2 TESALONIKI 2

1Yɛbr ɩ, a tɩ Sore Yeezu Kɩrɩta waa, nɩ tɩ na na ɓã taa a ʋ zie a ƴãw a, tɩ zɛlɛ nyɩ na: 2nɩr wa yel k'aa Sore bibir ta na a, nyɩ ta saw a nyɩ tɩɛrʋ dam nyɩ fɔ̃w lɛ ɩ, ɛ́ nyɩ ta zɔrɛ dɛ̃bɩ̃ɛ ɩ; bɛlɛ saa yel kɛ tɩmɛ nɛ bɛ ƴɛr Naaŋmɩn-ƴɛr-manɛ ƴɛrʋ bɩɩ ƴɛr ƴɛrʋ kãw bɩɩ tɩr sɛbɛ a, nyɩ taa sawr ɛ. 3Nyɩ ta saw nɩr kãw za bɛlɩ nyɔw nyɩ nɩ bɛl-bʋʋrɛ kãw za ɩ. Bʋ̃ʋ n'ʋ vɛ̃, a fɛr a kɛ́ a Naaŋmɩn jɛ-bɛrʋ ta baarɩ, kɛ́ a Faalʋ nɩr, na ɩ nɩ-wɛra a, sãá baarɩ, ɛ a bibir ŋa bãw ta. 4Bom nɛ za a nɩsaalbɛ na bʋɔlɛ kɛ ŋmɩn a, ɛ puore ʋ a, a Faalʋ nɩr na ìr ɩ nɩ pɔ̀lʋ ɩ a ʋ dɔ̃ sob, ɛ ʋ na tɛr ɩ lɛɛɛ tɩ kpɛ zɩ̃ a Naaŋmɩn yi-kpɛ̃ɛ pʋɔ, ɛ yel k'ʋʋ ɩ n Naaŋmɩn. 5Nyɩ yiir a ɩ̃ na tɩ yel a yel ŋa kʋ̀ nyɩ, a lɛn daar ɩ̃ na tɩ be a nyɩ zie a bɩɩ? 6Ɛ ƴɛrɛ ŋa a, nyɩ bãwnɩ bom nɛ na n'ʋ nyɔw a Faalʋ nɩr tɛr sɛr, ɛ gu k'ʋʋ wa sãá a ʋ daar a. 7Bʋ̃ʋ n'ʋ vɛ̃, a faalʋ kpɛnʋ na sɔwl a tĩ na tone baarɩ; ɛ cɛ a sob nɛ na nyɔw ʋ tɛr a, wa bɛr ʋ vuo a, ʋ na yi n cãàmɩ́ ʋ za. 8Lɛ n'a a Faalʋ nɩr na sãá, a Sore Yeezu pɛbl ʋ kʋ́, ɛ ɩ ʋ bɔr nɩ a ʋ waa cãa. 9A Faalʋ nɩr na wa n nɩ a Sɩtaana kpɛnʋ za, wa maalɛ nɩ nɔ-ɓãa-yel-bʋʋrɛ za nɩ yel-bãw-guuri na tule nɩbɛ a; 10a ɩ-fa-pɛ-bʋʋrɛ za n'a ʋ na bɛlɛ nɩ a bɛlɩ dem na bɔrɛ a, bɛ na bɛ saw de ɛ bɛ nɔnɛ a yel-mɩŋa a ƴãw, ɛ cɛ a yel-mɩŋa n'ʋ nãá tʋ̃ɔ faa bɛ. 11Lɛ so Naaŋmɩn kʋ̀rɛ bɛ bɔrʋ fãw, na mɩ́ ɩ bɛ saw de a ziri a, 12k'aa bɛlɩ dem za nãà bɛ wa saw de a yel-mɩŋa ɛ nɔ̃w a faalʋ a, bɛ nyɛ̃ dɔwrʋ. 13Yɛbr ɩ, tɩɩm ƴãw a, a fɛr a kɛ́ tɩ mɩ́ puore a Naaŋmɩn yaanɩ a nyɩ ƴãw kʋra lɛ, nyɩɩm a Sore na nɔnɛ a. Bʋ̃ʋ n'ʋ vɛ̃, Naaŋmɩn kaa na ir nyɩ a pɛr tib daar, k'aa Vʋʋrʋ Sõw na tɩrɛ a sonu a zũú, nɩ a yel-mɩŋa nyɩ na saw de a ƴãw, nyɩ nyɛ̃ a faafʋ. 14A yel ŋa ƴãw n'a ʋ bʋɔlɩ nyɩ, a tɩ Yel-nʋ̃ɔ̀ tɩ na manɩ kʋ̀ nyɩ a zũú; ʋ bʋɔlɩ nyɩ na kɛ́ nyɩ wa tɛr a tɩ Sore Yeezu Kɩrɩta yúor-vɩɛlʋ-danʋ. 15A na ɩ a ŋa a, yɛbr ɩ, nyɩ ƴãw fãw, ɛ maal tɛr a wulu al tɩ na lʋɔrɩ kʋ̀ nyɩ nɩ a tɩ nʋɔr ƴɛrʋ bɩɩ nɩ a tɩ sɛbɛ a. 16A tɩ Sore Yeezu Kɩrɩta mɩŋa nɩ a tɩ Sãà Naaŋmɩn na nɔ̃w tɩ, ɛ a ʋ maalʋ zũú ʋ kʋ̀ tɩ mɔwlʋ na be kʋra lɛ nɩ tɩɛr-vla tɩ na ƴãw a ʋ ƴãw a, 17bɛ mɔwlɛ nyɩ ɛ kʋ̀rɛ nyɩ fãw a vla maalʋ ƴãw kʋra lɛ a nyɩ ɩ-ɩrɩ pʋɔ, nɩ a nyɩ nʋɔr ƴɛrʋ pʋɔ.

will be added

X\