2 TIMOTE 1

1A mãa Pol, Naaŋmɩn na nɔ̃w yã ƴãw ɩ̃ ɩ a Kɩrɩta Yeezu nɩ-tona a, a tu a lɛ ʋ na yel k'ʋʋ na kʋ̀ tɩ nɩ a nyɔ-vʋʋrʋ a Kɩrɩta Yeezu ƴãw a, 2mãa n'ʋ sɛbr a fʋ̃ʋ ɩ̃ bi-nɔna Timote. A Naaŋmɩn Sãà nɩ a tɩ Sore Kɩrɩta Yeezu, bɛ kʋ̀ b maalʋ, su-ɓaarʋ nɩ ƴã-ɓaarʋ. 3Ɩ̃ na mɩ́ wa pore a fʋ yúor a ɩ̃ puoru pʋɔ, mʋ̃tɔ̃w nɩ tɩ̃ɩsɔw za a, ɩ̃ mɩ́ puore nɩ a Naaŋmɩn barka yaga za, a Naaŋmɩn ɩ̃ na tone nɩ tɩɛr-vla mɛ̃ a ɩ̃ sãakʋ̃-kore a. 4Mãa wa lɛ tɩɛrɛ a fʋ mʋ̃ta-kʋ̃ɔ a, ɩ̃ mɩ́ bɔbr a nɩ ɩ̃ pʋɔ za k'ɩ̃ɩ nãá lɛb nyɛ̃ b kɛ̀ nʋ̃ɔ̀ kpɛ m. 5Ɩ̃ lɛb a bãwnɩ a Naaŋmɩn saw-deb mɩŋa fʋ na tɛr a. A fʋ mãkʋm Loyisɩ nɩ a fʋ mã Enisɩ nɛ bɛ de niwn tɛr a Naaŋmɩn saw-deb ŋa, ɩ̃ na bãwnɩ fʋ mɩ̀ tɛr a. 6Alɛ n'a so ɩ̃ kpaalɛ fʋ, kɛ́ fʋ lɛb sɩ̃w a maalʋ a Naaŋmɩn na kʋ̀ b, a lɛn daar ɩ̃ na ír a nuru dɔwlɩ a fʋ zu a. 7Bʋ̃ʋ n'ʋ vɛ̃, dɛ̃bɩ̃ɛ vʋʋrʋ bɛ n'ʋ a Naaŋmɩn kʋ̀ tɩ ɛ, fãw nɩ nɔ̃wfʋ nɩ tʋɔra-nyɔwfʋ vʋʋrʋ n'ʋ. 8Lɛ so, ta zɔrɛ vĩ a tɩ Sore dãsɩɛ dɩb ƴãw ɛ; a mãa mɩ̀ na be a gaso pʋɔ a ʋ yúor ƴãw a, a ta ɩrɛ fʋ vĩ ɛ. Nɩ̃ɛ vɛ̃ kɛ saw lãw nɩ mɛ̃ wone a tuo, nɩ Naaŋmɩn fãw, a Yel-nʋ̃ɔ̀ ƴãw. 9A Naaŋmɩn faa tɩ na, ɛ bʋɔlɩ tɩ nɩ bʋɔl-sõw. Ɛ cɛ a bɛ kaar mɛ̃ a tɩ ɩ-vɩɛlɩ n'a so ɩ, a ʋ pʋ-tɩɛrʋ nɩ a ʋ maalʋ na tu a lɛ a n'a. A maalʋ ŋa a, a Kɩrɩta Yeezu n'ʋ ʋ kʋ̀ n tɩ, ɛ a dɩta-pɛ-yome za wa bãw be. 10Ƴɛrɛ ŋa a, a maalʋ ŋa pãa sãá na, a tɩ Faarɛ Kɩrɩta Yeezu na wul ʋ tʋɔra a zũú. Ʋlɛ n'ʋ ɩ a kũu kpɛnʋ baarɩ, ɛ ɩ a nyɔ-vʋʋrʋ na bɛ tɛr kũu a, ʋ sãá a Yel-nʋ̃ɔ̀ manʋ pʋɔ. 11A Yel-nʋ̃ɔ̀ ŋa n'ʋ Naaŋmɩn ƴãw k'ɩ̃ɩ hiere, ɩ̃ na ɩ nɩ-tona nɩ wul-wule a. 12Alɛ n'a so ɩ̃ wone a tuo a ŋa. Ɛ cɛ vĩ bɛ ɩrɛ mɛ̃ ɩ, ɩ̃ bãw nɩ sob nɛ ƴãw ɩ̃ na ƴãw a ɩ̃ tɩɛrʋ a, ɛ ɩ̃ bɛ bʋnɛ ɩ, ɩ̃ bãwnɩ a na k'ʋʋ tɛr ɩ fãw na tɛr a bom ʋ na kʋ̀ m k'ɩ̃ɩ tɛlɛ a, tɩ ta a n ƴɛrʋ-maalʋ bibir. 13Tuur a yel-mɩŋa ƴɛr-bie al ɩ̃ na ƴɛr kʋ̀ b a Kɩrɩta Yeezu saw-deb nɩ a ʋ nɔ̃wfʋ pʋɔ a. 14Maal tɛr a bʋ̃-vla ŋa bɛ na kʋ̀ b a, nɩ a Vʋʋrʋ Sõw fãw, ʋl na kpɩɛr a tɩ pʋɔ a. 15Fʋ bãwnɩ a na, a Azi tẽw dem za zawrɩ mɛ̃ na bɛr, Fɩzɛl nɩ Ɛrmozɛn mɩ̀ pʋɔ nɩ a bɛ pʋɔ. 16A Sore, ʋ tɛr su-ɓaarʋ ɩb yaga za a Onezifɔɔr yir dem ƴãw. Gb'a a yaga za, a Onezifɔɔr ɓaal ɩ a ɩ̃ tɩɛrʋ, ɛ bɛ zɔ a ɩ̃ gaso bamɛ vĩ ɛ. 17Ɛ cɛ ʋ na wa tarɛ a Ʋrɔm tẽw wa baarɛ a, ʋ ƴãw nɩ fãw bɔ tɩ nyɛ̃ m. 18A Sore, ʋ ɩ ʋ páw su-ɓaarʋ a Naaŋmɩn zie a ƴɛrʋ-maalʋ bibir. Ɛ a tome al za, ʋ na tõ kʋ̀ m a Efɛɛzɩ tẽw a, fʋ bãw a nɩ vla zuo nɩr za.

will be added

X\