2 TIMOTE 3

1Bãw a yel ŋa vla vla: a bibi-pɛ-baarɩ daar, a zie na kpɛmɛ na. 2Bʋ̃ʋ n'ʋ vɛ̃, a nɩbɛ na tɩɛrɛ nɩ bɛl tɛwr yele, ɛ ɩ libi-nɔ̃wnbɛ; bɛ na pɔrɛ nɩ zaa lɛ ɛ ɩrɛ pɔ̀lʋ, bɛ na tʋʋr ɩ Naaŋmɩn zʋmɛ, ɛ bɛ sawr a bɛ dɔwrbɛ nʋɔr ɛ; fʋ na mɩ́ maalɩ bɛ na, ɛ́ bɛ bɛ ŋmɛlɩ kaa fʋ ɛ, bɛ na sãwnɛ nɩ a bʋ̃-son bɛrɛ. 3Bɛ kʋ̃ tɛr nɔ̃wfʋ ɛ, ɛ bɛ tɛr nɩ-baal-zɔba ɩ. Bɛ na ɩ n gɛgɛrɩ, ɛ kʋ̃ tuur nʋɔr kãw za ɩ, poto-faar nɩbɛ na ciir yel vla a. 4Bɛ na mɩlɛ nɩ taa, ɛ ɩ suur tɛwr, pɔ̀lʋ tɛwr nɩbɛ, ɛ́ nɔnɛ a ƴãgan nʋ̃ɔ̀ ɛ nɩ̃ɛ bɛr a Naaŋmɩn. 5Bɛ na sãá nɩ nɩbɛ na ƴãwnɛ Naaŋmɩn a, ɛ cɛ bɛ na zawr ɩ a Naaŋmɩn ƴãwfʋ fãw bɛr. Ŋmɛlɩ kpaar cɔw a nɩbɛ bɛ ŋa mɩ̀! 6A bɛ nɩbɛ n'ɩ a bɛl na mɩ́ kpɛ a yie pʋɔ bɛlɩ nyɔw pɔwbɛ na bɛ tɛr fãw, na tuo yel-bebe ɛ tu a bɛ pʋ-tɩɛr-bʋʋrɛ za pùor a; 7a pɔwbɛ bɛ ŋa taabɛ be n a zanʋ zu kʋra lɛ, ɛ bɛ be za na tʋ̃ɔ bãw a yel-mɩŋa ɩ. 8Mɛ̃ a lɛ a Zanɛsɩ nɩ a Zãbɩrɛsɩ na bɛ tɩ saw de a Mõyiir ƴɛrʋ a, lɛ n'a a nɩbɛ bɛ ŋa mɩ̀ bɛ saw de a yel-mɩŋa ɩ. Yã-faar nɩbɛ nɛ bɛ, a bɛ Naaŋmɩn-saw-deb bɛ tɛr bir ɛ. 9Ɛ cɛ bɛ kʋ̃ tɔl yɩ̃ɛ ɩ, a bɛ dãbolu na sãá na nɩbɛ za nyɛ̃, mɛ̃ a lɛ a nɩbɛ ayi bɛ ŋa dem na tɩ sãá a. 10Ɛ cɛ a fʋ̃ʋ a, fʋ tu mɛ̃ nɩ vla a ɩ̃ wulu pʋɔ, nɩ a ɩ̃ cenu pʋɔ, a lɛ ɩ̃ na mɩ́ tɩɛr k'ɩ̃ɩ ɩ a, nɩ a ɩ̃ Naaŋmɩn-saw-deb pʋɔ, a ɩ̃ tʋɔra-nyɔwfʋ pʋɔ nɩ a nɔ̃wfʋ pʋɔ, a kanyir pʋɔ, 11a dɔwrʋ pʋɔ nɩ a kpɩɛrʋ pʋɔ ɩ̃ na páw a Ãtɩɔsɩ a, a Ɩkonɩɔm nɩ a Lɩsɩtɩr tẽw a. Bʋ̃ʋ dɔwrʋ n'a ɩ̃ bɛ nyɛ̃! Ɛ a Sore faa mɛ̃ a za pʋɔ! 12Mɔ̃ mɩ̀, a bɛlɩ dem za na bɔbr kɛ́ bɛ vʋʋrɛ nɩ Naaŋmɩn ƴãwfʋ lãw nɩ a Kɩrɩta Yeezu a, bɛ na nyɛ̃ nɩ dɔwrʋ. 13Ɛ a nɩ-faar nɩ a nɩ-bɛlbɛ a, ɩ-faar a bɛ na ɩrɛ dɔwlɛ cere nɩ, tule nɩ a bɛ taabɛ ɛ tule a bɛl tɛɛ za. 14Ɛ cɛ a fʋ̃ʋ a, a yele al fʋ na zànɩ ɛ nyɛ̃ a ɩ sɩza a, maal tɛr a kpɛ̃w za. Fʋ bãw nɩ a bɛlɩ dem zie fʋ na zànɩ a yele a ŋa a. 15A fʋ bibile daarɩ za n'a fʋ bãw a Sɛb-son. A tɛr ɩ fãw na kʋ̀ b a yã-bãwfʋ na na ɩ fʋ páw a faafʋ a Kɩrɩta Yeezu saw-deb pʋɔ a. 16Sɛb-sõw za a, Naaŋmɩn Vʋʋrʋ n'ʋ mɩ́ ƴãw bɛ sɛb, ʋ tɛr yel-ɩra a wulu ƴãw, a ziri gɔb ƴãw, a yele lɛ dɛnʋ ƴãw, a mɩnʋ sɔr wulu ƴãw, 17k'aa Naaŋmɩn nɩr mɩ́ cɔbrɩ ʋ za yel-vla za maalʋ ƴãw.

will be added

X\