2 KORƐ̃TƖ 4

1Su-ɓaarʋ zũú na n'a Naaŋmɩn kʋ̀ tɩ a tõ-nʋɔr ŋa a, alɛ so tɩ bɛ be na bal bɛr ɛ. 2Tɩ zawr ɩ ɩb za bɛ na mɩ́ sɔwlɩ ɩrɛ a, nɩ bom za na ɩrɛ vĩ a. Tɩ bɛ tɛr yã-ɩb bɛlɛ nɩ nɩbɛ ɩ, tɩ bɛ tɛwr a Naaŋmɩn ƴɛrʋ tule nɩ a nɩbɛ ɩ, tɩ nɩ̃ɛ na ɩrɛ k'aa yel-mɩŋa sãá, bɔbr ɩ k'aa nɩbɛ za nyɛ̃ kɛ́ tɩ ɩ n nɩ-mɩn a Naaŋmɩn niŋé. 3Ɛ cɛ a Yel-nʋ̃ɔ̀ tɩ na manɛ a, wa cãa ɩ mɛ̃ ʋ sɔwl a a, a bɛlɩ dem na bɔrɛ a zie n'a ʋ sɔwlɩ, 4a Naaŋmɩn bɛ-saw-dierbɛ, bɛl a tẽ-daa ŋa naaŋmɩn na zɔ̃w a bɛ tɩɛrʋ, kɛ́ bɛ ta nyɛ̃ a Kɩrɩta Yel-nʋ̃ɔ̀ yúor-vɩɛlʋ-danʋ cãa a, a Kɩrɩta ŋa na ɩ a Naaŋmɩn ŋmɛ̃-ta-tɔ tɔr za a. 5Tɩɩm mɩŋa bɛ nɛ bɛ tɩ hiere yere kʋ̀rɛ a nɩbɛ ɩ, Sore Yeezu Kɩrɩta n'ʋ. Tɩɩm a, tɩ yere na kɛ tɩ ɩ n a nyɩ tõ-tõ-biir a Yeezu zũú. 6Bʋ̃ʋ n'ʋ vɛ̃, a Naaŋmɩn ʋl na yel kɛ: «A cãa, ʋ caalɩ a lige sɔgɔ a», ʋl mɩŋa n'ʋ caalɩ a tɩ socie pʋɔ, k'ʋʋ ɩ tɩ bãw a ʋ yúor-vɩɛlʋ-danʋ cãa na caalɛ a Kɩrɩta niwn ƴãw a. 7Ɛ cɛ tɩ tɛr ɩ a na-bʋ̃-sɩza ŋa mɛ̃ yawra duwli pʋɔ n'a tɩ ƴãw a, k'aa kpɛnʋ ŋa na bɛ tɛr tɔ a, ta yi tɩɩm zie ɩ, ʋ yi Naaŋmɩn zie. 8Kpɩɛrʋ bʋʋrɛ za ta tɩ na, ɛ́ a bɛ dĩ tɩ kʋ́ ɛ; a mɩ́ ɩ na mɛ̃ tɩ na tɔl a gu a, ɛ́ tɩ tʋ̃ɔ tɔl; 9bɛ diw tɩ na gʋɔr ɩ, ɛ́ bɛ páw tɩ ɛ; bɛ lɔb tɩ nɩ tẽw, ɛ cɛ bɛ kʋ́ tɩ ɛ. 10Kʋra lɛ n'a a Kɩrɩta kũu be a tɩ ƴãganɩ́, k'aa ʋ nyɔ-vʋʋrʋ mɩ̀ tʋ̃ɔ sãá a tɩ ƴãganɩ́. 11Tɩ na saa cãa vʋʋrɛ a, ɛ cɛ a kũu jɩɛrɛ tɩ nɩ kʋra lɛ a Yeezu yúor ƴãw, k'aa ʋ nyɔ-vʋʋrʋ mɩ̀ tʋ̃ɔ sãá a tɩ ƴãgan na ɩ bʋ̃-kpiira a pʋɔ. 12A na ŋmɛ̃ a ŋa a, a kũu tone nɩ a tɩ zie, ɛ a nyɔ-vʋʋrʋ tone a nyɩ zie. 13A Sɛb-sõw yel a: «Ɩ̃ saw na de, alɛ so ɩ̃ ƴɛr.» A tɩɩm mɩ̀, a saw-deb-been ŋa tɩɛrʋ tɩ na tɛr a n'a so tɩ mɩ̀ saw de, ɛ alɛ n'a so tɩ ƴɛrɛ. 14Bʋ̃ʋ n'ʋ vɛ̃, tɩ bãwnɩ a na, a sob nɛ na ɩ a Sore Yeezu ʋ lɛb yi a kũu pʋɔ a, mɩ̀ na ɩ na tɩ lãw nɩ a Yeezu lɛb yi a kũu pʋɔ, ɛ ʋ na de tɩ na lãw nɩ nyɩ a ʋ zie. 15A nyɩɩm ƴãw n'a tɩ sawr tuo za, k'aa Naaŋmɩn maalʋ tarɛ nɩ-yaga dɔwlɛ, lɛ n'a nɩ-yaga na puore a Naaŋmɩn yaanɩ a ʋ yúor-vɩɛlʋ-danʋ ƴãw. 16Alɛ so tɩ bɛ be za nãa bal bɛr ɛ. A tɩ nɩsaal ʋl na sãá a, saa sãwnɛ cere a, a tɩ nɩsaal ʋl na be a pʋ̃ɔmɩ́ a, lɩɛbɛ nɩ paala bibir za. 17A kpɩɛrʋ tɩ na páwr a ƴɛrɛ ŋa a, bɛ zɛ̃ bom a yúor-vɩɛlʋ-danʋ na bɛ dɩ vuo ɛ be kʋra lɛ a ƴãw ɛ. A yúor-vɩɛlʋ-danʋ ŋa ƴãw n'a a kpɩɛrʋ a ŋa cɔbrɛ tɩ. 18Bom nɛ tɩ na bɔbr kɛ́ tɩ páw a, ʋ bɛ ɩ bom bɛ na mɩ́ nyɛ̃ a ɩ, bom bɛ na bɛ mɩ́ nyɛ̃ a n'ʋ. Bom bɛ na mɩ́ nyɛ̃ a be n be sɛr, ɛ cɛ a bom bɛ na bɛ mɩ́ nyɛ̃ a, be kʋra lɛ.

will be added

X\