2 PƖƐR 2

1Naaŋmɩn-ƴɛr-man-bɛlɛ bɛlɛ mɩnɛ mɩ̀ tɩ be n a Naaŋmɩn nɩ-bʋʋrɛ pʋɔ. Lɛ n'a wul-wul-bɛlɛ-bɛlɛ mɩnɛ mɩ̀ na be a nyɩ pʋɔ. Bɛ na wa n nɩ wulu na bɛ tu sɔr ɛ bɔrɛ a nɩbɛ a, mɔ̃ mɩ̀, bɛ na zawr ɩ a Wul-wul-kara na ya de bɛ a bɛr. A ŋa n'a bɛ na ɩ ƴãw bɛ tʋɔra kũu na kʋ̃ yaa kɛ ta a pʋɔ. 2Ɛ cɛ nɩ-yaga na tu bɛ nɩ a bɛ faalʋ a ŋa pʋɔ. A bɛl ƴãw, a yel-mɩŋa sɔr na lɩɛb ɩ zʋmɛ bom. 3Ɛ́ bɛ na nɔnɛ kɛ bɛ tɛr a a, bɛ na tɛr ɩ nɔ-kãa nɛbr ɩ nyɩ. Ɛ cɛ bɛ maal ɩ bɛ nɩ a ƴɛrʋ baarɩ koro za, ɛ a bɛ loba ɩ n yɩ̃ɛ lɛ. 4Bʋ̃ʋ n'ʋ vɛ̃, a malkɩ mɩnɛ bɛl na sãw a, Naaŋmɩn bɛ bɛr bɛ ɩ, ʋ lɔb bɛ na ƴãw a tẽ-faa lige pʋɔ cɛlɛ nɩ a ƴɛrʋ-maalʋ. 5Ʋ mɩ̀ bɛ bɛr a dãwdãw tẽ-daa a ɩ, ʋ ƴãw na kʋ̃ɔ paalɩ pàw a nɩ-faar tẽw ŋa; ɛ cɛ ʋ tɩ piw nɩ a Nowe na tɩ hiere a yel-mɩnʋ a tɛr, lãw nɩ nɩbɛ ayopõi kãw. 6A pùorí, ʋ ƴãw nɩ dɔwrʋ a Sodɔm nɩ a Gomɔɔr ten. Ʋ ƴãw nɩ vũu dɩ a kʋ̃mkʋ̃m, k'aa wul k'aa ŋa n'a a nãá ŋmɛ̃ a nɩ-faar za zie. 7Ɛ cɛ ʋ tɩ faa nɩ a nɩ-mɩŋa Lɔtɩ, a nɩ-faar bɛ ŋa nyɔ-vʋʋr-faa na tɩ ɩrɛ a kpɩɛr yaga za a. 8Bʋ̃ʋ n'ʋ vɛ̃, a nɩ-mɩŋa ŋa tɩ kpɩɛr ɩ a bɛ sɔgɔ, nyɛ̀rɛ ɛ wone a bɛ ɩ-faar bibie za. A bɛ ɩ-ɩrɩ na bɛ tu sɔr a, tɩ ɩ ʋ nɩ kpɩɛrʋ bɛ dɩ vuo ɩ. 9A wul a k'aa Sore na tʋ̃ɔ na faa a bɛlɩ dem na ƴãwnɛ ʋ a bɛr a tuo pʋɔ, ɛ tɛr a nɩ-faar gùre nɩ a ƴɛrʋ-maalʋ bibir, k'ʋʋ ƴãw bɛ dɔwrʋ. 10Ɛ baa zuo a za, ʋ na ƴãw nɩ dɔwrʋ a bɛlɩ dem na mɩ́ zɔrɛ tuur a ƴãgan nʋ̃ɔ̀, a bɛ pɩ̃ɔ yele tɩɛr-faa zũú, ɛ́ bɛ mãko bɛ ka be a Sore nɩ-kpɛ̃ɛnʋ ƴãw a. Bɛ kpɛ n pʋra, ɛ ɩ pɔ̀lʋ dem, bɛ bɛ zɔrɛ dɛ̃bɩ̃ɛ a salom zu dem na tɛr yúor-vɩɛlʋ-danʋ a tʋb ƴãw ɛ. 11Ɛ cɛ malkɩ mɩnɛ na tɛr fãw zuo a nɩbɛ bɛ ŋa, ɛ lɛ kpɛmɛ zuo bɛ a, bɛ sawr tʋʋr a salom zu dem bɛ ŋa a Sore niŋé ɩ. 12Ɛ cɛ, mɛ̃ dʋn na bɛ bãw yã ɛ be bɛrɩ nyɔwfʋ ƴãw, ɛ na kpi wɛ a, a nɩbɛ bɛ ŋa tʋʋr ɩ bom bɛ na bɛ bãw a, bɛ na kpi na wɛ mɛ̃ a dʋn a. 13A ŋa n'a bɛ na páw a bɛ ɩb na bɛ tu yel-mɩŋa a sã-ya. Cãàmɩ́ lɛ n'a bɛ nɔnɛ a pɩ̃ɔ yele maalʋ. Bɛlɛ wa lãw nɩ nyɩ dɩrɛ a lɛn daar a, ɛ a bɛ nʋ̃ɔ̀ ɩ a bɛ ziri a, bɛ mɩ́ ɩ n nɩ-dɛgɛ nɩ nɩ-ɩlaarɩ. 14Pɔw-gaa-yele jɩrʋ n'a a bɛ mimie nɔnɛ yaga za, ɛ́ bɛ bɛ dãw sɛw a yel-bier maalʋ ɛ. Lɛ n'a bɛ ɩrɛ bɛlɛ nyɔwr a bɛlɩ dem na bɛ tɛr fãw a, nɩr bɛ nɔ̃w a tɛ̀rá man bɛ ɩ, nɩ-ŋmɛ-ƴãwnɩ nɛ bɛ. 15Bɛ bɛr ɩ a sɔr dẽdẽ, ɛ bɔr tu a Bosɔɔr bi-dɛb Balaam pùor, ʋl na tɩ bɛr ɩ-faar sã-ya bɛlɩ nyɔw ʋ a. 16Ɛ cɛ, ʋ tɩ nyɛ̃ nɩ kpãafʋ a ʋ sãwna ƴãw: bõw na bɛ ƴɛrɛ a, tɩ ƴɛrɛ na mɛ̃ nɩsaal a, ɩ a Naaŋmɩn-ƴɛr-manɛ dãbolu baarɩ. 17A nɩbɛ bɛ ŋa ɩ na mɛ̃ buli na ko kpar a, ɛ ŋmɛ̃ mɛ̃ zũzuwe saa sɛsɛb na darɛ cere nɩ a. Liw lige n'a gã cɛlɛ bɛ. 18Bɛ mɩ́ ƴɛrɛ nɩ ƴɛr-bɛrɛ ƴɛr-zawlɛ, a pɩ̃ɔ yele ƴãgan nʋ̃ɔ̀-faar tɩɛrʋ na ɩrɛ vĩ a, n'a bɛ mɩ́ bɛlɩ nyɔw nɩ a bɛlɩ dem na bʋ́r yi paalʋ a nɩbɛ bɛl pʋɔ na vʋʋrɛ a tulu pʋɔ a. 19Bɛ mɩ́ yel a kɛ bɛ na ɩ na bɛ so bɛ tʋɔra, zɩ̃ kɛ bɛl tɛɛ za ɩ n a ɩ-faar bɛ na mili nɩ a gbãgbaar. Bʋ̃ʋ n'ʋ vɛ̃, bom na tʋ̃ɔ a nɩsaal a, a nɩsaal ɩ n a bom ʋl gbãgbaa. 20Yel-mɩŋa n'a, a bɛlɩ dem na faa bɛ tuɔra a tẽ-daa dɛwr ƴãw, a tɩ Sore nɩ a tɩ Faarɛ Yeezu Kɩrɩta bãwfʋ zũú a, bɛlɛ wa lɛ bɛr a dɛwr a ŋa lɛ páw bɛ ɛ tʋ̃ɔ bɛ a, bɛ nɩ̃ɛ na mɩ́ lɛ kpɛ faa zuo a dãwdãw. 21Bʋ̃ʋ n'ʋ vɛ̃, bɛlɛ nɩ̃ɛ bɛ tɩ dãw bãw a mɩnʋ sɔr a, alɛ sa bɛ na bãw ʋ baarɩ ɛ lɛ zawrɩ a Naaŋmɩn nɔ-ƴãwna sõw bɛr, bɛ na tɩ lʋɔrɩ kʋ̀ bɛ a. 22A ŋmɛ̃ na mɛ̃ a lɛ a zʋkpar na yel a: «A baa lɛb a dɩrɛ a ʋ tiiru!» Nɩ kɛ: «A dobaa so na kʋ̃ɔ wa baarɛ ɛ lɛ miili a mɛ̃mɛrɛ.»

will be added

X\