ɛ. 8A ʋ maalʋ ŋa pʋɔ n'a a Naaŋmɩn paalɩ tɩ nɩ a yã-bãwfʋ za, nɩ a yã za: 9ʋ ɩ na tɩ bãw a ʋ yel-sɔwla za ʋ na tɩ dãw nɔnɛ cɔbrɩ, k'aa Kɩrɩta wa tu 10a tɩ faafʋ tome daar nãà wa ta a. Ʋ tɩ tɩɛrɛ na k'ʋʋ ɓã bom za na be a salom zu nɩ tẽw zu a taa, ʋ ɓã a za taa na-kpɛ̃ɛ been pile na ɩ a Kɩrɩta a. 11Tɩ na lãw nɩ a Kɩrɩta a, tɩ páw nɩ a bom ʋl a Naaŋmɩn na ƴãw nʋɔr k'ʋʋ na kʋ̀ tɩ na a: bʋ̃ʋ n'ʋ vɛ̃, ʋ tɩ de nɩ niwn kaa ir tɩ a tu a lɛ ʋ na cɔbrɩ a yele bin a; ɛ a Naaŋmɩn mɩ́ maal ɩ a yele za mɛ̃ a lɛ ʋ na yel ɛ bɔbr a. 12A na ɩ a ŋa a, nyɩ ɩ tɩ danɛ a Naaŋmɩn yúor-vɩɛlʋ-danʋ, tɩɩm na ɩ a de niwn dem na ƴãw a tɩ tɩɛrʋ a Kɩrɩta ƴãw a. 13A Kɩrɩta nyɩ na lãw nɩ a ƴãw n'a nyɩ wõ a yel-mɩŋa ƴɛrʋ, a Yel-nʋ̃ɔ̀ na faarɛ nyɩ a. A ʋl nyɩ na lãw nɩ a ƴãw mɩ̀ cãa n'a nyɩ saw de, ɛ́ bɛ ŋmãa a Vʋʋrʋ a Naaŋmɩn na tɩr a bãwfʋ ƴãw nyɩ, a Vʋʋrʋ Sõw na ɩ 14a tɩ gbã-dɩ-bom bʋ̃-dãw tɩ páw sɛr, gùre nɩ a faafʋ za tɩ nãà wa páw a Naaŋmɩn yúor-vɩɛlʋ-danʋ ƴãw a. 15Alɛ n'a so, a mãa mɩ̀ na wõ kɛ́ nyɩ saw na de a Sore Yeezu ɛ nɔnɛ a Kɩrɩta-biir za a, 16ɩ̃ puore a Naaŋmɩn yaanɩ kʋra lɛ, ɩ̃ na mɩ́ wa tɛr a nyɩ tɩɛrʋ a ɩ̃ puoru pʋɔ a. 17A tɩ Sore Yeezu Kɩrɩta Naaŋmɩn, ʋl na ɩ Sãà so yúor-vɩɛlʋ-danʋ za a, ʋ kʋ̀ nyɩ yã-bãwfʋ nɩ yel-sɔwlɩ bãwfʋ yã, kɛ̀ nyɩ tʋ̃ɔ bãw ʋ sɩza. 18Ʋ saw caalɩ a nyɩ socie nɩ a ʋ cãa, nyɩ tʋ̃ɔ bãw a tɩɛrʋ ʋl a ʋ bʋɔlʋ na ɩ kɛ nyɩ tɛr a, nɩ a ʋ gbã-dɩ-bom na vɩɛl bɛ tɛr tɔ, ʋ na cɔbrɩ cɛlɛ nɩ a ʋ nɩ-sori a. 19Ʋ ɩ nyɩ bãw a ʋ kpɛnʋ ʋl na ɩ kpɛ̃ɛ bɛ tɛr manʋ a, ʋ na wul ʋ sãá a tɩɩm na saw de a ƴãw a. A ʋ fãw tome a, a ʋ kpɛnʋ na bɛ dɩ vuo a, ʋ ɩ na a sãá a Kɩrɩta zie, 20a lɛn daar ʋ na ɩ a Kɩrɩta lɛb yi a kũuni pʋɔ, ɛ ʋ ƴãw ʋ zɩ̃ a ʋ dʋrʋ lowr a tẽ-vla pʋɔ, 21do gãw a naalʋ-dɩb za, fãw za, kpɛnʋ za nɩ zie-sób za, nɩ bom za na tɛr yúor bɛ pore a dɩ̃a zie ŋa pʋɔ nɩ a nɩdaar zie pʋɔ a. 22Naaŋmɩn dĩ nɩ bom za bìn a Kɩrɩta pile, ɛ ƴãw ʋ do tɩ be bom za zu-sɔw, ɩ a Lãw-yir zu, 23a Lãw-yir na ɩ a ʋ ƴãgan a Kɩrɩta paalɩ ʋ za kpɛ̃lɛ̃kpɛ̃lɛ̃ a, a Kɩrɩta na paalɩ bom za a.

will be added

X\